ହରାରେ,୨୨ା୮(ପି.ଟି.): ଜିମ୍ବାଓ୍ବେ ବିପକ୍ଷ ୩ ମ୍ୟାଚ୍ବିଶିଷ୍ଟ ଦିନିକିଆ ସିରିଜ୍ର ଅନ୍ତିମ ମ୍ୟାଚ ସୋମବାର ଖେଳାଯିବ। ଏହି ମୁକାବିଲା ଜିତି କ୍ଲିନ୍ ସୁଇପ୍ କରିବାକୁ ପ୍ରୟାସ କରିବ ଭାରତ। ପ୍ରଥମ ଦୁଇ ମ୍ୟାଚ୍ ଏକପାଖିଆ ଭାବେ ଶେଷ ହୋଇଥିବା ବେଳେ ଦ୍ୱିତୀୟ ମ୍ୟାଚରେ ଘରୋଇ ଦଳର ବୋଲିଂ ସାମାନ୍ୟ ପ୍ରଭାବୀ ରହିଥିଲା। ଉଭୟ ଦଳର ଫର୍ମକୁ ଦେଖିଲେ ଭାରତ ସିରିଜ୍ ସୁଇପ୍ ନିମନ୍ତେ ଫେବରାଇଟ୍ ବୋଲି ଆପାତତଃ କୁହାଯାଇପାରେ। ଭାରତ ଆଗୁଆ ସିରିଜ୍ ଜିତିସାରିଥିବାରୁ ଏହି ମ୍ୟାଚ୍ରେ ଅଧିକ ପରୀକ୍ଷା ନିରୀକ୍ଷା ଦେଖିବାକୁ ମିଳିପାରେ। ଟିମ୍ରେ ନିଜ ସ୍ଥାନ ସୁରକ୍ଷିତ କରିବା ପାଇଁ ଯୁବ ଖେଳାଳିଙ୍କୁ ଆଉ ଏକ ସୁଯୋଗ ମିଳିବ। ଦୁଇଟିଯାକ ମ୍ୟାଚ୍ରେ ଜିମ୍ବାଓ୍ବେର ବ୍ୟାଟିଂ ବିଫଳ ହୋଇଥିବା ବେଳେ ବ୍ୟାଟରମାନେ ନିଜ ତ୍ରୁଟି ସୁଧାରିବାକୁ ଏଥର ପ୍ରୟାସ କରିବେ। ଓପ୍ନିଂରେ ବିଫଳ ହୋଇଥିଲେ ହେଁ ଲୋକେଶ ରାହୁଲ ପୁଣି ବ୍ୟାଟିଂ ଓପନ୍ କରିପାରନ୍ତି। ଆଗଧାଡ଼ିର ବୋଲରମାନେ ଅନୁପସ୍ଥିତ ଥିଲେ ମଧ୍ୟ ସେମାନଙ୍କ ଅଭାବ ଅନୁଭୂତ ହୋଇନାହିଁ।
ଭାରତୀୟ ବ୍ୟାଟରଙ୍କୁ ଅଧିକ ସୁଯୋଗ ମିଳି ନ ଥିଲେ ହେଁ ସମସ୍ତ ଖେଳାଳି ଏହାର ଉପଯୋଗ କରିବାକୁ ପ୍ରୟାସ କରିବେ। ଦ୍ୱିତୀୟ ମ୍ୟାଚ୍ର ବିଫଳତାକୁ ପଛରେ ପକାଇ ଇଶାନ କିଷନ ବଡ଼ ସ୍କୋର ପ୍ରୟାସ କରିବେ। ସେଟ୍ ହୋଇ ଉଇକେଟ ଫୋପାଡ଼ିଥିବା ଶିଖର ଧାଓ୍ବନ୍ ଓ ଶୁବମନ ଗିଲ୍ଙ୍କ ନିକଟରୁ ଅଧିକ ଦାୟିତ୍ୱବାନ୍ ବ୍ୟାଟିଂ ଆଶା କରାଯାଏ। ଦୀପକ ହୁଦା ଓ ସଞ୍ଜୁ ସାମ୍ସନ ଭଲ ବ୍ୟାଟିଂ କରିଥିବା ବେଳେ ଉଭୟଙ୍କ ନିକଟରୁ ସମାନ ପ୍ରଦର୍ଶନ ଆଶା କରିବ ମ୍ୟାନେଜ୍ମେଣ୍ଟ। ସେହିପରି କ୍ଲିନ୍ ସୁଇପ୍କୁ ରୋକିବା ଲାଗି ଜିମ୍ବାଓ୍ବେ ପ୍ରୟାସ କରିବ। ସିକନ୍ଦର ରାଜା ଓ ସିନ୍ ଓ୍ବିଲିୟମ୍ସଙ୍କ ବ୍ୟାଟିଂ ଉପରେ ଦଳର ପ୍ରଦର୍ଶନ ନିର୍ଭର କରୁଥିବା ବେଳେ ଉଭୟ ଆଶାନୁରୂପ ଖେଳିବାରେ ବିଫଳ ହୋଇଛନ୍ତି। ବୋଲିଂରେ ଭାରତ କୁଲଦୀପ ଯାଦବଙ୍କୁ ବାଦ୍ ଦେଇ ଦୀପକ ଚହର ଓ ଶାର୍ଦ୍ଦୂଳ ଠାକୁରଙ୍କୁ ଖେଳାଇପାରେ। ଦୀପକ ହୁଦା ଦ୍ୱିତୀୟ ସ୍ପିନର ଭାବେ ବୋଲିଂ କରିପାରନ୍ତି।
