ବୟସ ୭୦ ଛୁଇଁଲାଣି। ଚିକିତ୍ସା କରିବାର ଇଚ୍ଛାଶକ୍ତି ଆଗରେ ବୟସ ହାର ମାନିଛି। ଏଭଳି ଜଣେ ସେବାରେ ସମର୍ପିତ ଡାକ୍ତର ହେଉଛନ୍ତି ଅରୁଣୋଦୟ ମଣ୍ଡଳ। ସେ ପଶ୍ଚିମବଙ୍ଗର ଦୁର୍ଗମ ସୁନ୍ଦରବନ ଅଞ୍ଚଳକୁ ସପ୍ତାହାନ୍ତରେ ଗସ୍ତକରି ଲୋକଙ୍କୁ ମାଗଣାରେ ଚିକିତ୍ସା ସେବା ଯୋଗାଇ ଦେଉଛନ୍ତି। ଡ. ମଣ୍ଡଳ ରହୁଛନ୍ତି କୋଲକାତାରେ। ସେଠାରୁ ପ୍ରତି ଶନିବାର ୧୬୦ କି.ମି. ଗସ୍ତକରି ସୁନ୍ଦରବନସ୍ଥିତ ତାଙ୍କ ସୁଜାନ କ୍ଲିନିକ୍ରେ ପହଞ୍ଚୁଛନ୍ତି। ଏହି କାର୍ଯ୍ୟ ସେ ୨୩ ବର୍ଷ ହେଲା କରିଆସୁଛନ୍ତି ଓ ପ୍ରତିବର୍ଷ ସେ ୧୨,୦୦୦ରୁ ଊର୍ଦ୍ଧ୍ୱ ରୋଗୀଙ୍କୁ ଚିକିତ୍ସା ଯୋଗାଇ ଦେଉଛନ୍ତି। ଡ. ମଣ୍ଡଳ ଏମ୍ବିବିଏସ୍ ଶେଷକରି କୋଲକାତାର ଏକ ଶିଶୁ ଡାକ୍ତରଖାନାରେ ଯୋଗଦେଇ କିଛି ବର୍ଷ କାର୍ଯ୍ୟ କରିଥିଲେ। ୧୯୮୦ରେ ତାହାକୁ ଛାଡ଼ି ନିଜେ ଲୋକଙ୍କ ସେବା ଆରମ୍ଭ କରିବା ସହ ୨୦୦୦ରେ ସୁନ୍ଦରବନ ଅଞ୍ଚଳରେ ମାଗଣା ଚିକିତ୍ସା ଆରମ୍ଭ କରିଥିଲେ।
