ଦିଗପହଣ୍ଡି,୨୯।୮(ଅଶେଷ ନାଥ ମିଶ୍ର) ଗଞ୍ଜାମ ଜିଲା ସାନଖେମୁଣ୍ଡି ବ୍ଳକ ପଟିଗୁଡ଼ା ପଞ୍ଚାୟତ ଉସ୍ତପଲ୍ଲୀ ଗ୍ରାମ ନିକଟ ମୋରମ୍ ଖାଦାନରେ ଶନିବାର ସକାଳେ ମୋରମ୍ ଖୋଳୁଥିବା ବେଳେ ପଥର ତଳେ ଚାପି ହୋଇ ଜଣେ ନାବାଳକ ମୃତ୍ୟୁ ବରଣ କରିଛନ୍ତି।
ସେହିପରି ସେଠାରେ ମୋରୁମ ଖୋଳୁଥିବା ଅନ୍ୟଜଣେ ନାବାଳକ ଗୁରୁତର ହୋଇଛନ୍ତି। ମୃତକ ଜଣକ ହେଲେ ସହଦେବ ଟିକରପଡ଼ା ପଞ୍ଚାୟତ ଉସ୍ତପଲ୍ଲୀ ଗ୍ରାମର ବିନୋଦ ମଲ୍ଲିକ(୧୭) ଏବଂ ଆହାତ ଜଣକ ହେଲେ ଉସ୍ତପଲ୍ଲୀ ଗାଁ ରେ ମାଉସୀଙ୍କ ଘରେ ରହୁଥିବା ବଡଗଡ ଥାନା ଇଲାକର ଏକ ଗାଁ ନାବାଳକ ଗଣେଶ ମଲ୍ଲିକ(୧୫)। ଏ ଦୁହେଁ ସମ୍ପର୍କୀୟ ଭାଇ।ଉଭୟେ ତାଙ୍କ ଘରକାମ ପାଇଁ ପଟିଗୁଡ଼ା ପଞ୍ଚାୟତ କେଶପୁର ଗାଁ ର ଜଣେ ବ୍ୟକ୍ତିଙ୍କ ଟ୍ରାକ୍ଟର ଭଡ଼ାରେ ନେଇଥିଲେ। ଦିଗପହଣ୍ଡି ବ୍ଲକ ସହଦେବଟିକରପଡ଼ା ଗ୍ରାମର ଜଣେ ପଞ୍ଚାୟତ ପ୍ରତିନିଧିଙ୍କ ସ୍ବାମୀ ମୋରମ୍ ପାହାଡ଼ରୁ ବେଆଇନ ଭାବେ ମୋରମ୍ ଖୋଳି ଟ୍ରାକ୍ଟର ଯୋଗେ ଚୋରା ଚାଲାଣ କରୁଥିବା କୁହାଯାଉଛି। ତାଙ୍କ ଜାଣତରେ ପାହାଡ ପାଦ ଦେଶରେ ମୋରମ୍ ଖୋଳୁଥିବା ବେଳେ ଅସାବଧାନତା କାରଣରୁ ପାହାଡ଼ର ଉପରମୁଣ୍ଡରେ ଥିବା ଦୁଇଟି ବୃହତ ପଥର ଖଣ୍ଡ ଖସି ଉଭୟ ବିନୋଦ ଓ ଗଣେଶଙ୍କ ଉପରେ ପଡ଼ିଯାଇଥିଲା।
ଗୋଟିଏ ପଥର ଖଣ୍ଡ ବିନୋଦଙ୍କ ମୁଣ୍ଡ ଉପରେ ପଡିଯିବାରୁ ଘଟଣାସ୍ଥଳରେ ତାଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଏକ ପଥର ତଳେ ଗଣେଶ ଚାପି ହୋଇ ରହିଯାଇଥିଲେ। ପରେ କିଛି ବ୍ୟକ୍ତି ଅଗ୍ନିଶମବାହିନୀକୁ ଖବର ଦେବା ପରେ ଅଗ୍ନିଶମ କର୍ମଚାରୀ ବୃନ୍ଦ ଘଟଣାସ୍ଥଳରେ ପହଞ୍ଚି ଉଭୟଙ୍କୁ ଉଦ୍ଧାର କରି ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ।ସେଠାରେ ବିନୋଦଙ୍କୁ ଉପସ୍ଥିତ ଡାକ୍ତର ମୃତ ଘୋଷଣା କରିଥିଲେ। ପ୍ରାଥମିକ ଚିକିତ୍ସା ପରେ ଗଣେଶଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ଖବରପାଇ ପାଟପୁର ପୋଡ଼ାମାରି ଫାଣ୍ଡି ଅଧିକାରୀ ଏଏସଆଇ ପ୍ରଭାତ କୁମାର ବାଲିକାନା ସଦଳବଳେ ଘଟଣାସ୍ଥଳରେ ପହଞ୍ଚି ସବିଶେଷ ତଦନ୍ତ କରି ଫେରିଥିଲେ।
ସେହିପରି ପାଟପୁର ଥାନା ଆଇଆଇସି ଦୀପ୍ତି ରଞ୍ଜନ ବେହେରା ଅପମୃତ୍ୟୁ ମାମଲା ରୁଜୁ କରିଛନ୍ତି। ପୋଲିସ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରୁ ବିନୋଦଙ୍କ ମୃତଦେହକୁ ପୋଲିସ ଜବତ କରି ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ବଡ଼ ଡାକ୍ତରଖାନାକୁ ପଠାଇଥିଲେ। ବ୍ୟବଚ୍ଛେଦ ପରେ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିଲା। ଅପରାହ୍ନରେ ଶୋକାକୁଳ ପରିବେଶ ମଧ୍ୟରେ ଗାଁ ଶ୍ମଶାନରେ ତାଙ୍କ ଶେଷକୃତ୍ୟ କରାଯାଇଛି।
