ପ୍ରତିରକ୍ଷା ଉପକରଣ ନିର୍ମାଣ କରିବାକୁ ଭାରତ ସକ୍ଷମ, ଅନ୍ୟଦେଶକୁ ରପ୍ତାନୀ ୨୦୨୫ ସୁଦ୍ଧା ଟପିବ ୩୫ ହଜାର କୋଟି…

ନୂଆଦିଲ୍ଲୀ, ୨୭।୯ : ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଭାରତୀୟ ପ୍ରତିରକ୍ଷା ଶିଳ୍ପକୁ ଆଧୁନିକ ତଥା ବ୍ୟୟବହୁଳ ଉତ୍ପାଦ ପ୍ରସ୍ତୁତ କରିବାକୁ କହିଛନ୍ତି। ଯାହା ଦ୍ୱାରା ସରକାରଙ୍କ ନୂତନ ଭାରତ ଗଠନର ଲକ୍ଷ୍ୟ ହାସଲ ହୋଇପାରିବ ବୋଲି ସେ କହିଛନ୍ତି। ରାଜନାଥ କହିଛନ୍ତି ଯେ ଆମେ କେବଳ ନିଜର ଆବଶ୍ୟକତା ନୁହେଁ ଅନ୍ୟ ଦେଶର ଆବଶ୍ୟକତା ମଧ୍ୟ ପୂରଣ କରିପାରିବୁ। ମଙ୍ଗଳବାର ଭାରତୀୟ ପ୍ରତିରକ୍ଷା ଉତ୍ପାଦକଙ୍କ ସୋସାଇଟିର ୫ତମ ବାର୍ଷିକ ଅଧିବେଶନକୁ ସମ୍ବୋଧିତ କରିବାବେଳେ ଏହି କଥା କହିଛନ୍ତି।

ସର୍ବଦା ବିକଶିତ ହେଉଥିବା ବିଶ୍ୱସ୍ତରୀୟ ପରିସ୍ଥିତି ସମଗ୍ର ବିଶ୍ୱରେ ସାମରିକ ଉପକରଣର ଚାହିଦା ବଢ଼ାଇଛି। ଦେଶଗୁଡିକ ନୂତନ ଆହ୍ବାନର ମୁକାବିଲା କରିବା ପାଇଁ ସେମାନଙ୍କର ସୁରକ୍ଷା ଉପକରଣକୁ ମଜବୁତ କରିବା ଉପରେ ଗୁରୁତ୍ୱାରୋପ କରୁଛନ୍ତି।

ଷ୍ଟକହୋମ ଅନ୍ତର୍ଜାତୀୟ ଶାନ୍ତି ଅନୁସନ୍ଧାନ ପ୍ରତିଷ୍ଠାନ ପକ୍ଷରୁ ନିକଟରେ ପ୍ରକାଶିତ ରିପୋର୍ଟ ଅନୁଯାୟୀ, ୨୦୨୧ ମସିହାରେ ବିଶ୍ୱର ସାମରିକ ଖର୍ଚ୍ଚ ପ୍ରଥମ ଥର ପାଇଁ ୨ ଟ୍ରିଲିୟନ ଡଲାର ଅତିକ୍ରମ କରିଛି। ଭାରତର ସଶସ୍ତ୍ର ବାହିନୀ ମଧ୍ୟ ପୁଞ୍ଜି କ୍ରୟ ପାଇଁ ବହୁ ବିନିଯୋଗ କରିଛି। ଏହା ଦର୍ଶାଉଛି ଯେ ବିଶ୍ୱର ସୁରକ୍ଷା ଆବଶ୍ୟକତା ବଢ଼ିବାକୁ ଯାଉଛି। ଗୁଣାତ୍ମକ ତଥା ବ୍ୟୟ-ପ୍ରଭାବଶାଳୀ ଦୃଷ୍ଟିରୁ ଭାରତ ସେହି ଆବଶ୍ୟକତା ପୂରଣ କରିବାରେ ସକ୍ଷମ।

ପ୍ରତିରକ୍ଷା ଉତ୍ପାଦନରେ ବେସରକାରୀ କ୍ଷେତ୍ରର ଅଂଶଗ୍ରହଣକୁ ବୃଦ୍ଧି କରିବା ପାଇଁ ଏନଡିଏ ସରକାର ଗତ କିଛି ବର୍ଷ ମଧ୍ୟରେ କରିଥିବା ସଂସ୍କାର ଭାରତୀୟ ସଂସ୍ଥାମାନଙ୍କ ପାଇଁ ଏକ ଭଲ ପରିବେଶ ସୃଷ୍ଟି କରିଛି। ୩୧୦ ଅସ୍ତ୍ରଶସ୍ତ୍ର ଏବଂ ସିଷ୍ଟମର ତିନୋଟି ତାଲିକାର ପ୍ରକାଶନ ସହିତ ଯାହା ସ୍ଥାନୀୟ ଭାବରେ ଉତ୍ପାଦିତ ହେଉଥିବାବେଳେ ଏହାର ଆମଦାନୀ ହେଉନାହିଁ। ସାତରୁ ଆଠ ବର୍ଷ ପୂର୍ବେ ଭାରତର ପ୍ରତିରକ୍ଷା ରପ୍ତାନି ୧୦୦୦ କୋଟି ଟଙ୍କା ନଥିଲା। ତେବେ ବର୍ତ୍ତମାନ, ଏହା ୧୩,୦୦୦ କୋଟି ଅତିକ୍ରମ କରିଛି।ଆମେ ୨୦୨୫ ସୁଦ୍ଧା ୧.୭୫ ଲକ୍ଷ କୋଟି ଟଙ୍କାର ପ୍ରତିରକ୍ଷା ଉତ୍ପାଦନ ଲକ୍ଷ୍ୟ ସ୍ଥିର କରିଛୁ। ଯେଉଁଥିରେ ୩୫,୦୦୦ କୋଟିର ରପ୍ତାନି ଅନ୍ତର୍ଭୁକ୍ତ।

ରାଷ୍ଟ୍ର ଯେତେ ଧନୀ ହେଉ ନା କାହିଁକି, ଜାତୀୟ ସୁରକ୍ଷା ସୁନିଶ୍ଚିତ ନହେଲେ ଏହାର ସମୃଦ୍ଧି ବିପଦରେ ପଡ଼ିଥାଏ। ଭାରତକୁ ବିଶ୍ୱର ସବୁଠାରୁ ଶକ୍ତିଶାଳୀ ଦେଶ ଭାବେ ପରିଣତ କରିବା ପାଇଁ ଆମେ ଜାତୀୟ ସୁରକ୍ଷା ଏବଂ ଆର୍ଥିକ ସମୃଦ୍ଧି ଉପରେ ଧ୍ୟାନ ଦେଇଛୁ।