ଦୁବାଇ,୭।୩(ପି.ଟି.): ଇଂଲଣ୍ଡକୁ ୩-୧ରେ ଟେଷ୍ଟ ସିରିଜରେ ପରାସ୍ତ କରିବା ସହ ଭାରତ ଶନିବାର ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଟେଷ୍ଟ ଚାମ୍ପିୟନଶିପ୍ର ଲିଗ୍ ପର୍ଯ୍ୟାୟ ଶେଷରେ ପଏଣ୍ଟ ତାଲିକାର ଶୀର୍ଷ ସ୍ଥାନ ଅଧିକାର କରିଛି। ଏଥିସହ ଭାରତ ଫାଇନାଲରେ ପ୍ରବେଶ କରିଛି। ଭାରତ ମୋଟ ଉପରେ ୧୨ଟି ବିଜୟ, ୪ଟି ପରାଜୟ ଓ ଗୋଟିଏ ଡ୍ର ସହ ୫୨୦ ପଏଣ୍ଟ ହାସଲ କରିଛି। ଇଂଲଣ୍ଡର ଐତିହାସିକ ଲଡର୍ସ ଗ୍ରାଉଣ୍ଡରେ ଟେଷ୍ଟ ଚାମ୍ପିୟନଶିପ ଫାଇନାଲ ମ୍ୟାଚ୍ରେ ଭାରତ ଓ ନ୍ୟୁଜିଲାଣ୍ଡ ଆସନ୍ତା ଜୁନ୍ରେ ପରସ୍ପରକୁ ଭେଟିବେ। ନ୍ୟୁଜିଲାଣ୍ଡ ୭ ବିଜୟ ଓ ୪ ପରାଜୟ ସହ ୪୨୦ ପଏଣ୍ଟ ହାସଲ କରି ତାଲିକାର ଦ୍ୱିତୀୟ ସ୍ଥାନରେ ରହିଛି। ସେହିପରି ଅଷ୍ଟ୍ରେଲିଆ ୩୩୨ ପଏଣ୍ଟ ପାଇ ତୃତୀୟ ସ୍ଥାନରେ ରହିଛି। ଇଂଲଣ୍ଡ ଚତୁର୍ଥ, ପାକିସ୍ତାନ ପଞ୍ଚମ ସ୍ଥାନରେ ରହିଛି।
କରୋନା କାରଣରୁ ପଏଣ୍ଟ ଟେବୁଲ ଫର୍ମାଟ୍ରେ ପରିବର୍ତ୍ତନ
କୋଭିଡ୍-୧୯ ମହାମାରୀ କାରଣରୁ ଅନ୍ତର୍ଜାତୀୟ କ୍ୟାଲେଣ୍ଡରରେ ବ୍ୟାଘାତ ସୃଷ୍ଟି ହୋଇଥିବାରୁ ପଏଣ୍ଟ ଟେବୁଲର ଫର୍ମାଟ୍ରେ ପରିବର୍ତ୍ତନ କରାଯାଇଥିଲା। ଅପେକ୍ଷାକୃତ କମ୍ ମ୍ୟାଚ୍ ଖେଳିଥିବା ଦଳଗୁଡିକ ସହ ଭେଦଭାବ ନ କରିବା ପାଇଁ ଆଇସିସି ଏପରି ନିଷ୍ପତ୍ତି ନେଇଥିଲା। ଅନିଲ କୁମ୍ବଲେଙ୍କ ଅଧ୍ୟକ୍ଷତାରେ ଆଇସିସି କ୍ରିକେଟ କମିଟି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଥିଲା। ଦଳଗୁଡିକର ର଼୍ୟାଙ୍କିଙ୍ଗ୍ ପର୍ସେଣ୍ଟେଜ୍କୁ ଦୃଷ୍ଟିରେ ରଖି ମୂଲ୍ୟାଙ୍କନ କରାଯିବାକୁ ନିଷ୍ପତ୍ତି ନିଆଯାଇଥିଲା। ଏହାଦ୍ୱାରା ଦଳଗୁଡିକ ଖେଳିଥିବା ସିରିଜ ଓ ସେହି ସିରିଜରେ ହାସଲ କରିଥିବା ପଏଣ୍ଟକୁ ବିଚାର କରାଯାଇ ପର୍ସେଣ୍ଟେଜ୍ ବାହାର କରାଯାଇଥାଏ। ପ୍ରଥମେ ଭାରତ ଶୀର୍ଷରେ ରହିଥିଲା। ତେବେ ଏହା ଲାଗୁ ହେବା ପରେ ଭାରତ ପଛରେ ପଡିଯାଇଥିଲା। ଶେଷରେ ଭାରତ ପ୍ରତ୍ୟାବର୍ତ୍ତନ କରି ଶୀର୍ଷସ୍ଥାନ ଅଧିକାର କରିଛି। ଲିଗ୍ ପର୍ଯ୍ୟାୟ ଶେଷରେ ଭାରତ ୭୨.୨ ପିସିଟି ପର୍ସେଣ୍ଟେଜ ପାଇ ଶୀର୍ଷରେ ରହିଥିବା ବେଳେ ନ୍ୟୁଜିଲାଣ୍ଡ ୭୦.୦ ପର୍ସେଣ୍ଟେଜ ପାଇ ଦ୍ୱିତୀୟ ସ୍ଥାନରେ ରହିଛି। ସେହିପରି ଅଷ୍ଟ୍ରେଲିଆ ୬୯.୨ ପର୍ସେଣ୍ଟେଜ ସହ ତୃତୀୟ ସ୍ଥାନରେ ରହିଛି।
