ନୂଆଦିଲ୍ଲୀ,୨୪।୧୨ : ବ୍ରିଟେନର ଶକ୍ତିି କମ୍ପାନୀ କେୟର୍ନ ବିରୋଧରେ ଅନ୍ତର୍ଜାତୀୟ ଆର୍ବିଟ୍ରେଶନ ଟ୍ରିବ୍ୟୁନାଲରେ ଚାଲିଥିବା ଟିକସ ମାମଲାରେ ଭାରତକୁ ମଙ୍ଗଳବାର ବଡ଼ ଝଟ୍କା ଲାଗିଛି। ଉକ୍ତ କମ୍ପାନୀକୁ ୧.୪ ବିଲିୟାନ ଡଲାର (ପ୍ରାୟ ୮ ହଜାର କୋଟି ଟଙ୍କା) କ୍ଷତିପୂରଣ ଦେବାକୁ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦିଆଯାଇଛି। ଏହାସହ ସରକାରଙ୍କ ନିକଟରେ ଥିବା କମ୍ପାନୀର ଅର୍ଥ ସୁଧ ସହ ଫେରାଇବାକୁ ମଧ୍ୟ କୁହାଯାଇଛି।
ଭୋଡାଫୋନ୍ଠାରୁ ପରାଜୟର ଠିକ୍ ୩ ମାସ ପରେ ଆଉ ଏକ ମାମଲାରେ କେନ୍ଦ୍ର ସରକାର ହାରିଯାଇଛନ୍ତି। ହେଗ୍ସ୍ଥିତ ଇଣ୍ଟରନ୍ୟାଶନାଲ କୋର୍ଟ ଅଫ୍ ଜଷ୍ଟିସ୍ (ଆଇସିଜେ) କହିଛନ୍ତି, କେୟର୍ନ ଟିକସ ମାମଲା ଏକ ଟିକସଜନିତ ବିବାଦ ନୁହେଁ। ଏହା ଟିକସଜନିତ ନିବେଶ ହୋଇଥିବାରୁ କୋର୍ଟଙ୍କ ପରିସରରେ ଆସୁଛି। ଭାରତ କିଛି ବର୍ଷ ଧରି ଟିକସ ଲାଗି ଯେଉଁ ଦାବି ଉଠାଇ ଆସୁଛି, ତାହା ଦ୍ୱିପାକ୍ଷିକ ନିବେଶ ସୁରକ୍ଷା ଚୁକ୍ତିର ସଫଳ ରୂପାୟନର ବିରୁଦ୍ଧାଚରଣ କରୁଛି। ୨୦୦୬-୦୭ରେ କେୟର୍ନ ଏହାର ଭାରତ ବାଣିଜ୍ୟର ପୁନର୍ଗଠନ ପରେ କ୍ୟାପିଟାଲ ଗେନ୍ସ ଭାବେ ହାସଲ କରିଥିବା ଅର୍ଥ ଉପରେ ୨୪,୫୦୦ କୋଟି ଟଙ୍କାର ଟିକସ ଡିମାଣ୍ଡ ରଖିଥିଲା। ଏହି ମାମଲାର ରାୟରେ କେୟର୍ନକୁ ୮ ହଜାର କୋଟି ଟଙ୍କା ଦେବାକୁ କୁହାଯାଇଛି। ଏହା ମଧ୍ୟରେ ଭାରତ ସରକାର ଜବତ କରିଥିବା ଶେୟାର ମଧ୍ୟ ସାମିଲ ରହିଛି। ସୂଚନାଯୋଗ୍ୟ, ଭାରତ ସରକାର କେୟର୍ନର ଟିକସ ରିଫଣ୍ଡ ରୋକିଦେଇଛନ୍ତି। ଡିଭିଡେଣ୍ଡକୁ ଜବତ କରାଯାଇଛି। ସେହିଭଳି ବକେୟା ଟିକସ ପାଇବା ଲାଗି କିଛି ଶେୟାରକୁ ବିକ୍ରି ମଧ୍ୟ କରାଯାଇଛି। ଏହି ମାମଲାରେ ଅପିଲ କରିବା ଲାଗି ଭାରତ ସରକାରଙ୍କ ନିକଟରେ ବିକଳ୍ପ ଏବେ ଯାଏ ମଧ୍ୟ ବନ୍ଦ ହୋଇନାହିଁ।
କ’ଣ ରହିଥିଲା ମାମଲା
ଭାରତ ସରକାର ଭୋଡାଫୋନଠାରୁ ୩ ବିଲିୟନ ଡଲାରର ଟିକସ ଡିମାଣ୍ଡ ରଖିଥିଲେ। ଏହାକୁ ଅନ୍ତର୍ଜାତୀୟ ଆର୍ବିଟ୍ରେଶନ ଖାରଜ କରିଦେଇଛନ୍ତି। ୨୦୧୨ ବଜେଟରେ ସରକାର ରେଟ୍ରୋସ୍ପେକ୍ଟିଭ ଟିକସ ଲାଗୁ କରିଥିଲେ। ଏହାଦ୍ୱାରା ୧୯୬୨ ପରେ କମ୍ପାନୀର ସମ୍ପତ୍ତି ଭାରତରେ ରହିଥିଲେ କୌଣସି ମିଶ୍ରଣ ଏବଂ ଅଧିଗ୍ରହଣ କ୍ଷେତ୍ରରେ ଟିକସ ପ୍ରଦାନ କରିବା ଅନିବାର୍ଯ୍ୟ ହୋଇଥିଲା।
