ସ୍କୁଲର ନାମ ଘାଟ୍ଓ୍ବାଲା ସ୍କୁଲ୍। ଗଙ୍ଗା କୂଳ କମଳେଶ୍ୱର ଘାଟରେ ଚାଲୁଛି ଏମିତି ଏକ ନିଆରା ସ୍କୁଲ,ଯେଉଁଠି ୨୦୦ ଅସହାୟ ପିଲା ମାଗଣାରେ ପଢୁଛନ୍ତି। ଏହି ସ୍କୁଲର ପ୍ରତିଷ୍ଠାତା କାନପୁର ବାସିନ୍ଦା ନୀତିନ କୁମାର। ୨୦୧୫ରୁ ଉକ୍ତ ସ୍କୁଲରେ ସନ୍ଧ୍ୟାବେଳେ ପିଲାମାନଙ୍କୁ ସେ ଟ୍ୟୁଶନ କରୁଛନ୍ତି। ଏହି କାର୍ଯ୍ୟରେ ନୀତିନଙ୍କ ସହ ଅନେକ ସ୍ବେଚ୍ଛାସେବୀ ଯୋଡ଼ି ହୋଇଗଲେଣି। ଅସହାୟ ପିଲାମାନଙ୍କୁ ମାଗଣାରେ ପଢ଼ାଇବା ସହ ସେମାନଙ୍କୁ ବିଭିନ୍ନ ସରକାରୀ ସ୍କୁଲରେ ନାମ ଲେଖାଇ ଉଚ୍ଚ ଶିକ୍ଷା ଦେବାର ବ୍ୟବସ୍ଥା କରୁଛନ୍ତି। ଏ ବାବଦ ସମସ୍ତ ଖର୍ଚ୍ଚ ସେ ବହନ କରୁଛନ୍ତି। ଏହି ସ୍କୁଲରେ ନର୍ସରିଠାରୁ ଆରମ୍ଭ କରି ୧୦ମ ଶ୍ରେଣୀ ବସ୍ତି ପିଲା ଟିଉସନ ହେଉଛନ୍ତି। ଯେଉଁପିଲା ସେଠାରେ ପଢୁଛନ୍ତି ସେମାନେ ଭବିଷ୍ୟତରେ ଅନ୍ୟ ଅସହାୟ ପିଲାଙ୍କୁ ମାଗଣାରେ ପଢ଼ାଇବେ ବୋଲି ନୀତିନ ସେମାନଙ୍କ ପାଖରେ ଏକ ସର୍ତ୍ତ ରଖୁଛନ୍ତି। ଏଭଳି ବ୍ୟବସ୍ଥାକୁ ସମ୍ପ୍ରସାରିତ କରିବା ସକାଶେ ୨୦୧୮ରେ ଏକ ନୟି ରାହା ଫାଉଣ୍ଡେଶନ ଗଠନ କରିଛନ୍ତି। ତାଙ୍କ ମା’ ଅନ୍ୟ ଘରେ କାମ କରି ସେହି ଆୟରେ ନୀତିନଙ୍କୁ ବହୁ କଷ୍ଟରେ ପଢାଇଛନ୍ତି। ନୀତିନ ପିଲାବେଳୁ ବି ଅଭାବ ଅନଟନକୁ ଖୁବ୍ ନିକଟରୁ ଦେଖିଛନ୍ତି। ତେବେ ବହୁ କଷ୍ଟରେ ନୀତିନ ଆଇନରେ ଡିଗ୍ରୀ କରିବା ପରେ ଅସହାୟ ପିଲାମାନେ ସୁବିଧାରେ ଶିକ୍ଷା ଲାଭ କରିବା ପାଇଁ ଏଭଳି ଅଭିଯାନ ଚଳାଇଛନ୍ତି।
