ମାନସିକ ଅନଗ୍ରସର ଓ ବିଷାଦଗ୍ରସ୍ତଙ୍କ ପାଇଁ ସାହାରା ପାଲଟିଛନ୍ତି ସୁମିତ୍ରା ଗାର୍ଗାଇ। ହୋ’ ଆଦିବାସୀ ସମ୍ପ୍ରଦାୟର ସୁମିତ୍ରା ରହନ୍ତି ଝାଡ଼ଖଣ୍ଡର ନାରଙ୍ଗ ଗାଁରେ। ନବମ ପାସ୍ ପରେ ସେ ବିବାହ କରି ବହୁ ବିପର୍ଯ୍ୟୟକୁ ସାମ୍ନା କରିଥିଲେ। ୩ କନ୍ୟା ସନ୍ତାନର ଜନନୀ ହେବାପରେ ପୁତ୍ର ସନ୍ତାନକୁ ନେଇ ଶାଶୁଘର ପକ୍ଷରୁ ବହୁ ନିର୍ଯାତନାକୁ ସାମ୍ନା କରିଛନ୍ତି। ପ୍ରତିକୂଳ ପରିସ୍ଥିତିରେ ସେ ବିଷାଦଗ୍ରସ୍ତ ହୋଇପଡ଼ିବା ପରେ ସାମାଜିକ ସଙ୍ଗଠନ ‘ଏକଜୁଟ୍’ ଦ୍ୱାରା ଏଥିରୁ ମୁକୁଳିଥିଲେ। ପରେ ଏଭଳି ପରିସ୍ଥିତିକୁ ସାମ୍ନା କରୁଥିବା ଲୋକଙ୍କ ଜୀବନରେ ପରିବର୍ତ୍ତନ ଆଣିବା ପାଇଁ ‘ଏକଜୁଟ’ ମାଧ୍ୟମରେ କାର୍ଯ୍ୟ ଆରମ୍ଭ କରିଥିଲେ। ଏବେ ସେ ଝାଡ଼ଖଣ୍ଡର ବହୁ ଗାଁରେ ମାନସିକ ଅନଗ୍ରସର ଓ ବିଷାଦଗ୍ରସ୍ତ ଲୋକମାନଙ୍କ ପାଇଁ କାର୍ଯ୍ୟ କରୁଛନ୍ତି। କେବଳ ଏତିକି ନୁହେଁ, ସେ ମାତୃ ଓ ଶିଶୁ ମୃତ୍ୟୁହାର ହ୍ରାସ କରିବାରେ ସକ୍ଷମ ହୋଇଛନ୍ତି। ନିୟମିତ ଗାଁ ଗାଁ ବୁଲି ମାନସିକ ଅନଗ୍ରସରଙ୍କୁ ଭେଟୁଛନ୍ତି ଓ ସେମାନଙ୍କ ଚିକିତ୍ସା, ଖାଦ୍ୟ ତଥା ପରିବେଶଗତ ସମସ୍ୟାଗୁଡ଼ିକୁ ଅନୁଧ୍ୟାନ କରୁଛନ୍ତି। ‘ଏକଜୁଟ୍’ର ଚିକିତ୍ସକମାନଙ୍କୁ ନେଇ ସ୍ବାସ୍ଥ୍ୟ ଶିବିର କରୁଛନ୍ତି। ବିଷାଦ ଏବେ ଏକ ନୀରବ ମହାମାରୀ ସାଜିଥିବାରୁ ସୁମିତ୍ରା ଲୋକମାନଙ୍କୁ ଏଥିରୁ ମୁକାଳି ଆତ୍ମହତ୍ୟା ହ୍ରାସ କରିବାକୁ ସକ୍ଷମ ହୋଇଛନ୍ତି। ଏବେସୁଦ୍ଧା ସୁମିତ୍ରା ଶତାଧିକ ମାନସିକ ଅନଗ୍ରସରଙ୍କ ଆଶାବାଡ଼ି ସାଜିଛନ୍ତି।
