ଲକ୍ଷ୍ନୌ,୧୧।୧୦: ସମାଜବାଦୀ ପାର୍ଟିର ପ୍ରତିଷ୍ଠାତା ତଥା ଉତ୍ତରପ୍ରଦେଶର ପୂର୍ବ ମୁଖ୍ୟମନ୍ତ୍ରୀ ମୁଲାୟମ ସିଂ ଯାଦବ ଆଉ ନାହାନ୍ତି। ମଙ୍ଗଳବାର ତାଙ୍କର ଅନ୍ତିମ ସଂସ୍କାର ଜନ୍ମିତ ଗ୍ରାମ ସୈଫାଇରେ କରାଯିବ। ୧୯୩୯ ନଭେମ୍ବର ୨୨ରେ ଉତ୍ତରପ୍ରଦେଶର ଇଟାଓ୍ବା ଜିଲା ଅନ୍ତର୍ଗତ ସୈଫାଇ ଗ୍ରାମର ଏକ ଗରିବ ଚାଷୀ ପରିବାରରେ ଜନ୍ମ ନେଇଥିଲେ ମୁଲାୟମ। ସେତେବେଳେ ହୁଏତ ଏହି ପିଲା ରାଜନୀତିରେ ଏଭଳି ସକ୍ରିୟ ହେବ ଜାଣି ନ ଥିଲେ। ହେଲେ ମୁଲାୟମ ଛୋଟ ଗାଁରେ ଜନ୍ମ ନେଇ ବି ଦେଶର ରକ୍ଷା ମନ୍ତ୍ରୀଠାରୁ ଆରମ୍ଭ କରି ୩ ଥର ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ହେବାର ଗୌରବ ଅର୍ଜନ କରିଥିଲେ। ସଫଳତାର ଶୀର୍ଷରେ ପହଞ୍ଚିବା ପରେ ଅନେକ ନିଜର ଜନ୍ମମାଟିକୁ ଭୁଲି ଯାଆନ୍ତି। ମାତ୍ର ମୁଲାୟମ ଥିଲେ ବ୍ୟତିକ୍ରମ। ମାତ୍ର ୭୦୦୦ ବାସିନ୍ଦା ଥିବା ସୈଫାଇକୁ ମୁଲାୟମ ମଡେଲ ଗ୍ରାମରେ ପରିଣତ କରିଥିଲେ, ଏବେ ଯାହା ଆଗରେ ବଡ଼ ବଡ଼ ସହର ବି ଫିକା ଲାଗିବ।
ମୁଲାୟମଙ୍କ ଗାଁ ସୈଫାଇରେ ଏୟାରଷ୍ଟ୍ରିପ, ମେଡିକାଲ କଲେଜ, ଆନ୍ତର୍ଜାତୀୟ ଷ୍ଟାଡିୟମ, ଅତ୍ୟାଧୁନିକ ସୁବିଧା ଥିବା ଡାକ୍ତରଖାନା, ସପିଂ କମ୍ଲେକ୍ସ ଭଳି ସମସ୍ତ ଆବଶ୍ୟକୀୟ ସୁବିଧା ରହିଛି। ଜଣେ ରାଜନେତା ହିସାବରେ ମୁଲାୟମ ଯେଉଁଭଳି ସୈଫାଇର ବିକାଶ କରିଛନ୍ତି ସେଭଳି ଭାରତୀୟ ରାଜନୀତିରେ ଅନ୍ୟ କୌଣସି ନେତା ତାଙ୍କ ଗାଁ ପାଇଁ ତାହା କରିପାରି ନାହାନ୍ତି।
୯୦ ଦଶକରେ ସୈଫାଇ ଗ୍ରାମର ଅବସ୍ଥା ଭାରତର ଅନ୍ୟ ସାଧାରଣ ଗ୍ରାମ ପରି ଥିଲା। ପଢ଼ିବା ଲାଗି ସେଠାରେ ସ୍କୁଲ ନ ଥିଲା। ଚିକିତ୍ସା ଲାଗି ଡାକ୍ତରଖାନା ନ ଥିଲା। ଯାତାୟାତ ଲାଗି ମଧ୍ୟ ଭଲ ସଡ଼କ ମଧ୍ୟ ନ ଥିଲା। ୧୯୮୯ରେ ଯେତେବେଳେ ମୁଲାୟମ ପ୍ରଥମ ଥର ମୁଖ୍ୟମନ୍ତ୍ରୀ ହୋଇଥିଲେ ସେ ସୈଫାଇର ଚେହେରା ବଦଳାଇ ଦେଇଥିଲେ। ସେ ମୁଖ୍ୟମନ୍ତ୍ରୀ ଭାବେ ୩ ଥର ନିଜ କାର୍ଯ୍ୟକାଳ ସମୟରେ ଏବଂ ଥରେ ଦେଶର ପ୍ରତିରକ୍ଷା ମନ୍ତ୍ରୀ ହିସାବରେ ସୈଫାଇକୁ ଅନେକ ଭେଟ ଦେଇଥିଲେ। ପରେ ତାଙ୍କ ପୁଅ ଅଖିଳେଶ ଯାଦବ ମୁଖ୍ୟମନ୍ତ୍ରୀ ହେବା ପରେ ସମସ୍ତ କାର୍ଯ୍ୟକୁ ପୂରଣ କରିଥିଲେ। ଏହାର ପରିଣାମସ୍ବରୂପ ସୈଫାଇ ଏବେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଛି।
ସୈଫାଇରେ ଗ୍ରାମ ରାସ୍ତା ବେଶ ଚଉଡା। ରାସ୍ତାକଡ଼ରେ ଲାଇଟ୍ ବ୍ୟବସ୍ଥା ହୋଇଛି, ବଡ ବଡ଼ ଦୋକାନ ଅଛି। ଶପିଂ ମଲ୍ ବି ଅଛି। ସେହିଭଳି ମୁଲାୟମ ଗ୍ରାମୀଣ ଆୟୁର୍ବିଜ୍ଞାନ ସଂସ୍ଥାନ ନାମକ ମେଡିକାଲ କଲେଜର ସ୍ଥାପନା କରିଥିଲେ। ପରେ ଅଖିଳେଶ ସରକାର ଏହାକୁ ମେଡିକାଲ ୟୁନିଭର୍ସିିଟିର ମାନ୍ୟତା ଦେଇଥିଲେ। ଏସବୁ ଦେଖିଲେ ସୈଫାଇ ସମ୍ପୂର୍ଣ୍ଣ ଭାବେ ଆଧୁନିକ ସହର ଭଳି ଲାଗୁଥିବା କୁହାଯାଏ।
