ଦାରିଙ୍ଗବାଡି,୧୨।୨(ଡି.ଏନ.ଏ): ଓଡିଶାର କଶ୍ମୀର କୁହାଯାଉଥିବା ଦାରିଙ୍ଗବାଡି କୁ ପର୍ଯ୍ୟଟକଙ୍କ ସୁଅ ଛୁଟୁଛି। ରାଜ୍ୟ ତଥା ରାଜ୍ୟ ବାହାରୁ ପ୍ରତିଦିନ ଶହ ଶହ ପର୍ଯ୍ୟଟକ ଦାରିଙ୍ଗବାଡି ଆସି ବଣ ଭୋଜି କରିବା ସହ କିଛି ପର୍ଯ୍ୟଟକ ରାତ୍ରୀ ଯାପନ କରି ଶୀତ ଓ ପ୍ରଦ୍ୟୁଷଣ ମୁକ୍ତ ଅଞ୍ଚଳରେ ବୁଲି ନିଜ ମନକୁ ଆନନ୍ଦ ଦେଉଛନ୍ତି। ସୁସ୍ଥ ବାତାବରଣକୁ ପର୍ଯ୍ୟଟକ ପସନ୍ଦ କରୁଛନ୍ତି। ଏବେ ଶୀତର ପ୍ରକୋପ ଦିନରେ ନ ଥିବା ବେଳେ ଭୋର ସମୟରେ ଘନ କୁହୁଡି ସହ ସଂଧ୍ୟା ନଇଁ ଆସିଲେ ଧୀରେ ଧୀରେ ଶୀତ ବୃଦ୍ଧି ପାଉଛି ଶନିବାରଠାରୁ ଦିନରେ ପ୍ରଚଣ୍ଡ ଖରାର ପ୍ରକୋପ ରହୁଥିବା ବେଳେ ରାତିରେ ପ୍ରବଳ ଥଣ୍ଡା ଅନୁଭୂତ ହେଉଛି। ପର୍ଯ୍ୟଟକ ଶୀତର ମଜାନେବା ପାଇଁ ନିଆଁ ଜାଳି ଅଞ୍ଚଳର ପାରମ୍ପରିକ ନାଚଗୀତରେ ମଜା ଉଠାଉଛନ୍ତି। ବିଭିନ୍ନ ରାତ୍ରିଯାପନ ସ୍ଥଳରେ ସ୍ଥାନୀୟ କଳାକାର ମାନେ ଆଦିବାସୀ ନୃତ୍ୟ, ବାଦ୍ୟ, ସଂଗୀତରେ ପର୍ଯ୍ୟଟକଙ୍କ ମନ ମୋହୁଛନ୍ତି। ରାଜ୍ୟ ସରକାରଙ୍କ ଇକୋ ରିଟ୍ରିଟ ଠାରେ ମଧ୍ୟ ପ୍ରତିଦିନ ସାଂରେ ସାଂସ୍କୃତିକ କାର୍ଯ୍ୟକ୍ରମରେ ଜନଜାତି ସମ୍ପ୍ରଦାୟର ପାରମ୍ପରିକ ନାଚ ଗୀତରେ ପର୍ଯ୍ୟଟକ ମଜା ନେଉଛନ୍ତି। ଏହି ପାରମ୍ପରିକ ନାଚ ଗୀତ କରି ଅଞ୍ଚଳର କଳାକାର ମାନେ ବେଶ ଦୁଇ ପଇସା ରୋଜଗାର କରିବା ସହ ଲୁଚିଯାଉଥିବା ପାରମ୍ପରିକ ନାଚର ପ୍ରଚାର ପ୍ରସାର କରୁଛନ୍ତି। ସେହିପରି ପର୍ଯ୍ୟଟକ ଦାରିଙ୍ଗବାଡିର କଫି ବଗିଚା ସମେତ ଡ଼ୁଲୁରୀ ପାଇନ ବଣ, ମିଡିୟୁାନ୍ଦା ଓ ପାଟା ବାନ୍ଧା ଜଳପ୍ରପାତ, ହିଲଭିୟୁ ପାର୍କ, ନେଚର ପାର୍କ, ସାଇଲେଣ୍ଟ ଭ୍ୟାଲି, ଲଭର୍ସ ପଏଣ୍ଟ ଆଦି ବୁଲି ମଜା ନେବା ସହ ରାତିରେ କେମ୍ପଫାୟାର ସହ ପାରମ୍ପରିକ ନାଚ ଗୀତର ମଜା ନେଉଛନ୍ତି।
