ନୂଆଦିଲ୍ଲୀ,୨୨।୨: ଓରିଏଣ୍ଟାଲ ଇନ୍ସ୍ୟୁରାନ୍ସ କିମ୍ବା ୟୁନାଇଟେଡ୍ ଇଣ୍ଡିଆ ଇନ୍ସ୍ୟୁରାନ୍ସ କମ୍ପାନୀର ଘରୋଇକରଣକୁ ସରକାର ବିଚାର କରିପାରନ୍ତି। ଏହି କମ୍ପାନୀଗୁଡ଼ିକୁ ପୁଞ୍ଜି ଯୋଗାଣ କରାଯାଇଛି। ବର୍ତ୍ତମାନ ଏହି କମ୍ପାନୀଗୁଡ଼ିକର ଆର୍ଥତ୍କ ସ୍ଥିତିରେ ପୂର୍ବାପେକ୍ଷା ଉନ୍ନତି ଆସିଛି। କମ୍ପାନୀଗୁଡ଼ିକର ଆର୍ଥତ୍କ ସ୍ଥିତିକୁ ଉନ୍ନତ କରିବା ଲାଗି ସରକାର ପୁଣିଥରେ ୩ ହଜାର କୋଟି ଟଙ୍କାର ପୁଞ୍ଜି ଯୋଗାଣ କରିପାରନ୍ତି। ଆର୍ଥତ୍କ ସ୍ଥିତି ସୁଧୁରୁଥିବାରୁ ଘରୋଇକ୍ଷେତ୍ରର ଦୃଷ୍ଟି ଆକର୍ଷଣ କରିବା ଲାଗି କମ୍ପାନୀଗୁଡ଼ିକ ସକ୍ଷମ ହେବେ ବୋଲି ପ୍ରକ୍ରିୟା ସହ ଜଡିତ ଜଣେ ଅଧିକାରୀ କହିଛନ୍ତି। ଏକ ଯୋଗ୍ୟ କମ୍ପାନୀ ଖୋଜିବା ପ୍ରକ୍ରିୟା ସରକାର ଆରମ୍ଭ କରିଛନ୍ତି। ଏଥିଲାଗି କିଛି ସମୟ ଲାଗିପାରେ।
ସେହିଭଳି ନିୟୁ ଇଣ୍ଡିଆ ଆସ୍ୟୁରାନ୍ସ କମ୍ପାନୀକୁ ପୁଞ୍ଜି ବଜାରରେ ପଞ୍ଜୀକୃତ କରିବାର ମଧ୍ୟ ସମ୍ଭାବନା ରହିଛି। ଏଥିରେ ସରକାରଙ୍କ ୮୫.୪୪% ଅଂଶଧନ ରହିଛି। ଘରୋଇକରଣ ପଦକ୍ଷେପ ଉପରେ ନୀତି ଆୟୋଗ ସରକାରଙ୍କୁ ବିଭିନ୍ନ ପ୍ରସ୍ତାବ ଦେବ। ଅର୍ଥ ମନ୍ତ୍ରଣାଳୟ ଅଧୀନ ନିବେଶ ଏବଂ ରାଷ୍ଟ୍ରାୟତ୍ତ ସମ୍ପତ୍ତି ପରିଚାଳନା ବିଭାଗ(ଦୀପମ) ଏହି କାର୍ଯ୍ୟକ୍ରମକୁ ଆଗକୁ ବଢାଇବ। ବଜେଟରେ ଅର୍ଥମନ୍ତ୍ରୀ ନିର୍ମଳା ସୀତାରାମନ ୨ ରାଷ୍ଟ୍ରାୟତ୍ତ ଏବଂ ଗୋଟିଏ ବୀମା କମ୍ପାନୀର ଘରୋଇକରଣ ସମ୍ପର୍କରେ ଘୋଷଣା କରିଥିଲେ। ଅଂଶଧନ ବିକ୍ରିରୁ ୧.୭୫ ଲକ୍ଷକୋଟି ଟଙ୍କା ସଂଗ୍ରହ ନେଇ ସରକାର ଲକ୍ଷ୍ୟ ରଖିଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବସିଥିବା କ୍ୟାବିନେଟ ବୈଠକରେ ନ୍ୟାଶନାଲ ଇନ୍ସ୍ୟୁରାନ୍ସ, ଓରିଏଣ୍ଟାଲ ଇନ୍ସ୍ୟୁରାନ୍ସ ଏବଂ ୟୁନାଇଟେଡ ଇଣ୍ଡିଆ ଇନ୍ସ୍ୟୁରାନ୍ସକୁ ପୁଞ୍ଜି ଯୋଗାଣ ନେଇ ନିଷ୍ପତ୍ତି ନିଆଯାଇଥିଲା। ସେହିଭଳି ଏହି କମ୍ପାନୀଗୁଡ଼ିକରେ ଅଧିକୃତ ଶେୟାର କ୍ୟାପିଟାଲ ବଢାଇବା ଦିଗରେ ମଧ୍ୟ ପଦକ୍ଷେପ ନିଆଯିବ ବୋଲି ନିଷ୍ପତ୍ତି ହୋଇଥିଲା। ଘରୋଇକରଣ କାର୍ଯ୍ୟକ୍ରମକୁ ସରକାର ବର୍ତ୍ତମାନ ବଢାଇଥିବା ଜଣାପଡିଛି।
