ଭୁବନେଶ୍ୱର,୧3।୫ (ଅନୁରାଧା ମହାରଣା): ୨୦୨୩-୨୪ ଆର୍ଥିକ ବର୍ଷରେ ଭାରତର କୋଇଲା ଆମଦାନୀ ୭.୭% ବୃଦ୍ଧି ହୋଇ ୨୬୮.୨୪ ମେଟ୍ରେିକ୍ ଟନ୍ (ଏମଟି)ରେ ପହଞ୍ଚିଛି। ବିଟୁବି ଇ-କମର୍ସ କମ୍ପାନୀ ଏମଜଙ୍କଶନ୍ ସର୍ଭିସେସ୍ ରିପୋର୍ଟ ଅନୁଯାୟୀ, ୨୦୨୨-୨୩ ଆର୍ଥିକ ବର୍ଷରେ ଭାରତର କୋଇଲା ଆମଦାନୀ ୨୪୬.୦୬ ଏମଟି ଥିବାବେଳେ ୨୦୨୩-୨୪ ଆର୍ଥିକ ବର୍ଷର ମାର୍ଚ୍ଚରେ କୋଇଲା ଆମଦାନୀ ଗତ ଆର୍ଥିକ ବର୍ଷର ସମାନ ମାସରେ ୨୧.୧୨ ଏମଟିରୁ ୨୩.୯୬ ଏମଟିକୁ ବୃଦ୍ଧି ପାଇଛି। ୨୦୨୪ ମାର୍ଚ୍ଚରେ ରେକର୍ଡ ହୋଇଥିବା ମୋଟ ପରିମାଣ ମଧ୍ୟରୁ ନନ୍କୋକିଂ କୋଇଲା ଆମଦାନୀ ୧୫.୩୩ ଏମଟିରେ ପହଞ୍ଚିଛି। ୨୦୨୩ ମାର୍ଚ୍ଚରେ ଏହାର ପରିମାଣ ୧୩.୮୮ ଏମଟି ରହିଥିଲା।
୨୦୨୪ ମାର୍ଚ୍ଚରେ କୋକିଂ କୋଇଲା ଆମଦାନୀ ୫.୩୪ ଏମଟି ରହିଥିବାବେଳେ ବର୍ଷକ ପୂର୍ବେ ୩.୯୬ ଏମଟିରୁ ବୃଦ୍ଧି ପାଇଥିଲା। ୨୦୨୪ ମାର୍ଚ୍ଚ ସୁଦ୍ଧା ନନ୍କୋକିଂ କୋଇଲା ଆମଦାନୀ ପରିମାଣ ୧୭୫.୯୬ ଏମଟି ଥିଲା। ଅନ୍ୟପଟେ ୨୦୨୩ ମାର୍ଚ୍ଚ ସୁଦ୍ଧା ଆମଦାନୀ ହୋଇଥିବା ନନ୍ କୋକିଂ କୋଇଲା ପରିମାଣ ୧୬୨.୪୬ ଏମଟି ରହିଥିଲା। କୋକିଙ୍ଗ କୋଇଲା ଆମଦାନୀ ୨୦୨୩-୨୪ ରେ ୫୭.୨୨ ଏମଟି ଥିବାବେଳେ ୨୦୨୨-୨୩ ରେ ଏହା ୫୪.୪୬ ଏମଟି ଥିଲା।
ତେବେ ବଜାରରେ ଘରୋଇ କୋଇଲା ପର୍ଯ୍ୟାପ୍ତ ପରିମାଣରେ ଉପଲବ୍ଧ ଥିବାରୁ ଆସନ୍ତା ମାସରେ ଆମଦାନୀ ଚାହିଦା ବଳବତ୍ତର ରହିବ କି ନାହିଁ ତାହା ଉପରେ ସମସ୍ତଙ୍କର ନଜର ରହିଛି। ତେବେ ୨୦୨୩-୨୪ ମଧ୍ୟରେ ସମଗ୍ର ଭାରତରେ କୋଇଲା ଉତ୍ପାଦନ ୯୯୭.୨୫ ଏମଟି ଥିଲା, ଯାହାକି ୨୦୨୨-୨୩ ତୁଳନାରେ ୧୧.୬୫ ପ୍ରତିଶତ ବୃଦ୍ଧି ପଞ୍ଜୀକୃତ ହୋଇଥିଲା।
