ଅହମଦାବାଦ,୨୨।୨(ପି.ଟି.): ସୁସଜ୍ଜିତ ମୋଟେରା ଷ୍ଟାଡିୟମରେ ବୁଧବାରଠାରୁ ଭାରତ ଓ ଭ୍ରମଣକାରୀ ଇଂଲଣ୍ଡ ମଧ୍ୟରେ ତୃତୀୟ ଟେଷ୍ଟ ମ୍ୟାଚ୍ ଆରମ୍ଭ ହେବ। ପିଙ୍କ୍ ବଲ୍ରେ ଖେଳା ଯିବାକୁ ଥିବା ଦିବାରାତ୍ରଭିତ୍ତିକ ଏହି ଟେଷ୍ଟ ମ୍ୟାଚ ଉପରେ ସମସ୍ତଙ୍କ ନଜର ରହିବ। ରବିବାର ଅଧିନାୟକ ବିରାଟ କୋହଲିଙ୍କ ନେତୃତ୍ୱରେ ଭାରତୀୟ ଖେଳାଳିମାନେ ନେଟ୍ ସେସନରେ ବେଶ୍ ଝାଳ ବୁହାଇଛନ୍ତି। ପିଙ୍କ୍ ବଲ୍ ସହିତ ଅଭ୍ୟସ୍ତ ହେବା ପାଇଁ ଖେଳାଳିମାନେ ନେଟ୍ସରେ ପରିଶ୍ରମ କରିଛନ୍ତି। ୪ ମ୍ୟାଚ୍ ବିଶିଷ୍ଟ ଏହି ସିରିଜ ଏବେ ୧-୧ ସମାନ ସ୍ତରରେ ରହିଛି। ଚେନ୍ନାଇରେ ଇଂଲଣ୍ଡ ପ୍ରଥମ ଟେଷ୍ଟରେ ୨୨୭ ରନରେ ବିଜୟୀ ହୋଇଥିବା ବେଳେ ଭାରତ ସମାନ ଭେନ୍ୟୁରେ ଦ୍ୱିତୀୟ ଟେଷ୍ଟରେ ବୃହତ୍ ୩୧୭ ରନରେ ବିଜୟୀ ହୋଇଥିଲା। ସେହିପରି ତୃତୀୟ ଟେଷ୍ଟରେ ବିଜୟୀ ହେବା ପାଇଁ ଭାରତୀୟ ଖେଳାଳିମାନେ ପ୍ରସ୍ତୁତି ଆରମ୍ଭ କରିଛନ୍ତି। ଖେଳାଳିମାନେ ଷ୍ଟ୍ରେଚିଂ ଏକ୍ସରସାଇଜ୍, ଫିଲ୍ଡିଂ ଡ୍ରିଲ୍ସ କରିବା ପରେ ନେଟ୍ସରେ ବ୍ୟାଟିଂ କରିଥିଲେ। ବିଶ୍ୱର ଏହି ସର୍ବବୃହତ୍ ସର୍ଦ୍ଦାର ପଟେଲ ଷ୍ଟାଡିୟମରେ ଏକ ଲକ୍ଷ ୧୦ ହଜାର ଦର୍ଶକ ମ୍ୟାଚ୍ ଉପଭୋଗ କରିପାରିବେ।
କୋହଲିଙ୍କ ସମେତ ଉପଅଧିନାୟକ ଅଜିଙ୍କ୍ୟ ରାହାନେ, ଓପନର ରୋହିତ ଶର୍ମା, ତାରକା ଉଇକେଟକିପର ବ୍ୟାଟ୍ସମ୍ୟାନ ରିଷଭ ପନ୍ତ ନେଟ୍ସରେ ବ୍ୟାଟିଂ କରିଥିଲେ ଏବଂ ଯଶପ୍ରୀତ ବୁମରା ଓ ମହମ୍ମଦ ସିରାଜ ଏମାନଙ୍କୁ ପ୍ରଖର ସୂର୍ଯ୍ୟାଲୋକରେ ବୋଲିଂ କରିଥିଲେ। ବୁମରା ଦ୍ୱିତୀୟ ଟେଷ୍ଟ ଖେଳିପାରି ନ ଥିଲେ। ଫଳରେ ସେ ଏହି ଟେଷ୍ଟରେ ପ୍ରତ୍ୟାବର୍ତ୍ତନ କରିବେ। ସେହିପରି ଅଭିଜ୍ଞ ଈଶାନ୍ତ ଶର୍ମା ୧୦୦ତମ ଟେଷ୍ଟ ଖେଳିବାର ନିକଟବର୍ତ୍ତୀ ହୋଇଛନ୍ତି। ସେ ମଧ୍ୟ ଅଭ୍ୟାସ କରୁଥିବା ଦେଖାଯାଇଥିଲା।
ପ୍ରଥମ ଦୁଇଟି ଟେଷ୍ଟରେ ସ୍ପିନରମାନେ ବେଶ୍ ସଫଳ ହୋଇଥିଲେ। ତେବେ କୋଲକାତାରେ ଅନୁଷ୍ଠିତ ବାଂଲାଦେଶ ବିପକ୍ଷ ପିଙ୍କ୍ ବଲ୍ ଟେଷ୍ଟରେ ଭାରତୀୟ ଦ୍ରୁତ ବୋଲରମାନେ ସବୁ ୨୦ଟି ଯାକ ଉଇକେଟ ଅକ୍ତିଆର କରି ଦଳକୁ ଜିତାଇଥିଲେ। ସେହିପରି ଓପନର ଶୁବମନ ଗିଲ୍ ଓ ମୟଙ୍କ ଅଗ୍ରଓ୍ବାଲ ମଧ୍ୟ ନେଟ୍ସରେ ବ୍ୟାଟିଂ କରିଥିଲେ। ସେହିପରି ସ୍ପିନର ରବିଚନ୍ଦ୍ରନ ଅଶ୍ୱିନ, ଅକ୍ଷର ପଟେଲ ଓ କୁଲଦୀବ ଯାଦବ ମଧ୍ୟ ବୋଲିଂ କରିଥିଲେ। ଭାରତ ଓ ଇଂଲଣ୍ଡ ଉଭୟ ପୂରାଦମ୍ରେ ଅଭ୍ୟାସ ଆରମ୍ଭ କରିଛନ୍ତି। ଦୁଇ ଦଳର ଖେଳାଳିମାନେ ଷ୍ଟାଡିୟମ ବୁଲି ଦେଖିଥିଲେ ଓ ଡ୍ରେସିଂ ରୁମ୍ ସହିତ ଜିମ୍ ମଧ୍ୟ ଜଡିତ ହୋଇ ରହିଛି। ଷ୍ଟାଡିୟମ ଉଦ୍ଘାଟନ କରିବା ପରେ ଅଧ୍ୟକ୍ଷ ରାମନାଥ କୋବିନ୍ଦ ଓ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ମ୍ୟାଚ୍ ଦେଖିବାର କାର୍ଯ୍ୟକ୍ରମ ରହିଛି। ଏହି ଷ୍ଟାଡିୟମରେ ଉପଲବ୍ଧ ସୁବିଧା ସୁଯୋଗ ତଥା ଭିତ୍ତିଭୂମିକୁ ସବୁ କ୍ରିକେଟରମାନେ ପ୍ରଶଂସା କରିଛନ୍ତି। କ୍ରିକେଟରମାନଙ୍କ ଏହି ଟ୍ରେନିଂ ଭିଡିଓକୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ବିଭିନ୍ନ ସୋସିଆଲ ମିଡିଆରେ ଶେୟାର କରିଛି।
