ବୁଲାକୁକୁରଙ୍କ ସେବାରେ ସମର୍ପିତ ଜଣେ ମହିଳା ହେଉଛନ୍ତି ଉଦୟପୁରର ଡା. ମାଲା। ତାଙ୍କୁ ବୟସ ଏବେ ୩୯। ମାଲା ୧୪ ବର୍ଷ ହେଲା ରାସ୍ତାରେ ରହୁଥିବା କୁକୁରମାନଙ୍କ ସେବା କରୁଛନ୍ତି। ଏଯାବତ ସେ ୨୫୦୦ ବୁଲାକୁକୁରଙ୍କୁ ଉଦ୍ଧାର କରି ନୂଆ ଜୀବନ ଦେଇସାରିଲେଣି। ସେ ଉଦୟପୁର ସହର ଓ ନିକଟବର୍ତ୍ତୀ ଗାଁଗୁଡ଼ିକରୁ ଆହତ ଓ ରୋଗଗ୍ରସ୍ତ କୁୁକରଙ୍କୁ ଉଦ୍ଧାର କରି ସେମାନଙ୍କ ଚିକିତ୍ସା କରିଥାନ୍ତି। ଦୁର୍ଘଟଣାରୁ ବଞ୍ଚାଇବା ପାଇଁ କୁକୁରମାନଙ୍କୁ ରେଡିୟମ ବେଲ୍ଟ ପିନ୍ଧାଉଛନ୍ତି। ଏହିସବୁ କାର୍ଯ୍ୟ ଚାଲୁଛି ଡା.ମାଲାଙ୍କ ଦ୍ୱାରା ପ୍ରତିଷ୍ଠିତ ‘ଆନିମଲ ପ୍ରୋଟେକଶନ ସୋସାଇଟି’ ଦ୍ୱାରା। ମାଲାଙ୍କ ସହ ଏବେ ତାଙ୍କର ଅନେକ ବନ୍ଧୁ ଯୋଡ଼ି ହୋଇ ଏହି କାର୍ଯ୍ୟରେ ସହଯୋଗ କରୁଛନ୍ତି। କେବଳ କୁୁକୁର ନୁହନ୍ତି ସେ ମଧ୍ୟ ବିଭିନ୍ନ ସ୍ଥାନରୁ ଆହତ ପକ୍ଷୀମାନଙ୍କୁ ଉଦ୍ଧାର କରୁଛନ୍ତି। ସେ ପଶୁପକ୍ଷୀଙ୍କ ସୁରକ୍ଷା ଲାଗି ଏଯାବତ ୧୦୦ରୁ ଊର୍ଦ୍ଧ୍ୱ ସଚେତନତା ଅଭିଯାନ କରିସାରିଲେଣି।
