ନୂଆଦିଲ୍ଲୀ,୫।୩: ପୁଣି ଥରେ ପଡ଼ିଆକୁ ଓହ୍ଲାଇବାକୁ ଯାଉଛନ୍ତି ଭାରତର ପୂର୍ବ ମହାନ କ୍ରିକେଟର ସଚିନ ତେନ୍ଦୁଲକର, ବିରେନ୍ଦ୍ର ସେହଓ୍ବାଗ, ଯୁବରାଜ ସିଂହ, ଜାହିର ଖାନ୍ ପ୍ରମୁଖ। ରୋଡ୍ ସେଫ୍ଟି ସିରିଜ ଆରମ୍ଭ ହେବାକୁ ଯାଉଥିବା ବେଳେ ଅନେକ ପୂର୍ବ ଭାରତୀୟ ଖେଳାଳି ଏଥିରେ ନଜର ଆସିବେ। ଶୁକ୍ରବାର ଖେଳାଯିବାକୁ ଥିବା ମ୍ୟାଚ୍ରେ ଇଣ୍ଡିଆ ଲିଜେଣ୍ଡ୍ସଙ୍କ ମୁକାବିଲା ବାଂଲାଦେଶ ଲିଜେଣ୍ଡ୍ସଙ୍କ ସହ ହେବ। ଏହି ସିରିଜର ଉଦ୍ଦେଶ୍ୟ ଟ୍ରାଫିକ୍ ନିୟମକୁ ନେଇ ଲୋକମାନଙ୍କ ମଧ୍ୟରେ ସଚେତନତା ସୃଷ୍ଟି କରିବା ରହିଛି।
ଇଣ୍ଡିଆ ଲିଜେଣ୍ଡ୍ସର ନେତୃତ୍ୱ ସଚିନ ନେଉଥିବା ବେଳେ ବାଂଲାଦେଶ ଲିଜେଣ୍ଡ୍ସ ଟିମ୍ର ଅଧିନାୟକ ରହିବେ ମହମ୍ମଦ ରଫିକ୍। ଏହି ଦୁଇଟି ଟିମ୍ ବ୍ୟତିତ ସିରିଜରେ ଶ୍ରୀଲଙ୍କା ଲିଜେଣ୍ଡ୍ସ, ସାଉଥ୍ ଆଫ୍ରିକା ଲିଜେଣ୍ଡ୍ସ, ଓ୍ବେଷ୍ଟଇଣ୍ଡିଜ୍ ଲିଜେଣ୍ଡ୍ସ ଏବଂ ଇଂଲଣ୍ଡ ଲିଜେଣ୍ଡ୍ସ ଟିମ୍ ରହିଛି। ଏସବୁ ଟିମ୍ରେ ପ୍ରାକ୍ତନ ଖେଳାଳିମାନଙ୍କୁ ଦେଖିବାକୁ ମିଳିବ।
ଗତ ବର୍ଷରୁ ଏହି ସିରିଜ୍ ଆରମ୍ଭ ହୋଇଥିଲା। ହେଲେ କୋଭିଡ-୧୯ ମହାମାରୀ ଯୋଗୁ ଟୁର୍ନାମେଣ୍ଟକୁ ସ୍ଥଗିତ କରିଦିଆଯାଇଥିଲା। ଏହାର ମାତ୍ର ୪ ମ୍ୟାଚ୍ ଆୟୋଜନ କରାଯାଇପାରିଥିଲା। ଏବେ ଇଣ୍ଡିଆ ଲିଜେଣ୍ଡ ଟିମ୍ ସିରିଜ ପାଇଁ ପ୍ରସ୍ତୁତି ଶେଷ କରିଛି। ଟିମ୍ରେ ସଚିନ, ସେହଓ୍ବାଗ, ଯୁବରାଜ, ୟୁସୁଫ ପଠାନ, ନମନ ଓଝା(ଉଇକେଟକିପର), ଜାହିର, ମୁନାଫ ପଟେଲ, ଇରଫାନ୍ ପଠାନ, ମନପ୍ରିତ ସିଂହ ଗୋନି ଏବଂ ନୋଏଲ ଡେଭିଡ, ପ୍ରଜ୍ଞାନ ଓଝା ଆଦି ରହିଛନ୍ତି।
