ନୂଆଦିଲ୍ଲୀ,୮।୯: ଭାରତ-ଚାଇନା ସୀମାରେ ପୁଣି ଥରେ ଉତ୍ତେଜନା ଦେଖାଦେଇଛି। ସୋମବାର ବିଳମ୍ବିତ ରାତିରେ ଲାଇନ ଅଫ ଆକ୍ଚୁଆଲ କଣ୍ଟ୍ରୋଲ (ଏଲଏସି)ରେ ଭାରତ-ଚାଇନା ସେନା ମଧ୍ୟରେ ଗୁଳି ବିନିମୟ ଘଟିଥିବା ସୂଚନା ମିଳିଛି। ଜୁନ ୧୫ରେ ଗଲଓ୍ବାନ ଘାଟିରେ ହୋଇଥିବା ହିଂସାତ୍ମକ ସଂଘର୍ଷ ପରଠାରୁ ଦୁଇ ଦେଶ ମଧ୍ୟରେ ପରିସ୍ଥିତି ସ୍ବାଭାବିକ କରିବା ପାଇଁ ଆଲୋଚନା ଚାଲିଛି, କିନ୍ତୁ ଏପର୍ଯ୍ୟନ୍ତ କୌଣସି ଫଳାଫଳ ମିଳିପାରିନାହିଁ। ଏସବୁ ଭିତରେ ବୈଦେଶିକ ମନ୍ତ୍ରୀ ଏସ. ଜୟଶଙ୍କର ରୁଷ୍ ଗସ୍ତ ଗସ୍ତରେ ଯାଉଛନ୍ତି। ସେଠାରେ ସେ ଚାଇନା ବୈଦେଶିକ ମନ୍ତ୍ରୀ ୱାଙ୍ଗ ୟିଙ୍କୁ ଭେଟି ସୀମା ବିବାଦ ଉପରେ ଆଲୋଚନା କରିବାର କାର୍ଯ୍ୟକ୍ରaମ ରହିଛି। ଏହା ପୂର୍ବରୁ ଜୟଶଙ୍କର କହିଛନ୍ତି, ଏଲ୍ଏସିରେ ପରିସ୍ଥିତି ଅତ୍ୟନ୍ତ ଜଟିଳ। ଉଭୟ ଦେଶ ମଧ୍ୟରେ ଏହାକୁ ନେଇ ଆଲୋଚନା କରିବା ନିହାତି ଆବଶ୍ୟକ ହୋଇପଡିଛି। ଜୟଶଙ୍କର କହିଛନ୍ତି ଯେ ଯଦି ସୀମାରେ ଶାନ୍ତି ଏବଂ ସ୍ଥିରତା ନ ଥାଏ, ତେବେ ସମ୍ପର୍କର ଅନ୍ୟ ଦିଗଗୁଡିକ ସ୍ବଭାବିକ ହୋଇପାରିବ ନାହିଁ। ଗତ ୩୦ ବର୍ଷର ଇତିହାସକୁ ନଜର ପକାଇଲେ ସୀମାରେ ଶାନ୍ତି ଏବଂ ସ୍ଥିରତା ରହିଥିଲା। ସେଠାରେ ମଧ୍ୟ କିଛି ସମସ୍ୟା ଥିଲା। କିନ୍ତୁ ଏବେ ପରିସ୍ଥିତି ବଦଳିଛି ବୋଲି ସେ କହିଛନ୍ତି। ସୂଚନାଯୋଗ୍ୟ, ବୈଦେଶିକ ମନ୍ତ୍ରୀଙ୍କ ଏସସିଓ ସ୍ତରୀୟ ବୈଠକରେ ଯୋଗଦେବା ପାଇଁ ଜୟଶଙ୍କର ରୁଷ ଗସ୍ତ କରୁଛନ୍ତି। ଏହି ବୈଠକ ୯ରୁ ୧୧ ସେପ୍ଟେମ୍ବର ପର୍ଯ୍ୟନ୍ତ ହେବ। ମେ ମାସରେ ଲଦାଖରେ ବିବାଦ ପରେ ରୁଷରେ ଚାଇନା ବୈଦେଶିକ ମନ୍ତ୍ରୀ ୱାଙ୍ଗ ୟିଙ୍କ ସହ ଏହା ଜୟଶଙ୍କରଙ୍କ ପ୍ରଥମ ସାକ୍ଷାତ ହୋଇପାରେ।
