ନୂଆଦିଲ୍ଲୀ,୬।୭ : ଚାଇନା ଉପରେ ନିର୍ଭରତାକୁ ଦେଖି ଅନେକ ବିଶେଷଜ୍ଞ କୁହନ୍ତି ଯେ ବର୍ତ୍ତମାନ ସ୍ଥିତିରେ ଭାରତ ଆତ୍ମନିର୍ଭର ହେବା ଏକ କଷ୍ଟସାଧ୍ୟ ବ୍ୟାପାର। ହେଲେ ଶିଳ୍ପ ସଂଘ ଆସୋଚାମ ଘରୋଇ ବଜାରକୁ ଆତ୍ମନିର୍ଭର କରାଇବା ଲାଗି ନୂଆ ଆଶାର କିରଣ ଦେଖାଇଛି। ଏଥିଲାଗି ଆସୋଚାମ ୧୫ ସୂତ୍ରୀ ଏଜେଣ୍ଡା ପ୍ରଦାନ କରିଥିବା ଜଣାପଡିଛି। ଯଦି ଭାରତ ଚାଇନା ବଜାରରୁ ୧୫ ବଡ଼ ଆମଦାନୀକୁ ଘରୋଇ ବଜାରରେ ଉତ୍ପାଦନ କରିବା ଲାଗି ଧ୍ୟାନଦିଏ ତେବେ ଆତ୍ମନିର୍ଭର ହେବାକୁ କେହି ଅଟକାଇ ପାରିବେ ନାହିଁ ବୋଲି ରିପୋର୍ଟରେ କୁହାଯାଇଛି। ସେହି ମୁତାବକ ଭାରତ ଉତ୍ପାଦନ କ୍ଷମତା ଦେଶରେ ବଢ଼ିଲେ ଚାଇନାକୁ ଏକ ଶକ୍ତ ଧକ୍କାଦେବାକୁ ଭାରତ ସକ୍ଷମ ହୋଇପାରିବ। ଏହି ଶିଳ୍ପ ସଂଘ ଏମିତି ୧୫ ଉତ୍ପାଦକୁ ଚିହ୍ନଟ କରିଛି ଯାହାର ଘରୋଇ ଉତ୍ପାଦନ ବଢାଇବାକୁ ହେବ। ଘରୋଇ ଉତ୍ପାଦନ ବଢାଇ ଆଗାମୀ ୩ ବର୍ଷ ମଧ୍ୟରେ ଆତ୍ମନିର୍ଭର ଭାରତର ଲକ୍ଷ୍ୟ ହାସଲ କରାଯାଇପାରେ।
ଏହି ଉତ୍ପାଦଗୁଡିକ ମଧ୍ୟରେ ଇଲେକ୍ଟ୍ରୋନିକ୍ସ, କୋଇଲା, ଲୁହା ଚାଦର, ଅଣ ଲୌହ ଧାତୁ ଏବଂ ବନସ୍ପତି ତେଲ ସହ ଅନ୍ୟ ସାମଗ୍ରୀ ସାମିଲ ରହିଛି। ଭାରତ ପ୍ରତି ମାସରେ ପ୍ରାୟ ୫ ବିଲିୟନ ଡଲାରର ଇଲେକ୍ଟ୍ରୋନିକ୍ସ ସାମଗ୍ରୀ ଆମଦାନୀ କରୁଛି। ଏହା ମଧ୍ୟରେ ଚାଇନାର ଏକ ବୃହତ୍ ଅଂଶ ରହିଛି। ସେହିଭଳି କେବଳ ଇଲେକ୍ଟ୍ରୋନିକ୍ସ ପାର୍ଟସର ୪୩% ଚାଇନାରୁ ଆମଦାନୀ ହେଉଛି। ଚଳିତ ବର୍ଷ ମେ ମାସରେ ଚାଇନାରୁ ୨.୮ ବିଲିୟନ ଡଲାରର ଇଲେକ୍ଟ୍ରୋନିକ୍ସ ସାମଗ୍ରୀ ଆମଦାନୀ ହୋଇଛି। ଏଥିଲାଗି ବହୁଳ ପରିମାଣର ବିଦେଶୀ ମୁଦ୍ରା ଖର୍ଚ୍ଚ କରିବାକୁ ପଡୁଛି। ଆସୋଚାମ ମହାସଚିବ ଦୀପକ ସୁଦ କହିଛନ୍ତି ଯେ, ସରକାରଙ୍କ ପକ୍ଷରୁ ଗ୍ରହଣ କରାଯାଇଥିବା ପ୍ରୋତ୍ସାହନ ଯୋଜନା ଲାଭ ଦେଇପାରେ। ଏ ଦିଗରେ ଉଭୟ ଘରୋଇ ଏବଂ ବିଦେଶୀ ନିବେଶକଙ୍କୁ ଉତ୍ସାହିତ କରିବାର ଆବଶ୍ୟକତା ରହିଛି।
ଦେଶ ମଧ୍ୟରେ ମୋବାଇଲ ଫୋନ ଉତ୍ପାଦନ, ଇଲେକ୍ଟ୍ରୋନିକ୍ସ ସମେତ ମାନୁଫାକ୍ଚରିଂକୁ ଗୁରୁତ୍ୱ ଦେବାକୁ ପଡିବ। ଚାଇନାରୁ ଆସୁଥିବା ଇଲେକ୍ଟ୍ରେନିକ୍ସ ସାମଗ୍ରୀ, ଇଲେକଟ୍ରୋନିକ୍ସ ଏବଂ ଅଣଇଲେକ୍ଟ୍ରୋନିକ୍ସ ମେଶିନେରି, ଲୌହ ଏବଂ ଇସ୍ପାତ, ଜୈବିକ ଏବଂ ଅଜୈବିକ ରସାୟନ, ଅଣ ଲୌହ ଧାତୁ, କୋଇଲା, ପରିବହନ ଉପକରଣ, ଫାର୍ମାସ୍ୟୁଟିକାଲ ଭଳି ଅନ୍ୟ କେତେକ ସାମଗ୍ରୀ ତାଲିକାରେ ସାମିଲ ରହିଥିବା ଜଣାପଡିଛି।
