ଅଭାବୀ ଲୋକମାନଙ୍କୁ ସହଯୋଗର ହାତ ବଢ଼ାଇଛନ୍ତି ଅତୁଲ ଆଜମେରା। ରହୁଛନ୍ତି ମହାରାଷ୍ଟ୍ରର ଉସ୍ମାନବାଦରେ, ସରକାରୀ ହସ୍ପିଟାଲ ନିକଟରେ।
ପେସାରେ ବ୍ୟବସାୟୀ। କିନ୍ତୁ ପ୍ରତିଦିନ ହସ୍ପିଟାଲ ରୋଗୀଙ୍କ ସମ୍ପର୍କୀୟଙ୍କୁ ମାଗଣାରେ ଖାଦ୍ୟ ଦେଉଛନ୍ତି। ମରୁଡିପ୍ରବଣ ମରାଠାଓ୍ବାଡାର ଗରିବମାନେ ବେଶି ଏହି ହସ୍ପିଟାଲକୁ ଆସନ୍ତି ା ଅତୁଲ ପ୍ରତିଦିନ ୩୦୦ ଲୋକଙ୍କୁ ଖାଇବାକୁ ଦେଉଛନ୍ତି। ତାଙ୍କର ଏହି ଅଭିଯାନର ନାମ ହେଉଛି ‘ଅନ୍ନପୂର୍ଣ୍ଣା’। ୩୦ ଜଣ ବ୍ୟକ୍ତି ମାସିକ ୧୦୦୦ ଟଙ୍କା ଅନୁଦାନ ଦେଇ ଏହାକୁ ଚଳାଇଛନ୍ତି। ଅନ୍ୟମାନେ ବି ଏଥିପାଇଁ ସାହାଯ୍ୟ ଯୋଗାଇ ଦେଉଛନ୍ତି।
ଜନ୍ମଦିନ, ବିବାହ କିମ୍ବା ଶ୍ରାଦ୍ଧ ଦିବସରେ ଲୋକମାନେ ସ୍ବତନ୍ତ୍ର ଭାବେ ‘ଅନ୍ନପୂର୍ଣ୍ଣା’ରେ ଖାଦ୍ୟ ବ୍ୟବସ୍ଥା କରନ୍ତି। ଯେଉଁମାନେ ଅନୁଦାନ ଦେଉଛନ୍ତି, ସେମାନଙ୍କ ନାମ ଖାଇବା ସ୍ଥାନରେ ଘୋଷଣା କରାଯାଉଛି। ଅନ୍ନପୂର୍ଣ୍ଣାର ଫେସବୁକ ପେଜରେ ବି ସେମାନଙ୍କ ନାମ ଦର୍ଶାଯାଉଛି। ଏକ ସ୍ବେଚ୍ଛାସେବୀ ଅନୁଷ୍ଠାନ ଅନ୍ନପୂର୍ଣ୍ଣାକୁ ସହାୟତା କରୁଛି। ଯିଏ ଯେଉଁଦିନ ଖାଦ୍ୟର ଆୟୋଜନ କରୁଛନ୍ତି, ସେମାନେ ଦାନ କରିଥିବା ଆର୍ଥିକ ପରିମାଣ ମଧ୍ୟ ଘୋଷଣା କରାଯାଉଛି। ଅତୁଲ ଓ ତାଙ୍କର ୪ ସାଙ୍ଗ ଏହାକୁ ଆରମ୍ଭ କରିଥିଲେ।
ଆରମ୍ଭରୁ ଏମାନେ ବହୁ କଷ୍ଟସ୍ବୀକାର କରିଛନ୍ତି ଓ ଅନ୍ୟମାନେ ସେମାନଙ୍କ ସହ ସାମିଲ ହେବା ଯୋଗୁ ସହଜ ହୋଇପାରିଛି ବୋଲି କହନ୍ତି ଅତୁଲ। ଅନ୍ନପୂର୍ଣ୍ଣା ଆରମ୍ଭରୁ ଯେଭଳି ଖାଇବାକୁ ଦେଉଥିଲା ଏବେବି ସମାନ ପ୍ରକାର ଖାଦ୍ୟ ଦେଉଛି। ଖାଦ୍ୟର ପରିମାଣ ଓ ମାନ ସେମିତି ରଖାଯାଇଛି। ପ୍ରତିଦିନ ବିଭିନ୍ନ ଅନୁଷ୍ଠାନର ସ୍ବେଚ୍ଛାସେବୀ ଖାଦ୍ୟ ପରିବେଷଣ ଆରମ୍ଭ କରି ପାଣି ଯୋଗାଇବା ଆଦି କାର୍ଯ୍ୟରେ ସହଯୋଗ କରୁଛନ୍ତି ଅତୁଲଙ୍କୁ। ମେଡିଲକାଲଠାରୁ ମାତ୍ର ୧୦୦ ମିଟର ଦୂରରେ ସେ ‘ଅନ୍ନପୂର୍ଣ୍ଣା’ର ବ୍ୟବସ୍ଥା କରିଛନ୍ତି। ଏଣୁ ଲୋକମାନେ ସେଠାରେ ସହଜରେ ପହଞ୍ଚତ୍ ଯାଇପାରନ୍ତି। ଲକଡାଉନ ସମୟରେ ସେମାନେ ଦୈନିକ ୭୦୦ ଲୋକଙ୍କୁ ଟିଫିନ୍ ଯୋଗାଇଥିଲେ।
