ନୂଆଦିଲ୍ଲୀ,୪ ।୧୦: ଚାଇନାର ଦୁଇ ପାଦ ଆଗକୁ ଦୁଇ ପାଦ ପଛକୁ ନୀତି ଯୋଗୁ ଭାରତ-ଚାଇନା ସୀମା ବିବାଦ ଶେଷ ହେଉନାହିଁ । ସେନା ତଥା କୁଟନୀତି ସ୍ତରରେ କଥାବାର୍ତ୍ତା ପରେ ବି ଚାଇନାର ଉସକାଉଥିବା ଗୁଣ ଯୋଗୁ ପରିସ୍ଥିତି ବିଗିଡି ଯାଉଛି । ଏହାପରେ ବି ଡ୍ରାଗନ ଶାନ୍ତି ଭଙ୍ଗକୁ ନେଇ ଭାରତକୁ ଦୋଷ ଦେଉଛି । ତେବେ ଚାଇନାର ଏଭଳି ଆଭିମୁଖ୍ୟର ଜବାବ ଦେବାକୁ କେବଳ ମୋଦି ସରକାର ଏଲ୍ଏସିରେ ଆଧୁନିକ ସଡ଼କ ନିର୍ମାଣ ନୁହେଁ ବିବାଦୀୟ ଅଞ୍ଚଳରେ ବହୁୁ ସଂଖ୍ୟାରେ ଭାରତୀୟ ସେନା ଓ ଅସ୍ତ୍ରଶସ୍ତ୍ର ମହଜୁଦ ରଖୁଥିବା ଜଣାପଡିଛି । ତେବେ ଚାଇନା ପକ୍ଷରୁ ବାରମ୍ବାର ଅନୁପ୍ରବେଶ ଉଦ୍ୟମ ଏପର୍ଯ୍ୟନ୍ତ ବି ଶେଷ ହୋଇନି । ହେଲେ ଭାରତୀୟ ସେନାର ଆଭିମୁଖ୍ୟକୁ ଦେଖି ଚାଇନା ସେନା ପାଟ୍ରୋଲିଂର ତରିକାକୁ ବଦଳାଇ ଦେଇଥିବା କୁହାଯାଉଛି । ଆସନ୍ତା ଶୀତରେ ଚାଇନା ପୁଣିଥରେ ଅନୁପ୍ରବେଶ କରି କିଛି ବଡ ଧରଣର ଘଟଣା ଘଟାଇ ପାରେ ବୋଲି ଅନୁମାନ କରାଯାଇଛି ।
