ନୂଆଦିଲ୍ଲୀ,୨୯।୧୨ : ଭାରତକୁ ଏକ ବିଶ୍ୱ ଗେମିଂ ହବ କରିବା ପାଇଁ ସହଜ ବ୍ୟବସ୍ଥା ଉପରେ ଯୋଜନା ଜାରି ରହିଛି। ଖେଳ କାର୍ଯ୍ୟକଳାପରୁ ହୋଇଥିବା ଆୟରୁ ଖର୍ଚ୍ଚ ଏବଂ କ୍ଷତି ଅଫସେଟ କରିବା ବ୍ୟବସ୍ଥା ବନ୍ଦ କରାଯିବା ନେଇ ଚର୍ଚ୍ଚା ହେଉଛି। ନିୟନ୍ତ୍ରିତ ପ୍ଲାଟଫର୍ମରେ ୩୦ ପ୍ରତିଶତ ଆୟକରର ଉଚ୍ଚ ହାର ବିଦେଶୀ ପ୍ଲାଟଫର୍ମକୁ ରାସ୍ତା ଦେଉଛି ଯାହା ଘରୋଇ କମ୍ପାନୀଗୁଡିକୁ ବିପଦରେ ପକାଉଛି।
ଏହି କାରଣରୁ ସରକାର ମଧ୍ୟ ଟିକସ ହରାଉଛନ୍ତି। କମ୍ପାନୀଗୁଡିକରେ ଅନୁଶାସନ ପାଇଁ ଟିକସ ସଠିକ ସମାଧାନ ନୁହେଁ, ବରଂ ଟେକ୍ନୋଲୋଜିର ଉତ୍ତମ ବ୍ୟବହାର ଆବଶ୍ୟକ ବୋଲି ସ୍ବାଧୀନ ଥିଙ୍କ ଟ୍ୟାଙ୍କ ଥିଙ୍କ ଚେଞ୍ଜ ଫୋରମ (ଟିସିଏଫ) ଦ୍ୱାରା ଆୟୋଜିତ କାର୍ଯ୍ୟକ୍ରମରେ ବିଶେଷଜ୍ଞମାନେ କହିଛନ୍ତି।
ସରକାରଙ୍କ ଦ୍ୱାରା ଗଠିତ ଏକ ଆନିମେଶନ, ଭିଜୁଆଲ ଇଫେକ୍ଟସ, ଗେମିଂ ଏବଂ କମିକ୍ସ (ଏଭିଜିସି) ପ୍ରମୋଶନ ଟାସ୍କ ଫୋର୍ସ ରିପୋର୍ଟରେ ଏହି କ୍ଷେତ୍ରର ବିକାଶ ପାଇଁ ବଜେଟରେ ବ୍ୟବସ୍ଥା କରିବାକୁ କୁହାଯାଇଛି। ଭାରତରେ, ଅନଲାଇନ ସ୍କିଲ ଆଧାରିତ ଖେଳ (ଓଏସଜି) ହେଉଛି ୨.୫ ବିଲିୟନ ଡଲାରର ଶିଳ୍ପ। ରାଜସ୍ବ ଦୃଷ୍ଟିରୁ ଏହା ୨୦୩୦ ସୁଦ୍ଧା ୨୦ବିଲିୟନ ଡ଼ଲାରରେ ପହଞ୍ଚିବ ବୋଲି ଆଶା କରାଯାଉଛି। ସୁପ୍ରିମକୋର୍ଟର ବରିଷ୍ଠ ଓକିଲ ରୋହନ ଶାହାଙ୍କ କହିବାନୁସାରେ, ଲଟେରୀ ଭଳି ପ୍ରତିଯୋଗିତା ଜିତିବା ପରିବର୍ତ୍ତେ ନିର୍ଦ୍ଦିଷ୍ଟ ସମୟ ମଧ୍ୟରେ ଅନ୍ୟମାନଙ୍କ ସହିତ ପ୍ରତିଦ୍ୱନ୍ଦ୍ୱିତା ହେଉଥିବା ଗେମିଂକୁ ଅଧିକ ଗୁରୁତ୍ୱ ପ୍ରଦାନ କରାଯିବା ଜରୁରୀ।
