ଫୁଲବାଣୀ,୨।୮(ରାକେଶ କୁମାର ରାଉତ): କନ୍ଧମାଳ ଜିଲାରେ ବିଗତ ତିନି ଦିନ ହେବ ବର୍ଷା ଲାଗି ରହିଛି ା ମଙ୍ଗଳବାର ଅପରାହ୍ନରୁ ଜିଲାରେ ଲଗାଣ ବର୍ଷା ଜାରି ରହିଛି ା ପ୍ରବଳ ବର୍ଷା ହେତୁ ସମ୍ପୂର୍ଣ୍ଣ ଜନଜୀବନ ଅସ୍ତବ୍ୟସ୍ତ ହୋଇପଡିଛି। ଲୋକେ ଘରୁ ବାହାରକୁ ବାହାରି ପାରୁନାହାନ୍ତି ା ଫୁଲବାଣୀ ସହରର ଅନେକ ୱାର୍ଡରେ ଥିବା ଘରେ ବର୍ଷା ଜଳ ପସି ଯାଇଛି। ଲୋକେ ଅକଥନୀୟ ଯନ୍ତ୍ରଣା ଭୋଗୁଛନ୍ତି। ସହରରେ ଡ୍ରେନ ଅବରୋଧ ଯୋଗୁ ଏଭଳି ପରିସ୍ଥିତି ସୃଷ୍ଟି ହୋଇଛି ା ଏପରିକି କିଛି ଲୋକଙ୍କ ଘରେ ଆଣ୍ଠୁଏ ଯାଏ ପାଣି ଠିଆ ହୋଇ ରହିଛି ା ରାତିରେ ଘରେ ରହିବା ପାଇଁ କିଛି ଲୋକେ ପମ୍ପ ସାହାଯ୍ୟରେ ପାଣି ବାହାର କରୁଛନ୍ତି ା ସହରର ରାସ୍ତା ଉପରେ ପ୍ରାୟ ଦୁଇ ଫୁଟ ଉପରେ ବର୍ଷା ଜଳ ପ୍ରବାହିତ ହୋଇଛି। ନଦୀଖଣ୍ଡି ସାହିରେ ଥିବା ସାଲୁଙ୍କୀ ନଦୀ ଡ୍ୟାମ ଉପରେ ବନ୍ୟାଜଳ ପ୍ରବାହିତ ହେବାରୁ ୨ ନଂ ୱାର୍ଡର ଡାମିଗାଁ, ଡାକପାଲା ଭଳି ଅଞ୍ଚଳବାସୀ ଏକ ପ୍ରକାର ବିଚ୍ଛିନ୍ନ ହୋଇ ରହିଛନ୍ତି ା
ସେହିପରି ଜିଲାର ଟିକାବାଲି, ଫିରିଙ୍ଗିଆ, କ.ନୂଆଗାଁ ଅଞ୍ଚଳରେ ପ୍ରବଳ ବର୍ଷା ହୋଇଥିବା ଜଣାପଡିଛି ା ଫିରିଙ୍ଗିଆ ବ୍ଲକର ବାଲନ୍ଦାପଡାଠାରେ ଦୁର୍ଗାମୁଣ୍ଡା ନାଳର ପୋଲ ଉପରେ ପ୍ରାୟ ୮ ଫୁଟ ଉଚ୍ଚର ବନ୍ୟାଜଳ ପ୍ରବାହିତ ହେଉଛି। ଫଳରେ ସମ୍ପୂର୍ଣ୍ଣ କୋଏରମାଣ୍ଡୁ ଓ ପାହିରାଜୁ ପଞ୍ଚାୟତକୁ ଯାତାୟାତ ଠପ ହୋଇ ଯାଇଛି। ଏହି ପୋଲ ଦେଇ ଆଜି ଦୁଇ ଜଣ ଯୁବକ ଏକ ବାଇକରେ ଯାଉଥିବା ବେଳେ ବନ୍ୟା ଜଳରେ ଭାସି ଯାଇଥିଲେ। କୌଣସି ପ୍ରକାରେ କୂଳରେ ପହଁଚି ଥିଲେ ବି ବାଇକଟି ପାଣିରେ ଭାସି ଯାଇଛି ା ସେହିପରି ବାଘଡଙ୍ଗେରୀ ନାଳରେ ପାଣି ଆସିବାରୁ ତାଳପଙ୍ଗା, ବଟାବାହାଲି, ଲମ୍ବାଖେତା, କେନ୍ଦୁଗୁଡା ଭଳି ୮ ଖଣ୍ଡ ଗାଁ ବାହ୍ୟ ଜଗତରୁ ବିଚ୍ଛିନ୍ନ ହୋଇଥିବା ଖବର ମିଳିଛି। କ୍ରାଣ୍ଡିବାଲି ପଞ୍ଚାୟତରେ ବାଘନଦୀରେ ବନ୍ୟାଜଳ ଆସି ଡଙ୍ଗିମେଣ୍ଡି ସମେତ ୩ ଖଣ୍ଡ ଗାଁ ଜଳବନ୍ଦୀ ହୋଇଛି। ସଲାଗୁଡା ପଞ୍ଚାୟତର ଅନେକ ଗ୍ରାମ ସହିତ ଡିଣ୍ଡିରା ଗାଁ ପଞ୍ଚାୟତର ଟେଲାପାଲି ଓ ଗୁଖୋଲ ଗ୍ରାମ ପାଣି ଘେରରେ ରହିଛି। ଲୁଇସିଂ ନାଳରେ ଜଳସ୍ତର ବୃଦ୍ଧି ପାଇବାରୁ ଅନେକ ଘର ଜଳବନ୍ଦୀ ହୋଇଛି। କଟିମାସ୍କା ନଦୀଖଣ୍ଡିଠାରେ ଏକ କଲଭର୍ଟ ଭାଙ୍ଗି ଯିବା ସହ ଲୁଇସିଂ-କଣ୍ଟାମାଳ ରାସ୍ତା ପୋଲ ଉପରେ ବନ୍ୟାଜଳ ପ୍ରବାହିତ ହେବାରୁ ବୌଦ୍ଧ ଜିଲାକୁ ଯାତାୟାତ ବନ୍ଦ ରହିଛି।
ଜିଲା ଜରୁରୀକାଳୀନ ବିଭାଗ ପକ୍ଷରୁ ମିଳିଥିବା ସୁଚନା ଅନୁସାରେ ଜିଲାରେ ମୋଟ ୯୯୩.୬ ମିମି ବର୍ଷା ରେକର୍ଡ କରାଯାଇଛି। କ.ନୂଆଗାଁ ବ୍ଲକରେ ସର୍ବାଧିକ ୧୫୮ ମିମି ବର୍ଷା ହୋଇଥିବା ବେଳେ ଫିରିଙ୍ଗିଆରେ ୧୩୪, ବାଲିଗୁଡ଼ାରେ ୧୨୦, ତୁମୁଡିବନ୍ଧରେ ୧୧୦.୬, କୋଟଗଡରେ ୧୦୯, ଫୁଲବାଣୀରେ ୧୦୨, ରାଇକିଆରେ ୭୩ ଓ ଟିକାବାଲିରେ ୭୨ ମିମି ବର୍ଷା ହୋଇଛି ା
