ଚେନ୍ନାଇ,୧୨।୨: ଚେନ୍ନାଇରେ ଚାଲିଥିବା ଭାରତ-ଆମେରିକା ମିଳିତ ସମରାଭ୍ୟାସରେ ଆଣବିକ, ରାସାୟନିକ, ବାୟୋଲୋଜିକାଲ ଏବଂ ରେଡିଓଲୋଜିକାଲ (ସିବିଆର୍ଏନ୍) ଆତଙ୍କର ମୁକାବିଲାକୁ ସାମିଲ କରାଯାଇଛି। ଟାର୍କାଶ ନାମକ ଏହି ଯୁଦ୍ଧାଭ୍ୟାସରେ ଭାରତର ଜାତୀୟ ସୁରକ୍ଷା ଗାର୍ଡ (ଏନ୍ଏସ୍ଜି) ଏବଂ ଆମେରିକାର ସ୍ବତନ୍ତ୍ର ଅପରେଶନ ଫୋର୍ସ (ଏସ୍ଓଏଫ୍) ଯୋଗ ଦେଇଛନ୍ତି। ୧୪ ତାରିଖ ପର୍ଯ୍ୟନ୍ତ ଚାଲିବାକୁ ଥିବା ଏହି ଆତଙ୍କବାଦ ନିରୋଧୀ ମିଳିତ ସମରାଭ୍ୟାସକୁ ଜୋର୍ଦାର କରାଯାଇଛି। ଏହାର ମୁଖ୍ୟାଂଶ ହେଲା ଦୁଇ ସ୍ବତନ୍ତ୍ର ବାହିନୀ ମଧ୍ୟରେ ସିବିଆର୍ଏନ୍ ଆତଙ୍କର ମୁକାବିଲା ଲାଗି ମକ୍ ଡ୍ରିଲ୍ ବୋଲି ଏନ୍ଏସ୍ଜି ପକ୍ଷରୁ ଟୁଇଟ୍ କରାଯାଇଛି। ଏହା ପ୍ରଥମ ଯୁଦ୍ଧାଭ୍ୟାସ, ଯେଉଁଥିରେ ଏକସଙ୍ଗେ ରାସାୟନିକ, ଜୈବିକ, ରେଡିଓଲୋଜିକାଲ ଏବଂ ଆଣବିକ ଆତଙ୍କ ବିରୋଧରେ ଜବାବ ଦିଆଯାଉଛି।
ମକ୍ ଡ୍ରିଲ୍ ସମୟରେ ରାସାୟନିକ ଅସ୍ତ୍ରରେ ସଜ୍ଜିତ ଏକ ଆତଙ୍କବାଦୀ ସଂଗଠନ ଅନ୍ତର୍ଜାତୀୟ ସମିଟ୍ ଅବସରରେ ଏକ ସମ୍ମିଳନୀ ହଲ୍ ଉପରେ ଆକ୍ରମଣର ଧମକ ଦେଉଛି। ଉକ୍ତ ଆତଙ୍କବାଦୀମାନଙ୍କୁ ତୁରନ୍ତ ହତ୍ୟା କରିବା ସହ ସେମାନେ ପଣବନ୍ଦୀ ରଖିଥିବା ଲୋକମାନଙ୍କୁ ନିରାପଦର ସହ ଉଦ୍ଧାର କରିବା ଏବଂ ଆତଙ୍କବାଦୀଙ୍କ ରାସାୟନିକ ଅସ୍ତ୍ରକୁ ଅକାମୀ କରିଦେବା ଏନ୍ଏସ୍ଜି ଏବଂ ଆମେରିକା ଏସ୍ଓଏଫ୍ ଟିମ୍ର ମିଳିତ ସମରାଭ୍ୟାସର ଲକ୍ଷ୍ୟ ବୋଲି ଜଣେ ଭାରତୀୟ ଅଧିକାରୀ କହିଛନ୍ତି।
ଆତଙ୍କବାଦୀମାନେ ରାସାୟନିକ, ଜୈବିକ, ରେଡିଓଲୋଜିକାଲ କିମ୍ବା ଆଣବିକ ସାମଗ୍ରୀକୁ ଅସ୍ତ୍ର ଭାବେ ବ୍ୟବହାର କରୁଥିଲେ, ଏହାକୁ ପ୍ରୋଟେକ୍ସ ୟୁକେ ଅନୁଯାୟୀ ସିବିଆର୍ଏନ୍ ଆତଙ୍କବାଦ ବୋଲି କୁହାଯାଉଛି। ଏହା ବିଶ୍ୱ ଶାନ୍ତି ପାଇଁ ଗମ୍ଭୀର ବିପଦ ସୃଷ୍ଟି କରିଛି, ଯାହା ଉପରେ ନିରନ୍ତର ଦୃଷ୍ଟି ଦିଆଯିବା ଆବଶ୍ୟକ। ପୂର୍ବରୁ ଅଳ୍ପ କେତେକ ଆତଙ୍କବାଦୀ ଆକ୍ରମଣରେ ସିବିଆର୍ଏନ୍ ସାମଗ୍ରୀ ବ୍ୟବହୃତ ହୋଇଛି। ୨୦୧୭ ସିରିଆ ଆକ୍ରମଣରେ ରାସାୟନିକ ଅସ୍ତ୍ର ବ୍ୟବହାର କରାଯାଇଥିଲା। ଏହି ଆକ୍ରମଣରେ ଶତାଧିକ ଲୋକଙ୍କ ଜୀବନ ଯାଇଥିଲା। ଆତଙ୍କବାଦୀ ଓ ସେମାନଙ୍କୁ ସହାୟତା କରୁଥିବା ଏଜେଣ୍ଟମାନଙ୍କ ହାତରେ ଏଭଳି ମାରାତ୍ମକ ସାମଗ୍ରୀ ପଡ଼ିଯିବା ସହ ସେମାନେ ଏହାକୁ ବ୍ୟବହାର କରିବା ସମ୍ଭାବନା ଥିବାରୁ ଏହା ବିଶ୍ୱ ଶାନ୍ତି ଓ ସୁରକ୍ଷା ପାଇଁ ଗମ୍ଭୀର ସ୍ଥିତି ସୃଷ୍ଟି କରିଥିବା ଜାତିସଂଘ ପକ୍ଷରୁ କୁହାଯାଇଛି।
