ଦୁବାଇ,୨୨।୧୦(ପି.ଟି.): ଚଳିତ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ‘ବ୍ଲାକ୍ ଲାଇଭ୍ ମ୍ୟାଟର’ ଆନ୍ଦୋଳନ ସାମିଲ ନ ହେବା ଦୁଃଖଦାୟକ ବୋଲି ଓ୍ବେଷ୍ଟଇଣ୍ଡିଜ ଅଧିନାୟକ ଜାସନ ହୋଲ୍ଡର କହିଛନ୍ତି। ବିଶ୍ୱର ଶ୍ରେଷ୍ଠ କ୍ରିକେଟ ଲିଗ୍ ବିବେଚିତ ହେଉଥିବା ଆଇପିଏଲ୍ରେ ଦଳଗୁଡିକ ଏ ନେଇ ଆଦୌ ନିଜର ଉତ୍ସାହ ପ୍ରକଟ କରିନାହାନ୍ତି। ଆଇପିଏଲ୍ରେ ଏହି ଆନ୍ଦୋଳନକୁ ଆଦୌ ଗୁରୁତ୍ୱ ଦିଆଯାଇନାହିଁ।
ହୋଲ୍ଡର ସନରାଇଜର୍ସ ହାଇଦ୍ରାବାଦ ଦଳର ସଦସ୍ୟ ରହିଛନ୍ତି। କ୍ରିକେଟ ରାଇଟର୍ସ କ୍ଲବ୍ ଦ୍ୱାରା ଆୟୋଜିତ ଏକ ଭର୍ଚୁଆଲ ସେରିମନିରେ ଓ୍ବେଷ୍ଟଇଣ୍ଡିଜ ଦଳ ତରଫରୁ ହୋଲ୍ଡର ପିଟର ସ୍ମିଥ୍ ପୁରସ୍କାର ଗ୍ରହଣ କରିବା ଅବସରରେ ହୋଲ୍ଡର ଏହି କଥା କହିଛନ୍ତି। ସର୍ବସାଧାରଣଙ୍କ ପାଇଁ କ୍ରିକେଟର ପ୍ରସ୍ତୁତି ବା ଉପସ୍ଥାପନାରେ ଉଲ୍ଲେଖନୀୟ ଭୂମିକା ଗ୍ରହଣ କରିଥିବା ବ୍ୟକ୍ତିଙ୍କୁ ପିଟର ସ୍ମିଥ୍ ପୁରସ୍କାର ପ୍ରଦାନ କରାଯାଇଥାଏ। ଆଇପିଏଲ୍ରେ ଏହି ଆନ୍ଦୋଳନକୁ ଆଦୌ ଗୁରୁତ୍ୱ ଦିଆ ନ ଯିବ ନିହାତି ଦୁର୍ଭାଗ୍ୟଜନକ ବୋଲି ହୋଲ୍ଡର କହିଛନ୍ତି ଓ ଏହା କ୍ରିକେଟ ଓ୍ବେଷ୍ଟଇଣ୍ଡିଜ ଓ୍ବେବ୍ସାଇଟ୍ରେ ଉଲ୍ଲେଖ କରାଯାଇଛି। ଏହି ଆନ୍ଦୋଳନକୁ ଉଜ୍ଜୀବିତ ରଖିବାରେ କ୍ରିକେଟ ଓ୍ବେଷ୍ଟଇଣ୍ଡିଜ ଉଲ୍ଲେଖନୀୟ କାର୍ଯ୍ୟ କରିଆସିଛି। ଇଂଲଣ୍ଡରେ ଏକ ସିରିଜ ଖେଳିବା ଅବସରରେ ଓ୍ବେଷ୍ଟଇଣ୍ଡିଜ ମହିଳା ଦଳ ବ୍ଲ୍ାକ ଲାଇଭ୍ସ ମ୍ୟାଟର ଲୋଗ ଚିହ୍ନିତ ପୋଷାକ ପିନ୍ଧିଥିଲେ।
ଉଲ୍ଲେଖଥାଉ କି, ଜଣେ ଆଫ୍ରିକୀୟ ଆମେରିକା ନାଗରିକ ଜର୍ଜ ଫ୍ଲୋଏଡଙ୍କୁ ଜଣେ ଗୋରା ପୋଲିସ ଅଧିକାରୀ ଅତି ନର୍ମମ ଭାବେ ହତ୍ୟା କରିବା ପରେ ସାରା ବିଶ୍ୱରେ ଏହି ଆନ୍ଦୋଳନ ତେଜିଥିଲା। ପାକିସ୍ତାନ ଓ ଅଷ୍ଟ୍ରେଲିଆ ଗସ୍ତରେ ଏହି ଆନ୍ଦୋଳନ ଥମିଯାଇଥିଲା।
