ସହରରେ ରହି ଦୀର୍ଘ ବର୍ଷ ଧରି ପାଣି ବାବଦରେ ଟଙ୍କାଟିଏ ବ୍ୟୟ ନ କରିବା କଥା ଶୁଣି ଆଶ୍ଚର୍ଯ୍ୟ ଲାଗୁଥିଲେ ବି ସତ। ଏମିତି କରୁଛନ୍ତି ଆନ୍ଧ୍ରପ୍ରଦେଶ ବିଶାଖାପାଟଣା ସହରର ଜଗନ୍ନାଧାରାଜୁ ନଗର କଲୋନିର ବାସିନ୍ଦା। ସେମାନେ ୨୭ ବର୍ଷ ମଧ୍ୟରେ ବୁନ୍ଦାଏ ପାଣି ବି କିଣିନାହାନ୍ତି। କଲୋନିରେ ୧,୫୦୦ ଘର ରହିଛି। ସେଠାରେ ଜଗନ୍ନାଧାରାଜୁ ନଗର ବାସିନ୍ଦା ବିକାଶ ସଂଘ (ଆର୍ଡବ୍ଲ୍ୟୁଏ)ର ସଭାପତି କେ.ଏସ୍.ଆର୍ ମୂର୍ତ୍ତି କଲୋନି ବାସିନ୍ଦାଙ୍କ ସହଯୋଗରେ ଜଳକୁଣ୍ଡ ନିର୍ମାଣ କରି ବର୍ଷାଜଳ ସଂରକ୍ଷଣ କରୁଛନ୍ତି। କଲୋନିର ବହୁ ପରିତ୍ୟକ୍ତ କୂଅ ଓ ସମ୍ପ୍କୁ ବି ପାଣିକୁଣ୍ଡରେ ପରିଣତ କରିଛନ୍ତି ମୂର୍ତ୍ତି। ଛାତରୁ ପାଇପ ଯୋଗେ ସଂଯୋଗ କରାଯାଇ ପାଣି ସଂଗ୍ରହ କରାଯାଉଛି। ଏହି ପାଣିକୁ ବିଶୋଧନ କରାଯାଇ ଲୋକମାନେ ପିଇବା ଲାଗି ବ୍ୟବହାର କରୁଛନ୍ତି। ଏହାବାଦ୍ କଲୋନି ରାସ୍ତାର ଦୁଇ ପାର୍ଶ୍ୱରେ ବି ୧୫ଟି ୪ଫୁଟ ଲମ୍ବ ୪ଫୁଟ ଚଉଡ଼ା ଓ ୫ ଫୁଟ୍ ଗଭୀରର କୁଣ୍ଡ ନିର୍ମାଣ କରାଯାଇ ବର୍ଷାଜଳ ସଂଗ୍ରହ ହେଉଛି। ପ୍ରତିଟି କୁଣ୍ଡ ନିର୍ମାଣ କରିବାରେ ବ୍ୟୟ କରୁଛନ୍ତି ୭,୦୦୦ଟଙ୍କା। ଏହି ପାଣିକୁ ପରିଷ୍କାର କରିବା ପାଇଁ କୁଣ୍ଡ ଭିତରେ ବଜୁରି ଗୋଡି, ବାଲି ଓ ଛୋଟ ପଥରଖଣ୍ଡ ରଖାଯାଇ ବିଭିନ୍ନ କାର୍ଯ୍ୟରେ ଲଗାଯାଉଛି। ଏହାଦ୍ୱାରା ବର୍ଷାଦିନେ ରାସ୍ତାରେ ବର୍ଷାଜଳ ଅଟକି ସମସ୍ୟା ସୃଷ୍ଟି କରୁନାହଁିି କି ଖରାଦିନେ ପାଣି ସମସ୍ୟା ଦେଖାଯାଉନି ବୋଲି କହନ୍ତି ମୂର୍ତ୍ତି। ବିଶାଖାପାଟଣା ସହରର ଅନ୍ୟ ସ୍ଥାନରେ ୨୦୦ ଫୁଟ୍ ଗଭୀରରେ ଭୂତଳ ଜଳସ୍ତର ରହୁଥିବାବେଳେ ଏହି କଲୋନି ଓ ତା’ ଆଖପାଖରେ ୫୦ଫୁଟ୍ରେ ଜଳସ୍ତର ରହୁଛି। ଏହି କାର୍ଯ୍ୟ ଲାଗି ଆର୍ଡବ୍ଲ୍ୟୁଏକୁ କେନ୍ଦ୍ର ଜଳ ସଂଶାଧନ ମନ୍ତ୍ରଣାଳୟ ପକ୍ଷରୁ ପୁରସ୍କୃତ କରାଯାଇଛି। ବର୍ଷକୁ ଏହି କୁଣ୍ଡଗୁଡ଼ିକରେ ୭.୪୫ ଲକ୍ଷ ଲିଟର ପାଣି ସଂରକ୍ଷଣ କରାଯାଇପାରୁଛି।
