ନ୍ୟୁୟର୍କ,୨୪।୩: ମିଳିତ ଜାତିସଂଘରେ ପୁଣି ପାକିସ୍ତାନକୁ ଟାର୍ଗେଟ୍ କରିଛି ଭାରତ। ମାନବ ଅଧିକାର ପରିଷଦ ଅଧିବେଶନରେ ଭାରତ କହିଛି ଯେ, ଗଣତନ୍ତ୍ର ତଥା ମାନବିକ ଅଧିକାର ଉପରେ ପାକିସ୍ତାନଠରୁ ବିଶ୍ୱକୁ ଶିଖିବାର ଆବଶ୍ୟକତା ନାହିଁ। ପାକିସ୍ତାନ ଆତଙ୍କବାଦ ଏବଂ ହିଂସାର ସବୁଠାରୁ ବଡ ରପ୍ତାନିକାରୀ ଦେଶ। ଯେଉଁଠାରେ ଆତଙ୍କବାଦୀମାନେ ଉନ୍ନତି କରନ୍ତି ଏବଂ ରାସ୍ତାରେ ମୁକ୍ତ ଭାବରେ ବୁଲନ୍ତି, ସେହି ଦେଶ ଦୁନିଆକୁ କୌଣସି ଶିକ୍ଷା ଦେଇପାରିବ ନାହିଁ।
ମାନବ ଅଧିକାର ପରିଷଦର ୫୨ତମ ଅଧିବେଶନରେ ରାଇଟ୍ ଅଫ୍ ରିପ୍ଲାଏ ବ୍ୟବହାର କରି ଭାରତର ଅତିରିକ୍ତ ସଚିବ ଡା. ପି.ଆର ତୁଲସୀଦାସ ଭାରତ ବିରୋଧରେ ମିଥ୍ୟା ଏଜେଣ୍ଡା ଚଳାଇବା ଏବଂ ସାମ୍ପ୍ରଦାୟିକ ସୌହାର୍ଦ୍ଦ୍ୟକୁ ଭାଙ୍ଗିବା ପରିବର୍ତ୍ତେ ନିଜ ଦେଶରେ ସଂଖ୍ୟାଲଘୁ ସମ୍ପ୍ରଦାୟର ସୁରକ୍ଷା ବିଷୟରେ ଚିନ୍ତା କରିବାକୁ ପାକିସ୍ତାନକୁ କହିଥିଲେ।
ତୁଲସୀଦାସ କହିଛନ୍ତି ଯେ, ମିଳିତ ଜାତିସଂଘ ଦ୍ୱାରା ଆତଙ୍କବାଦୀ ଘୋଷିତ ହୋଇଥିବା ୧୫୦ ଆତଙ୍କବାଦୀଙ୍କ ପାଇଁ ପାକିସ୍ତାନ ଏକ ଆଶ୍ରୟସ୍ଥଳ। ଏମାନେ ସେଠାରେ ନିର୍ବାଚନ ଲଢିବା ସହିତ ସେଠାରେ ପ୍ରଚାର କରୁଥିବା ଦେଖାଯାଉଛି। ୨୬/୧୧ ମୁମ୍ବାଇ ଆତଙ୍କବାଦୀ ଆକ୍ରମଣର ଅପରାଧୀମାନେ ମୁକ୍ତ ଭାବରେ ବୁଲୁଛନ୍ତି ବୋଲି ପାକିସ୍ତାନ ଅସ୍ବୀକାର କରିପାରିବ କି ନାହିଁ ବୋଲି ସେ ପ୍ରଶ୍ନ କରିଛନ୍ତି।
