ନୂଆଦିୀ,୬।୧୧: କ୍ରିକେଟ ପ୍ରଶଂସକଙ୍କ ପାଇଁ ଏକ ଖୁସି ଖବର। ଆଫ୍ରୋ-ଏସିଆ କପ ପୁଣି ଆରମ୍ଭ ହେବାକୁ ଯାଉଛି। ଆଫ୍ରିକୀୟ କ୍ରିକେଟ ଆସୋସିଏସନ (ଏସିଏ) ବାର୍ଷିକ ବୈଠକରେ ୬ ଜଣିଆ ମଧ୍ୟବର୍ତ୍ତୀକାଳୀନ କମିଟି ଗଠନ କରାଯାଇଥିଲା, ଯାହା ଏସୀୟ ଏବଂ ଆଫ୍ରିକୀୟ କ୍ରିକେଟରଙ୍କୁ ଅଧିକ ସୁଯୋଗ ପ୍ରଦାନ ଦିଗରେ ପଦକ୍ଷେପ ନେବ। ଏହି କମିଟି ଅନ୍ୟ ଦେଶର କ୍ରିକେଟ ଆସୋସିଏସନ ସହିତ ଯୋଗାଯୋଗ କରି ବିଭିନ୍ନ ମହାଦେଶ ମଧ୍ୟରେ କ୍ରିକେଟ ଟୁର୍ନାମେଣ୍ଟ ଆୟୋଜନ କରିବାକୁ ଦାବି କରିବ। ଆଫ୍ରୋ-ଏସିଆ କପ ମଧ୍ୟ ସେଥି ମଧ୍ୟରୁ ଗୋଟିଏ ହୋଇପାରେ।
ଆଫ୍ରୋ-ଏସିଆ କପରେ ଏସିଆ ଏକାଦଶ ଏବଂ ଆଫ୍ରିକା ଏକାଦଶ ଦଳ ମୁହାଁମୁହିଁ ହୋଇଥାନ୍ତି। ଏହି ଟୁର୍ନାମେଣ୍ଟ ପ୍ରଥମେ ୨୦୦୫ରେ ଖେଳାଯାଇଥିଲା, ଯାହା ଦକ୍ଷିଣ ଆଫ୍ରିକା ଦ୍ୱାରା ଆୟୋଜିତ ହୋଇଥିଲାବେଳେ ୨୦୦୭ରେ ଏହା ଭାରତ ଦ୍ୱାରା ଆୟୋଜିତ ହୋଇଥିଲା। ଏହାର ତୃତୀୟ ସଂସ୍କରଣ ୨୦୦୯ରେ କେନିଆରେ ଅନୁଷ୍ଠିତ ହେବାର ଥିଲା, କିନ୍ତୁ ଆଫ୍ରୋ-ଏସିଆ କପ ସେହି ବର୍ଷ ଖେଳାଯାଇ ପାରିଲା ନାହ। ଏହି ଟୁର୍ନାମେଣ୍ଟ ମଧ୍ୟ ସ୍ବତନ୍ତ୍ର ହୋଇପାରେ କାରଣ ଏଥିରେ ଭାରତୀୟ ଏବଂ ପାକିସ୍ତାନୀ ଖେଳାଳିମାନେ ଏକାଠି ଖେଳୁଥିବା ଦେଖିବାକୁ ମିଳିବ, ଯେଉଁମାନଙ୍କ ମଧ୍ୟରେ ଗତ ଦେଢ ଦଶନ୍ଧି ମଧ୍ୟରେ କୌଣସି ଦ୍ୱିପାକ୍ଷିକ ସିରିଜ ଖେଳାଯାଇ ନାହିଁ।
ଏସିଏର ମଧ୍ୟବର୍ତ୍ତୀକାଳୀନ ଚେୟାରମ୍ୟାନ ଟାଭେଙ୍ଗା ମୁକୁଲାନି ଏକ ସାମ୍ବାଦିକ ସମ୍ମିଳନୀରେ କହିଛନ୍ତି, କ୍ରିକେଟ କ୍ଷେତ୍ରରେ ଅଧିକ ସୁଯୋଗ ଦେବା ବ୍ୟତୀତ ଆଫ୍ରୋ-ଏସିଆ କପ ଉଭୟ ପକ୍ଷ ପାଇଁ ଆର୍ଥିକ ଦୃଷ୍ଟିରୁ ଲାଭଦାୟକ ହେବ। ଆମେ ଏସିଆ କ୍ରିକେଟ ପରିଷଦର ଅଧିକାରୀଙ୍କ ସହ କଥା ହୋଇଛୁ ଏବଂ ଆଫ୍ରିକୀୟ କ୍ରିକେଟ ଆସୋସିଏସନ ସହିତ ମଧ୍ୟ ଯୋଗାଯୋଗ କରିଛୁ। ସେମାନେ ସମସ୍ତେ ଆଫ୍ରୋ-ଏସିଆ କପ ପୁନଃଆରମ୍ଭ କରିବାକୁ ସପକ୍ଷରେ ଅଛନ୍ତି।
୨୦୦୫ରେ ଅନୁଷ୍ଠିତ ତିନି ମ୍ୟାଚ ସିରିଜ ୧-୧ ଡ୍ରରେ ଶେଷ ହୋଇଥିଲା। ସେତେବେଳେ ବୀରେନ୍ଦ୍ର ସେହଓ୍ବାଗ୍, ସହିଦ ଆଫ୍ରିଦି ଏବଂ ସନଥ ଜୟସୁରିଆ ଏକାଠି ଖେଳୁଥିବା ଦେଖିବାକୁ ମିଳିଥିଲା। ୨୦୦୭ରେ, ଏସିଆ ଏକାଦଶ ଆଫ୍ରିକା ଏକାଦଶକୁ ୩-୦ରେ ପରାସ୍ତ କରିଥିଲା। ଏଥର ଶୋଏବ ଅଖତର, ଏମଏସ ଧୋନୀ, ଜହିର ଖାନ ଏବଂ ମହମ୍ମଦ ଆସିଫଙ୍କ ପରି କିମ୍ବଦନ୍ତୀ ଏହି ଏହି ଟୁର୍ନାମେଣ୍ଟ ଖୋଳିଥିଲେ। ଏଥର ଏହି ଟୁର୍ନାମେଣ୍ଟ ବିରାଟ କୋହଲି ଏବଂ ପାକିସ୍ତାନର ବାବର ଆଜମଙ୍କ ଜଲଓ୍ବା ଦେଖିବାକୁ ମିଳିପାରେ।
