ଡିଜିଟାଲ ଯୁଗରେ ଡାକ କଥା ଭାବିବାକୁ କାହା ପାଖରେ ସମୟ ନ ଥିବାବେଳେ ଜଣେ ଯୁବତୀ ଚିଠି ମାଧ୍ୟମରେ ୪୩ଟି ଦେଶରେ ବନ୍ଧୁତା ସ୍ଥାପନ କରିବା ଆଶ୍ଚର୍ଯ୍ୟ ଲାଗୁଥିଲେ ବି ସତ। ଏହା କେରଳର ରେଜ୍ବିନ ଅବ୍ବାଙ୍କ ଦ୍ୱାରା ସମ୍ଭବ ହୋଇଛି। ରେଜ୍ବିନ ରହନ୍ତି ମଲାପୁରମ ଜିଲାର ଆରିକୋଡେ ଗାଁରେ। ତାଙ୍କ ବୟସ ୧୮। ବଡ଼ କଥା ହେଉଛି, ସେ ଗାଁ ବାହାରକୁ ନ ଯାଇ ୩ ବର୍ଷ ହେବ ଚିଠି ମାଧ୍ୟମରେ ବନ୍ଧୁତା ସ୍ଥାପନ କରିଚାଲିଛନ୍ତି। ମୁଖ୍ୟତଃ ସାମାଜିକ ଗଣମାଧ୍ୟମରୁ ବିଭିନ୍ନ ଦେଶର ଲୋକଙ୍କ ଠିକଣା ଯୋଗାଡ଼ କରି ସେମାନଙ୍କ ନିକଟକୁ ଚିଠି ଲେଖୁଛନ୍ତି। ଏବେ ତାଙ୍କ ବନ୍ଧୁତ୍ୱର ଖିଅ ୪୩ଟି ଦେଶକୁ ଲମ୍ବି ସାରିଲାଣି ଓ ଆଗକୁ ଆହୁରି ଅଧିକ ଦେଶକୁ ଏହାକୁ ବଢ଼ାଇବା ଲାଗି ଲକ୍ଷ୍ୟ ରଖିଛନ୍ତି ବୋଲି କହନ୍ତି ରେଜ୍ବିନ। ତାଙ୍କୁ ୮ ବର୍ଷ ହୋଇଥିଲାବେଳେ ତାଙ୍କ ମାତାପିତାଙ୍କ ବିଚ୍ଛେଦ ହୋଇଥିଲା। ସେ ବିଷାଦ ମଧ୍ୟକୁ ଚାଲିଯାଇଥିଲେ। ତାଙ୍କୁ ଅନ୍ୟ ପିଲାମାନେ ଅନାଥ ବୋଲି ସମ୍ବୋଧନ କରୁଥିଲେ। ପରେ ଚିଠି ଲେଖି ମାନସିକ ଚାପ ଲାଘବ କରିବା ସହ ଏହା ମାଧ୍ୟମରେ ବନ୍ଧୁତା ବଢ଼ାଇବାରେ ଆରମ୍ଭ କରିଥିଲେ। ପ୍ରଥମେ ୨୦୧୮ରେ ମେକ୍ସିକୋର ସାରାଙ୍କୁ ଚିଠି ଦେଇ ତାଙ୍କଠାରୁ ଚିଠି ପାଇବା ପରେ ରେଜ୍ବିନ ତାଙ୍କୁ ପ୍ରଥମ ବନ୍ଧୁ ଭାବେ ଗ୍ରହଣ କରିଥିେଲେ। ସେବେଠାରୁ ସେ ବିଦେଶକୁ ୭୦ଟି ଚିଠି ଲେଖିଛନ୍ତି ଓ ସେତିକିଟି ଚିଠି ମଧ୍ୟ ପାଇଛନ୍ତି। ଏହାଦ୍ୱାରା ରେଜ୍ବିନ ଓ ସେମାନଙ୍କ ମଧ୍ୟରେ ବନ୍ଧୁତା ଦୃଢ଼ ହୋଇଛି।
