ହାତୀ ଓ ମଣିଷ ମଧ୍ୟରେ ଲାଗିରହୁଥିବା ସଂଘର୍ଷକୁ କମ୍ କରିବାରେ ପଶ୍ଚିମବଙ୍ଗର ଜଣେ ଶିକ୍ଷକଙ୍କ ଅବଦାନ ନିଶ୍ଚୟ ପ୍ରେରଣାଦାୟକ। ଜଲପାଇଗୁଡ଼ି ଜିଲାର ମାଲ୍ବଜାର ପ୍ରାଥମିକ ବିଦ୍ୟାଳୟର ଶିକ୍ଷକ ଏସ୍.ପି. ପାଣ୍ଡେ ବନ ଅଧିତ୍କାରୀ, ପଞ୍ଚାୟତ ଏବଂ ଚା ବଗିଚାର ମାଲିକମାନଙ୍କ ସହଯୋଗରେ ଏହି କାର୍ଯ୍ୟ କରୁଛନ୍ତି। ଶିକ୍ଷାଦାନ କରିବା ସହ ବଳକା ସମୟରେ ପାଣ୍ଡେ ଗତ ଦୁଇବର୍ଷ ହେବ ପାଞ୍ଚଟି ହାତୀ କରିଡରରେ ସଚେତନତାଭିତ୍ତିକ କାର୍ଯ୍ୟକ୍ରମ ଚଳାଇ ହାତୀ-ମଣିଷ ସଂଘର୍ଷ କମ୍ କରିପାରିଛନ୍ତି। ଏଥିପାଇଁ ଓ୍ବାଇଲ୍ଡ ଟ୍ରଷ୍ଟ ଅଫ୍ ଇଣ୍ଡିଆ ତାଙ୍କୁ ଗ୍ରୀନ୍ କରିଡର ଚାମ୍ପିୟନ ଆଖ୍ୟା ପ୍ରଦାନ କରିଛି। ମେକି ନଦୀ କଡ଼େ କଡ଼େ ପଶ୍ଚିମକୁ ଓ ଭାରତ-ନେପାଳ ସୀମା ଦେଇ ପୂର୍ବକୁ ସଙ୍କେଶ ନଦୀ ଯାଏ ବ୍ୟାପ୍ତ ପଶ୍ଚିମବଙ୍ଗର ନର୍ଦ୍ଦର୍ନ ଏଲିଫ୍ୟାଣ୍ଟ୍ ରେଞ୍ଜ୍ରେ ପ୍ରାୟ ୫୦୦ ହାତୀ ରହିଛନ୍ତି। ୨୦୦୯ରୁ ୨୦୧୮ ମଧ୍ୟରେ ହାତୀ-ମଣିଷ ଲଢ଼େଇରେ ୧୧୬ ଲୋଙ୍କର ମୃତ୍ୟୁ ଘଟିଥିବାବେଳେ ୨୧୭ ଲୋକ ଆହତ ହୋଇଥିଲେ। ଏହି ସମୟ ମଧ୍ୟରେ ପ୍ରତିବର୍ଷ ହାରାହାରି ୭ ହାତୀଙ୍କର ମୃତ୍ୟୁ ଘଟୁଥିଲା। କିନ୍ତୁ ଗତ ଦୁଇବର୍ଷ ମଧ୍ୟରେ ଏଭଳି ମୃତ୍ୟୁକୁ ସେ ୫୦% କମ୍ କରିପାରିଛନ୍ତି। ସେ ସ୍ପୋଆର ନାମକ ଏକ ସଂସ୍ଥା ଗଠନ କରି ତା’ମାଧ୍ୟମରେ ଏହି ଅଭିଯାନ ଚଳାଇଛନ୍ତି। ଏଥିପାଇଁ ପାଣ୍ଡେ ୨୬ଟି ଦଳ ଗଠନ କରିଛନ୍ତି। ପ୍ରତ୍ୟେକ ଦଳରେ ୬ ଜଣ ସ୍ଥାନୀୟ ସ୍ବେଚ୍ଛାସେବୀ ରହିଛନ୍ତି।
