ହାଇଦ୍ରାବାଦର ଦୁଇ ସାଙ୍ଗ ମଣି ବାଜପେୟୀ ଓ ରାଜ ମଣ୍ଡନଗୋପାଳଙ୍କ ପରିବେଶ ସୁରକ୍ଷା ଚିନ୍ତା ଖୁବ୍ ପ୍ରଶଂସନୀୟ। ସେମାନେ ବ୍ୟାନିୟନ ନେଶନ ରିସାଇକ୍ଲିଂ କମ୍ପାନୀ ଗଠନ କରି ପ୍ଲାଷ୍ଟିକ୍ ବର୍ଜ୍ୟରୁ ୩୦୦ ମିଲିୟନ ଏଫ୍ଏମ୍ସିଜି (ଫାଷ୍ଟ୍ ମୁଭିଂ କଞ୍ଜ୍ୟୁମର ଗୁଡ୍ସ) ବୋତଲ ପ୍ରସ୍ତୁତ କରିସାରିଲେଣି। ଏହି ସବୁ ବୋତଲକୁ ସେମାନେ ଭାରତର ପ୍ରତିଷ୍ଠିତ କମ୍ପାନୀଗୁଡ଼ିକୁ ଯୋଗାଉଛନ୍ତି ଓ ଏହାକୁ ସାମ୍ପୋ, ଡିଟର୍ଜେଣ୍ଟ ଏବଂ ଲୋଶନ ବଟଲ୍ ଭାବେ ବ୍ୟବହାର କରାଯାଉଛି। ବ୍ୟାନିୟନ କମ୍ପାନୀ ଦ୍ୱାରା ମାସକୁ ୧ ହଜାରରୁ ୧୨୦୦ ଟନ୍ ପ୍ଲାଷ୍ଟିକ୍ ବର୍ଜ୍ୟ ପ୍ରୋସେସିଂ କରାଯାଉଛି। ବାଜପେୟୀ କଲମ୍ବିଆ ବିଜ୍ନେସ ସ୍କୁଲ୍ରୁ ଏମ୍ବିଏରେ ଡିଗ୍ରୀ ହାସଲ କରିଛନ୍ତି। ପରେ ସେ ତାଙ୍କ ସହପାଠୀ ରାଜଙ୍କ ସହ ମିଶି ୨୦୧୩ରେ ବ୍ୟାନିୟନ ନେଶନ୍ ପ୍ରତିଷ୍ଠା କରି ପ୍ଲାଷ୍ଟିକ ବର୍ଜ୍ୟ ରିସାଇକ୍ଲିଂ କାର୍ଯ୍ୟ ଆରମ୍ଭ କରିଥିଲେ। ପରେ ବହୁ ମଲ୍ଟିନ୍ୟାଶନାଲ କମ୍ପାନୀ ମ୍ୟାନେଜର, ସିଟି ମ୍ୟୁନିସିପାଲିଟି କମିଶନର ଏବଂ ପ୍ରାଇଭେଟ ଓ୍ବେଷ୍ଟ୍ ମ୍ୟାନେଜ୍ମେଣ୍ଟ କଣ୍ଟ୍ରାକ୍ଟରଙ୍କଠାରୁ ଆରମ୍ଭ କରି ବର୍ଜ୍ୟ ସଂଗ୍ରହକାରୀ ଓ କବାଡିଓ୍ବାଲାଙ୍କ ସହ ଯୋଗାଯୋଗ କରି ଆଗକୁ ବଢ଼ିଥିଲେ। ଏବେ ବର୍ଷକୁ ୩୦୦ ମିଲିୟନ ବୋତଲ ତିଆରି କରୁଥିବାବେଳେ ୨୦୨୩ ସୁଦ୍ଧା ସେମାନେ ୧ ବିଲିୟନ ରିସାଇକେଲ୍ଡ ପ୍ଲାଷ୍ଟିକ୍ ବୋତଲ ପ୍ରସ୍ତୁତ କରିପାରିବେ ବୋଲି କହନ୍ତି ବାଜପେୟୀ।
