ବିଦେଶ ଭ୍ରମଣ କରିବା ଅନେକଙ୍କ ସ୍ବପ୍ନ। ଆଉ
ଏଥିପାଇଁ ଲୋଡ଼ାହୁଏ ଭିଜା। ହେଲେ ଆପଣ ଜାଣନ୍ତିକି ଏମିତି କେତେକ ଦେଶ ରହିଛି, ଯେଉଁଠାରେ ବୁଲିବା ଲାଗି ଭାରତୀୟଙ୍କୁ ଆବଶ୍ୟକ ହୁଏ ନାହିଁ ଭିଜା।
ଜାଣିବା ଏ ସମ୍ପର୍କରେ…
୧. ନେପାଳ: ଭାରତର ପଡ଼ୋଶୀ ଦେଶ ନେପାଳରେ ରହିଛି ପଶୁପତିନାଥ ମନ୍ଦିର, ପୋଖରା, ଅନ୍ନପୂର୍ଣ୍ଣା ମାସିଫ୍ଠାରୁ ଆରମ୍ଭ କରି ଏଭରେଷ୍ଟ ପର୍ଯ୍ୟନ୍ତ ଅନେକ ପର୍ଯ୍ୟଟନ ସ୍ଥାନ। ଯାହାକୁ ଦେଖିବା ଲାଗି ବିଭିନ୍ନ ଦେଶ ସହ ଆମ ଦେଶରୁ ମଧ୍ୟ ଅନେକ ପର୍ଯ୍ୟଟକ ସେଠାକୁ ଯାଆନ୍ତି। ତେବେ ଜାଣନ୍ତିକି, ନେପାଳ ସହିତ ଆମ ଦେଶର ବନ୍ଧୁତ୍ୱପୂର୍ଣ୍ଣ ସମ୍ପର୍କ ଥିବାରୁ ୧୯୫୦ ମସିହାରେ ‘ଇଣ୍ଡୋ-ନେପାଳ ଟ୍ରିଟି ଅଫ୍ ପ୍ରିସ୍ ଆଣ୍ଡ ଫ୍ରେଣ୍ଡଶିପ୍’ ଗଠନ କରାଯାଇଥିଲା। ଏହା ଅନୁଯାୟୀ ସେଠାକୁ ଯିବା ଲାଗି ଭାରତୀୟଙ୍କୁ ଭିଜା ଆବଶ୍ୟକ ହୋଇ ନ ଥାଏ।
୨. ମରିସସ୍: ଏସିଆ ମହାଦେଶର ସୁନ୍ଦର ଦେଶଗୁଡ଼ିକ ମଧ୍ୟରେ ମରିସସ୍ର ନାମ ରହିଛି। ଏଠାରେ ଥିବା ଏକାଧିକ ମନୋରମ ସି’ବିଚ୍, ଓ୍ବାଟର ଫଲ୍ ଏବଂ ଅନେକ ପ୍ରାକୃତିକ ସୌନ୍ଦର୍ଯ୍ୟରେ ପରିପୂର୍ଣ୍ଣ ସ୍ଥାନ ପର୍ଯ୍ୟଟକଙ୍କୁ ଆକୃଷ୍ଟ କରିଥାଏ। ଏହା ବ୍ୟତୀତ ସେଠାକାର ଓ୍ବାଟର ସ୍ପୋଟର୍ସ ମଧ୍ୟ ସଭିଙ୍କ ଲାଗି ଅନ୍ୟତମ ଆକର୍ଷଣ। ଏହି ଦେଶ ସହ ଭାରତର ଭଲ ସମ୍ପର୍କ ଥିବାରୁ ସେଠାକୁ ବୁଲିଯିବା ଲାଗି ଭିଜାର ଆବଶ୍ୟକତା ପଡ଼େନି। କେବଳ ପାସ୍ପୋର୍ଟ ଦେଖାଇ ସେଠାରେ ୬୦ ଦିନ ପର୍ଯ୍ୟନ୍ତ ରହିବାକୁ ଅନୁମତି ମିଳିଥାଏ।
୩. ଭୁଟାନ୍: ଦକ୍ଷିଣ ଏସୀୟ ଦେଶ ଭୁଟାନ୍ ହିମାଳୟ ପାଦ ଦେଶରେ ଥିବାରୁ ପ୍ରାକୃତିକ ସୌନ୍ଦର୍ଯ୍ୟରେ ପରିପୂର୍ଣ୍ଣ। ସେଠାରେ ଥିବା ପାରୋ ତକ୍ସାଙ୍ଗ୍, ପୁନାଖା ଜୋଙ୍ଗ୍, ତାସିଛୋ ଜୋଙ୍ଗ୍, ରିନ୍ପଙ୍ଗ୍ ଜୋଙ୍ଗ୍ ଆଦି ପର୍ଯ୍ୟଟକଙ୍କୁ ବେଶ୍ ଆକର୍ଷଣ କରିଥାଏ। ଏହି ଦେଶକୁ ବୁଲିଯିବା ପାଇଁ ମଧ୍ୟ ଭାରତୀୟଙ୍କୁ ଭିଜାର ଆବଶ୍ୟକତା ପଡ଼ି ନ ଥାଏ। ସେଠାରେ ପାସ୍ପୋର୍ଟ, ଭୋଟର ଆଇଡି କିମ୍ବା ଆଧାରକାର୍ଡ ଭଳି ପ୍ରମାଣ ପତ୍ର ହିଁ ଯଥେଷ୍ଟ।
