ନୂଆଦିଲ୍ଲୀ,୯।୧୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମର୍ନିଂ କନସଲ୍ଟର ଗ୍ଲୋବାଲ ଲିଡର ଆପ୍ରୁଭାଲ ରେଟିଂ ଟ୍ରାକର ଉପରେ ପ୍ରାଧାନ୍ୟ ବିସ୍ତାର କରିଛନ୍ତି। ୭୬ପ୍ରତିଶତ ଅନୁମୋଦନ ସହିତ ବିଶ୍ୱର ୨୨ଲୋକପ୍ରିୟ ନେତାଙ୍କ ତାଲିକାରେସେ ଶୀର୍ଷରେ ଅଛନ୍ତି।
ଏହି ତାଲିକାରେ ଆମେରିକାର ରାଷ୍ଟ୍ରପତି ଜୋ ବାଇଡେନ, ବ୍ରିଟିଶ ପ୍ରଧାନମନ୍ତ୍ରୀ ରୁଷି ସୁନକ, ଫ୍ରାନ୍ସର ରାଷ୍ଟ୍ରପତି ଇମାନୁଏଲ ମାକ୍ରୋନ, କାନାଡାର ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ଏବଂ ଇଟାଲୀ ପ୍ରଧାନମନ୍ତ୍ରୀ ଜର୍ଜିଆ ମାଲୋନିଙ୍କ ନାମ ମଧ୍ୟ ରହିଛି। ମେକ୍ସିକୋର ରାଷ୍ଟ୍ରପତି ଆଣ୍ଡ୍ରେସ ମାନୁଏଲ ଲୋପେଜ ଓବ୍ରାଡୋର ପ୍ରଧାନମନ୍ତ୍ରୀ ମୋଦିଙ୍କ ପରେ ମର୍ନିଂ କନସଲ୍ଟର ମୂଲ୍ୟାୟନରେ ୬୬ ପ୍ରତିଶତ ସହ ଦ୍ୱିତୀୟ ସ୍ଥାନରେ ଅଛନ୍ତି।
ତୃତୀୟ ସ୍ଥାନରେ ଥିବା ସ୍ବିଜରଲ୍ୟାଣ୍ଡର ରାଷ୍ଟ୍ରପତି ଆଲେନ ବୁର୍ସେଟ ୫୮ପ୍ରତିଶତ ଅନୁମୋଦନ ମୂଲ୍ୟାୟନ ପାଇଛନ୍ତି। ଆହୁରି ମଧ୍ୟ ବ୍ରାଜିଲର ରାଷ୍ଟ୍ରପତି ଲୁଲା ଦା ସିଲଭା ଚତୁର୍ଥ ସ୍ଥାନରେ ୪୯ ପ୍ରତିଶତ ରେଟିଂ ପାଇଛନ୍ତି। ପଞ୍ଚମ ସ୍ଥାନରେ ଅଷ୍ଟ୍ରେଲିଆର ପ୍ରଧାନମନ୍ତ୍ରୀ ଆନ୍ଥୋନି ଆଲବାନିସ ୪୭ ପ୍ରତିଶତ ମାନ୍ୟତା ପାଇଛନ୍ତି।
ଇଟାଲୀର ପ୍ରଧାନମନ୍ତ୍ରୀ ଜର୍ଜିଆ ମେଲୋନି ୪୧ ପ୍ରତିଶତ ସହ ଗ୍ଲୋବାଲ ଲିଡର ଆପ୍ରୁଭାଲ ରେଟିଂ ଟ୍ରାକରରେ ଷଷ୍ଠ ସ୍ଥାନରେ ଅଛନ୍ତି। ସପ୍ତମ ସ୍ଥାନରେ ଥିବା ବେଲଜିୟମ ପ୍ରଧାନମନ୍ତ୍ରୀ ଆଲେକ୍ସଜାଣ୍ଡାର୍ ଡି କ୍ରୋ ୩୭ ପ୍ରତିଶତ ରେଟିଂ ପାଇଛନ୍ତି। ଏଥି ସହିତ ଅଷ୍ଟମ ନମ୍ବରରେ ଆସିଥିବା ଆମେରିକାର ରାଷ୍ଟ୍ରପତି ଜୋ ବାଇଡେନ ଏବଂ ୯ ନମ୍ବରରେ ଆସିଥିବା ସ୍ପେନର ପେଡ୍ରୋ ସାଞ୍ଚେଜ ମଧ୍ୟ ୩୭ ପ୍ରତିଶତ ରେଟିଂ ପାଇଛନ୍ତି।
ମୂଲ୍ୟାୟନରେ, ଇଂରେଜ ପ୍ରଧାନମନ୍ତ୍ରୀ ଲିଓ ଭାରାଡକର ୩୬ ପ୍ରତିଶତ ଆପ୍ରୁଭାଲ ସହ ଦଶମ ସ୍ଥାନରେ ଅଛନ୍ତି। ଭାରାଡକରଙ୍କ ପରେ ସେଠାରେ ସ୍ବିଡେନର ଉଲଫ କ୍ରିଷ୍ଟର୍ସନ ଏବଂ ପରେ ପୋଲାଣ୍ଡର ମାର୍କିଙ୍କିଭିକ ଅଛନ୍ତି। ତା’ପରେ ୧୩ ନମ୍ବରରେ କାନାଡାର ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ୩୧ ପ୍ରତିଶତ ରେଟିଂ ପାଇଛନ୍ତି। ଏହା ବ୍ୟତୀତ ବ୍ରିଟିଶ ପ୍ରଧାନମନ୍ତ୍ରୀ ରୁଷି ସୁନକ ୧୭ ନମ୍ବରରେ ରହି ୨୫ ପ୍ରତିଶତ ରେଟିଂ ପାଇଛନ୍ତି।
