Categories: Home Leftଖେଳ

ଗିଲ୍‌ କଲେ ବଡ଼ ଘୋଷଣା, ୪ ଦ୍ରୁତ ବୋଲରଙ୍କ ସହ ମଇଦାନକୁ ଓହ୍ଲାଇବ ଟିମ ଇଣ୍ଡିଆ, ଜାଣନ୍ତୁ ସେମାନେ କିଏ…

ନୂଆଦିଲ୍ଲୀ,୧୭।୧୧: ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ପ୍ରଥମ ଟେଷ୍ଟ ମ୍ୟାଚ ୱେଲିଂଟନରେ ଖେଳାଯିବ। ଦୁଇ ମ୍ୟାଚ ବିଶିଷ୍ଟ ଟେଷ୍ଟ ସିରିଜର ଆରମ୍ଭ ନଭେମ୍ବର ୧୯ ତାରିଖରୁ ହେବ। ଏହା ପୂର୍ବରୁ ଭାରତୀୟ ଅଧିନାୟକ ଶୁଭମନ ଗିଲ ସାମ୍ବାଦିକ ସମ୍ମିଳନୀରେ ନଜର ଆସିଥିଲେ। ନ୍ୟୁଜିଲାଣ୍ଡର ପରିସ୍ଥିତିକୁ ଦୃଷ୍ଟିରେ ରଖି ଟିମ ଇଣ୍ଡିଆର ଚୂଡ଼ାନ୍ତ ଏକାଦଶ କିପରି ହେବ, ତାହା ଉପରେ ସମସ୍ତଙ୍କ ନଜର ରହିଛି। ବିଶ୍ୱ ଟେଷ୍ଟ ଚାମ୍ପିୟନଶିପ ଦୃଷ୍ଟିରୁ ଏହି ସିରିଜ ଭାରତୀୟ ଦଳ ପାଇଁ ବେଶ ଗୁରୁତ୍ୱପୂର୍ଣ୍ଣ। ଏହାକୁ ଜିତିବା ପାଇଁ ଦଳୀୟ ପରିଚାଳନା ପକ୍ଷରୁ ସ୍ବତନ୍ତ୍ର ରଣନୀତି ପ୍ରସ୍ତୁତ କରାଯାଇଛି।

ଶୁଭମନ ଗିଲ ଖବରଦାତା ସମ୍ମିଳନୀରେ ସ୍ପଷ୍ଟ କରିଛନ୍ତି ଯେ, ପରିସ୍ଥିତିକୁ ଦେଖି ଟିମ ଇଣ୍ଡିଆ ୪ ଜଣ ଦ୍ରୁତ ବୋଲରଙ୍କ ସହ ପଡ଼ିଆକୁ ଓହ୍ଲାଇବ। ଟି-୨୦ ଏବଂ ଦିନିକିଆ ସିରିଜରେ ମଧ୍ୟ ଦ୍ରୁତ ବୋଲରମାନେ ସହାୟତା ପାଇଥିଲେ। ଏହି କାରଣରୁ ଟେଷ୍ଟ ମ୍ୟାଚରେ ମଧ୍ୟ ସମାନ କମ୍ବିନେସନ ସହ ଖେଳିବାକୁ ଦଳ ନିଷ୍ପତ୍ତି ନେଇଛି।

ଗିଲ କହିଛନ୍ତି, ଆମେ ୪ ଜଣ ଦ୍ରୁତ ବୋଲରଙ୍କ ସହ ପଡ଼ିଆକୁ ଓହ୍ଲାଇବୁ। ଆମର ସମସ୍ତ ଦ୍ରୁତ ବୋଲର ଭଲ ପ୍ରଦର୍ଶନ କରିଛନ୍ତି। ଏଭଳି ଚୟନଜନିତ ଦ୍ୱନ୍ଦ୍ୱ ରହିବା ସବୁବେଳେ ଭଲ। ଆମେ ୪ ଜଣ ଦ୍ରୁତ ବୋଲର ଚାହୁଁଛୁ, କିନ୍ତୁ କିଏ ଖେଳିବେ ତାହା ଏପର୍ଯ୍ୟନ୍ତ ସ୍ଥିର ହୋଇନାହିଁ। ଆମେ ଦେଖିଛୁ ଯେ, ତୃତୀୟ ଦିନ ପରେ ପିଚ ଧୀରେ ଧୀରେ ଫ୍ଲାଟ ହୋଇଯାଏ। ତେଣୁ ଆମକୁ ଏଭଳି ବୋଲର ଆବଶ୍ୟକ, ଯେଉଁମାନେ ପିଚକୁ ଅତିରିକ୍ତ ବାଉନ୍ସ ପାଇପାରିବେ।

