ବରୀ,୩ା୭(ଡି.ଏନ୍.ଏ.): ବରୀ ବ୍ଲକ ଦେଇ ପ୍ରବାହିତ ବ୍ରାହ୍ମଣୀ ନଦୀ ଶଯ୍ୟା ଖନନ କରା ନ ଯିବା ଓ ବିଭିନ୍ନ ସ୍ଥାନରେ ବୁଦା ସୃଷ୍ଟି ହୋଇଥିବା ଯୋଗୁ ସ୍ଥାନୀୟ ଅଞ୍ଚଳରେ ଚାଷ ଜମିକୁ ଜଳସେଚନରେ ସମସ୍ୟା ଉପୁଜୁଛି। ଅନ୍ୟପଟେ ବର୍ଷର ଅଧିକାଂଶ ସମୟ ନଦୀ ଶଯ୍ୟା ଶୁଖିଲା ରହୁଥିବାରୁ ଭୂତଳ ଜଳସ୍ତର ମଧ୍ୟ ହ୍ରାସ ପାଉଥିବାରୁ ନଳକୂପ ଖନନ ପାଇଁ ବହୁ ଗଭୀରକୁ ଖୋଳିବାକୁ ପଡୁଛି, ଯେଉଁଥିପାଇଁ ଅଞ୍ଚଳବାସୀ ଅଧିକ ଖର୍ଚ୍ଚାନ୍ତ ହେଉଛନ୍ତି। ନଦୀ ଶଯ୍ୟାର ବିଭିନ୍ନ ସ୍ଥାନରେ ବାଲି ଚଢ଼ା ଓ ତଣ୍ଡି ବୁଦା ଭର୍ତ୍ତି ହୋଇଥିବାରୁ ନଦୀରେ ପାଣି ଆସିବାରେ ବାଧା ସୃଷ୍ଟି ହେଉଛି। ବ୍ଲକ ଅଞ୍ଚଳର ଚାଷୀ ଓ ସାଧାରଣ ଲୋକଙ୍କ ସୁବିଧା ପାଇଁ ପ୍ରଶାସନ ପକ୍ଷରୁ ନଦୀ ଖନନ ବ୍ୟବସ୍ଥା କରାଯିବା ପାଇଁ ବ୍ରାହ୍ମଣୀ ବଞ୍ଚାଅ ଅଭିଯାନର ସଦସ୍ୟମାନେ ଜିଲାପାଳଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି।
ବ୍ରାହ୍ମଣୀ ନଦୀ ଯାଜପୁର ଜିଲାର ଜେନାପୁରଠାରୁ ବାହାରି ବରୀ ବ୍ଲକର କଳାମାଟିଆ ପଞ୍ଚାୟତ ନିକଟରେ ଶେଷ ହୋଇଛି। ବ୍ଲକର ଗୋଳକୁଣ୍ଡ, ସ୍ବାଇଁଖଣ୍ଡ, ଇଶାଣପୁର, ସାହୁପଡା, ବାଇଁଶିରିଆ, ଚନ୍ଦନପୁର, ମନ୍ଦାରୀ, ସେରପୁର ପଞ୍ଚାୟତ ସମେତ ୨୨ଟି ପଞ୍ଚାୟତର ଚାଷୀମାନେ କୃଷିକାର୍ଯ୍ୟ ପାଇଁ ବ୍ରାହ୍ମଣୀ ନଦୀ ଜଳ ଉପରେ ନିର୍ଭର କରିଥାନ୍ତି। ମତ୍ସ୍ୟଜୀବୀ ବ୍ରାହ୍ମଣୀରୁ ମାଛ ଧରି ପରିବାର ପ୍ରତିପୋଷଣ କରିଥାନ୍ତି। କାଳକ୍ରମେ ନଦୀ ଶଯ୍ୟା ପୋତି ହୋଇପଡୁଥିବାରୁ ଚାଷୀ ହଇରାଣ ହେଉଥିବା ବେଳେ ମତ୍ସ୍ୟଜୀବୀ ଜୀବିକା ହରାଇବା ଭଳି ପରିସ୍ଥିତି ଉପୁଜିଲାଣି। ନଦୀକୂଳ ଅଞ୍ଚଳରେ ବସବାସ କରୁଥିବା ଲୋକେ ବନ୍ୟା ଭୟରେ କାଳାତିପାତ କରୁଥିଲେ ହେଁ ଅନ୍ୟଦିନେ ନଦୀ ଶୁଖିଲା ପଡୁଥିବାରୁ କୂପ ବା ନଳକୂପ ଖୋଳିବା ସକାଶେ ଅଧିକ ଖର୍ଚ୍ଚାନ୍ତ ହେଉଛନ୍ତି। ଅନେକ ଚାଷୀ ଆଖୁଚାଷ ପାଇଁ ବ୍ରାହ୍ମଣୀ ଜଳ ଉପରେ ନିର୍ଭର କରିଥାନ୍ତି। ହେଲେ ଏବେ ଆଖୁ ଚାଷୀଙ୍କୁ ଚିନ୍ତା ଘାରିଛି। ପୂର୍ବରୁ ଏ ସବୁ ସମସ୍ୟାର ସମାଧାନ ସକାଶେ ଦ୍ୱୀପାଞ୍ଚଳ ଉନ୍ନୟନ ପରିଷଦ, ନବ ନିର୍ମାଣ କୃଷକ ସଂଗଠନ ଓ ବହୁ ସ୍ବେଚ୍ଛାସେବୀ ସଂଗଠନ ପକ୍ଷରୁ ବ୍ରାହ୍ମଣୀ ବଞ୍ଚାଅ ଅଭିଯାନ ଆରମ୍ଭ ହୋଇଥିଲା। ନଦୀ ଖନନ ପାଇଁ ସ୍ଥାନୀୟ ପ୍ରଶାସନ ସମେତ ରାଜନେତା ଓ ବିଭାଗୀୟ ମନ୍ତ୍ରୀଙ୍କୁ ମଧ୍ୟ ଦାବିପତ୍ର ପ୍ରଦାନ କରାଯାଇଥିଲା। ମାତ୍ର ସୁଫଳ ମିଳି ନ ଥିବାରୁ ପୁନଃ ବ୍ରାହ୍ମଣୀ ବଞ୍ଚାଅ ଅଭିଯାନ ସଦସ୍ୟମାନେ ଜିଲାପାଳଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି। ଏ ଦିଗରେ ପଦକ୍ଷେପ ନିଆ ନ ଗଲେ ଆଗାମୀ ଦିନରେ ଆନ୍ଦୋଳନ କରାଯିବ ବୋଲି ବ୍ରାହ୍ମଣୀ ବଞ୍ଚାଅ ଅଭିଯାନ ପକ୍ଷରୁ ଚେତାବନୀ ଦିଆଯାଇଛି। ଦାବିପତ୍ର ପ୍ରଦାନ ବେଳେ ସଭାପତି ଲୋକନାଥ ଦାସ, ବରୀ ବ୍ଲକ ପ୍ରାକ୍ତନ ଅଧ୍ୟକ୍ଷ ଗଗନ ବିହାରୀ ଜେନା, ପ୍ରାକ୍ତନ ଜିଲା ପରିଷଦ ସଭ୍ୟ ବିଷ୍ଣୁ ଚରଣ ମହାନ୍ତି, କର୍ଣ୍ଣଚନ୍ଦ୍ର ଘଡ଼ାଇ, ମୁକୁନ୍ଦ ସାମଲ, ସରୋଜକାନ୍ତ ଜେନା, ରଘୁନାଥ ଜେନା ଉପସ୍ଥିତ ଥିଲେ।