କେଉଁଠି ଖେଳାଯିବ ଏହି ମ୍ୟାଚ୍: ଛତିଶଗଡ଼ ରାୟପୁରସ୍ଥିତ ଶହିଦ ବୀର ନାରାୟଣ ସିଂହ ଅନ୍ତଃରାଷ୍ଟ୍ରୀୟ କ୍ରିକେଟ ଷ୍ଟାଡିୟମରେ ଏହି ମ୍ୟାଚ୍ ଖେଳାଯିବ।
କେଉଁଠି ଦେଖିପାରିବେ ମ୍ୟାଚ୍: ଏହି ସିରିଜର ସମସ୍ତ ମ୍ୟାଚ୍ର ସିଧାପ୍ରସାରଣ ଆଜିଠାରୁ ୨୧ ମାର୍ଚ୍ଚ ପର୍ଯ୍ୟନ୍ତ ସନ୍ଧ୍ୟା ୭ଟାରୁ ଦେଖିହେବ। କଲର୍ସ ସିନେପ୍ଲେକ୍ସ, କଲର୍ସ ୪ କନ୍ନଡା ସିନେମା, ରିସ୍ତେ ସିନେପ୍ଲେକ୍ସରେ ଏହାକୁ ଦେଖିବାକୁ ମିଳିବ।
ପୂର୍ଣ୍ଣ ସିରିଜ କାର୍ଯ୍ୟସୂଚୀ:
ମାର୍ଚ୍ଚ ୫ – ଇଣ୍ଡିଆ ଲିଜେଣ୍ଡ୍ସ ବା ବାଂଲାଦେଶ ଲିଜେଣ୍ଡ୍ସ
୬ ମାର୍ଚ୍ଚ – ଶ୍ରୀଲଙ୍କା ଲିଜେଣ୍ଡ୍ସ ବନାମ ୱେଷ୍ଟଇଣ୍ଡିଜ ଲିଜେଣ୍ଡ୍ସ
୭ ମାର୍ଚ୍ଚ – ଇଂଲଣ୍ଡ ଲିଜେଣ୍ଡ୍ସ ବା ବାଂଲାଦେଶ ଲିଜେଣ୍ଡ୍ସ
ମାର୍ଚ୍ଚ ୮ – ଦକ୍ଷିଣ ଆଫ୍ରିକା ଲିଜେଣ୍ଡ୍ସ ବନାମ ଶ୍ରୀଲଙ୍କା ଲିଜେଣ୍ଡ୍ସ
ମାର୍ଚ୍ଚ ୯ – ଇଣ୍ଡିଆ ଲିଜେଣ୍ଡ୍ସ ବନାମ ଇଂଲଣ୍ଡ ଲିଜେଣ୍ଡ୍ସ
୧୦ ମାର୍ଚ୍ଚ – ବାଂଲାଦେଶ ଲିଜେଣ୍ଡ୍ସ ବନାମ ଶ୍ରୀଲଙ୍କା ଲିଜେଣ୍ଡ୍ସ
୧୧ ମାର୍ଚ୍ଚ – ଇଂଲଣ୍ଡ ଲିଜେଣ୍ଡ୍ସ ବନାମ ଦକ୍ଷିଣ ଆଫ୍ରିକା ଲିଜେଣ୍ଡ୍ସ
ମାର୍ଚ୍ଚ ୧୨ – ବାଂଲାଦେଶ ଲିଜେଣ୍ଡ୍ସ ବନାମ ୱେଷ୍ଟଇଣ୍ଡିଜ ଲିଜେଣ୍ଡ୍ସ
ମାର୍ଚ୍ଚ ୧୩ – ଇଣ୍ଡିଆ ଲିଜେଣ୍ଡ୍ସ ବନାମ ଦକ୍ଷିଣ ଆଫ୍ରିକା ଲିଜେଣ୍ଡ୍ସ
୧୪ ମାର୍ଚ୍ଚ – ଶ୍ରୀଲଙ୍କା ଲିଜେଣ୍ଡ୍ସ ବନାମ ଇଂଲଣ୍ଡ ଲିଜେଣ୍ଡ୍ସ
୧୫ ମାର୍ଚ୍ଚ – ଦକ୍ଷିଣ ଆଫ୍ରିକା ଲିଜେଣ୍ଡ୍ସ ବନାମ ବାଂଲାଦେଶ ଲିଜେଣ୍ଡ୍ସ
୧୬ ମାର୍ଚ୍ଚ – ଇଂଲଣ୍ଡ ଲିଜେଣ୍ଡ୍ସ ବନାମ ୱେଷ୍ଟଇଣ୍ଡିଜ ଲିଜେଣ୍ଡ୍ସ
ମାର୍ଚ୍ଚ ୧୭ – ପ୍ରଥମ ସେମିଫାଇନାଲ
।ମାର୍ଚ୍ଚ ୧୯ – ଦ୍ୱିତୀୟ ସେମିଫାଇନାଲ
ମାର୍ଚ୍ଚ ୨୧ – ଫାଇନାଲ ।