ଦ୍ରୁତ ବୋଲରଙ୍କୁ ଅଧିକ ସହାୟତା ମିଳୁଥିବାରୁ ଟିମ ଇଣ୍ଡିଆ ନିଜ ସ୍କୱାଡରେ ଏକ ବଡ଼ ପରିବର୍ତ୍ତନ କରିଛି। ପୂର୍ବରୁ କୁଲଦୀପ ଯାଦବ ଭାରତୀୟ ଟେଷ୍ଟ ଦଳର ଅଂଶ ଥିଲେ। କିନ୍ତୁ ଏବେ ତାଙ୍କ ସ୍ଥାନରେ ଗୁରନୂର ବରାଡଙ୍କୁ ସାମିଲ କରାଯାଇଛି। ଦଳୀୟ ପରିଚାଳନା କୁଲଦୀପଙ୍କୁ ଏହି ସିରିଜରେ ଖେଳିବାର ସୁଯୋଗ ଦେବା ସମ୍ଭାବନା କମ ଥିବାରୁ ତାଙ୍କୁ ଦଳରୁ ମୁକ୍ତ କରାଯାଇଛି, ଯାହାଦ୍ୱାରା ସେ ସୟଦ ମୁସ୍ତାକ ଅଲୀ ଟ୍ରଫିରେ ଖେଳିପାରିବେ। ଦିନିକିଆ ସିରିଜ୍ରେ ଉତ୍କୃଷ୍ଟ ବୋଲିଂ ପ୍ରଦର୍ଶନ କରି ଗୁରନୂର ବରାର ଭାରତୀୟ ସ୍କୱାଡରେ ସ୍ଥାନ ପାଇଛନ୍ତି।

ଋଷଭ ପନ୍ତଙ୍କ ଫିଟନେସ ମଧ୍ୟ ଟିମ ଇଣ୍ଡିଆ ପାଇଁ ଏକ ବଡ଼ ଚିନ୍ତାର ବିଷୟ ରହିଥିଲା। ଆହତ କାରଣରୁ ସେ ଇଣ୍ଡିଆ-ଏ’ର ମ୍ୟାଚଗୁଡ଼ିକରେ ଖେଳିପାରି ନଥିଲେ। ତେବେ ସିରିଜ ଆରମ୍ଭ ହେବାର ଠିକ ପୂର୍ବରୁ ତାଙ୍କୁ ଫିଟ ଘୋଷଣା କରାଯାଇଛି। ଏବେ ସମସ୍ତଙ୍କ ମନରେ ପ୍ରଶ୍ନ ଉଠୁଛି ଯେ, ପନ୍ତଙ୍କୁ ସିଧାସଳଖ ଚୂଡ଼ାନ୍ତ ଏକାଦଶରେ ସ୍ଥାନ ମିଳିବ ନା ତାଙ୍କୁ ଗୋଟିଏ ମ୍ୟାଚ ପାଇଁ ବିଶ୍ରାମ ଦିଆଯିବ।

ଏହା ଉପରେ ଶୁଭମନ ଗିଲ ସ୍ପଷ୍ଟ କରିଛନ୍ତି ଯେ, ଋଷଭ ପନ୍ତଙ୍କ ଫିଟନେସକୁ ନେଇ କୌଣସି ସନ୍ଦେହ ନାହିଁ। ଗିଲ କହିଛନ୍ତି, ରିଷଭ ପନ୍ତଙ୍କୁ ନେଇ କୌଣସି ଦ୍ୱନ୍ଦ୍ୱ ନାହିଁ। ସେ ଭାରତ ପାଇଁ ୫୦ଟି ଟେଷ୍ଟ ମ୍ୟାଚ ଖେଳିଛନ୍ତି ଏବଂ ସମଗ୍ର ବିଶ୍ୱରେ ରନ ସଂଗ୍ରହ କରିଛନ୍ତି। ସେ ଜଣେ ଏଭଳି ଉଇକେଟ୍‌କିପର ଯିଏ ଅଷ୍ଟ୍ରେଲିଆରେ ଶତକ ହାସଲ କରିଛନ୍ତି।

Dharitri – Odisha’s No.1 Odia Daily

Share