ରାସ୍ତାରେ ଭିକ୍ଷାବୃତ୍ତି କରୁଥିବା ପିଲାଙ୍କ ପାଇଁ ଆଶାର ଆଲୋକ ପାଲଟିଛନ୍ତି ଦିଲ୍ଲୀର କୃଷ୍ଣ କୁମାର। ଏଭଳି ପିଲାଙ୍କୁ ସେ ରାସ୍ତାକଡ଼ରେ ପଢ଼ାଉଛନ୍ତି। ସ୍କୁଲ କହିଲେ ଭଲ ଘର ନାହିଁ କି ଚିତ୍ରିତ କାନ୍ଥ ନାହିଁ, ପିଲାମାନେ ତମ୍ବୁତଳେ ଏକାଠି ବସି ପଢୁଛନ୍ତି। କୃଷ୍ଣ ସେମାନଙ୍କୁ ପଢ଼ାଇବା ସହ ସବୁ ପ୍ରକାର ସାହାଯ୍ୟ ଯୋଗାଇ ଦେଉଛନ୍ତି। ସେ ଦିଲ୍ଲୀ ସରକାରୀ ସ୍କୁଲର ଜଣେ ଶିକ୍ଷକ ଏବଂ ସ୍କୁଲ ଡ୍ୟୁଟି ଶେଷକରି ସେମାନଙ୍କୁ ସନ୍ଧ୍ୟାରେ ମାଗଣାରେ ପଢ଼ାଉଛନ୍ତି।
ସେ ପ୍ରଥମେ ଜଣେ ଝିଅକୁ ଭିକ୍ଷା ମାଗୁଥିବା ଦେଖି ତାଙ୍କୁ ବହି ଦେଇ ପଢ଼ାଇବା ଆରମ୍ଭ କରିଥିଲେ। ପରେ ଅନ୍ୟ ପିଲାମାନେ ଆସି ପଢ଼ିବାକୁ ବସିଗଲେ। ଏବେ ପ୍ରତି ସନ୍ଧ୍ୟାରେ ୬୦- ୭୦ ପିଲା ପଢ଼ୁଛନ୍ତି। କୃଷ୍ଣ ସେମାନଙ୍କ ନାମ ମଧ୍ୟ ସରକାରୀ ସ୍କୁଲରେ ଲେଖାଉଛନ୍ତି।
ରାସ୍ତାକଡ଼ରେ ପିଲାଙ୍କୁ ପଢ଼ାଇବା ଆରମ୍ଭ କରିବା ପରେ ସାରା ଭାରତରୁ ରାଶନ କିଟ୍, ପାଠ୍ୟ ଉପକରଣ ଆଦି ସାହାଯ୍ୟ ମିଳୁଛି। କୃଷ୍ଣ କୁମାରଙ୍କ ଘର ରାଜସ୍ଥାନ ହନୁମାନଗଡ଼ରେ। ଆର୍ଥିକ ଅଭାବରୁ ସେ ପିଲାଦିନେ ପଢ଼ା ଛାଡ଼ି ଦେଇଥିତ୍ଲେ। ପରେ ସେ ପୁନର୍ବାର କଠିନ ପରିଶ୍ରମ କରି ରୋଜଗାର କରିବା ସହ ପଢ଼ି ଆଗକୁ ବଢ଼ିଛନ୍ତି ଓ ଦିଲ୍ଲୀରେ ଶିକ୍ଷକ ହୋଇଛନ୍ତି।