ଇ-ବର୍ଜ୍ୟର ପୁନଃ ଉପଯୋଗ କରି ଆକର୍ଷଣୀୟ ହସ୍ତକଳାର ପରିଚୟ ଦେଇଛନ୍ତି ବେଙ୍ଗାଲୁରୁର ବିଶ୍ୱନାଥ ମାୟାବାଡ଼ି ଦାଭାଙ୍ଗେର। ସେ ଅଦରକାରୀ କମ୍ପ୍ୟୁଟର, ଲାପଟପ୍, ଫୋନ୍ ସହ ପ୍ଲାଷ୍ଟିକ ଓ ଧାତବ ବର୍ଜ୍ୟରୁ ସୁନ୍ଦର ଗହଣା, ମୂର୍ତ୍ତି, ପ୍ରାଣୀଙ୍କ ପ୍ରତିକୃର୍ତ୍ତି, ବିଭିନ୍ନ ପ୍ରକାର ପାତ୍ର ଓ ଅସ୍ତ୍ରଶସ୍ତ୍ର ନିର୍ମାଣ କରୁଛନ୍ତି। ଏପରିକି ରୋବ ମଧ୍ୟ ତିଆରି କରିଛନ୍ତି ବିଶ୍ୱନାଥ। ଏବେ ସୁଦ୍ଧା ସେ ୨୦୦ କେଜି ଇ-ବର୍ଜ୍ୟର ପୁନଃ ଉପଯୋଗ କରିସାରିଲେଣି। ବିଶ୍ୱନାଥଙ୍କ ବୟସ ୬୦। ସେ ଓ୍ବିପ୍ରୋରେ ଜଣେ ଏକ୍ଜିକ୍ୟୁଟିଭ ଭାବେ କାର୍ଯ୍ୟ କରି ଅବସର ନେବାପରେ ଏହି କାର୍ଯ୍ୟ କରୁଛନ୍ତି। ସେ ସ୍କ୍ରାପ୍ ଡିଲରମାନଙ୍କଠାରୁ ଇ-ବର୍ଜ୍ୟ ସଂଗ୍ରହ କରନ୍ତି। ଏବେ ତାଙ୍କ ହସ୍ତକଳାର ଆଦର ବଢ଼ିଛି ଓ ଏହାକୁ ସେ ଦେଶରେ ଏବଂ ୟୁରୋପ, ଆମେରିକାରେ ବିକ୍ରି କରିପାରୁଛନ୍ତି। ଏଯାବତ୍ ୫୦୦ରୁ ଊର୍ଦ୍ଧ୍ୱ ପ୍ରକାର ଜିନିଷ ତିଆରି କରିସାରିଲେଣି। ତାଙ୍କ ଆକର୍ଷଣର କଳାକୃତି ମଧ୍ୟରେ ସବୁଠୁ ଆଦୃତି ଲାଭ କରିଛି ୪୨x୩୮ ଇଞ୍ଚର କାମଧେନୁ। ଏହି କଳାକୃତି ତିଆରି କରିବା ପରେ ତାଙ୍କ କାରିଗରୀ କୌଶଳର ପରିଚୟ ଦେବା ଯେତିକି ଗୁରୁତ୍ୱପୂର୍ଣ୍ଣ ନୁହେଁ, ବର୍ଜ୍ୟ ବ୍ୟବହାର କରି ପରିବେଶକୁ ସୁରକ୍ଷା କରିବା ତାହାଠାରୁ ମହତ୍ୱପୂର୍ଣ୍ଣ ବୋଲି କହନ୍ତି ବିଶ୍ୱନାଥ।
