ମୁମ୍ବାଇ,୧୩ ।୨: ନ୍ୟାଶନାଲିଷ୍ଟ କଂଗ୍ରେସ ପାର୍ଟି(ଏନସିପି)ର ନେତା ତଥା ମହାରାଷ୍ଟ୍ରର ପୂର୍ବତନ ଗୃହମନ୍ତ୍ରୀ ଅନିଲ ଦେଶମୁଖ ରବିବାର ଏକ ଚମକାଇବା ଭଳି ଦାବି କରିଛନ୍ତି । ସେ କହିଛନ୍ତି, ଜେଲରେ ତାଙ୍କୁ ଏମିତି ଏକ ଅଫର ମିଳିଥିଲା, ଯଦି ସେ ତାକୁ ମାନି ନେଇଥାଆନ୍ତେ ତେବେ ମହାରାଷ୍ଟ୍ରର ମହାବିକାଶ ଅଘାଡି(ଏମଭିଏ) ନେତୃତ୍ୱର ସରକାର ବହୁ ପୂର୍ବରୁ ଭାଙ୍ଗି ଯାଇଥାଆନ୍ତା । ସୂଚନାଯୋଗ୍ୟ, ଅନିଲ ଦେଶମୁଖ ମନି ଲଣ୍ଡରିଂ ମାମଲାରେ ୧୩ ମାସ ହେବ ଜେଲରେ ଥିଲେ । ଅନିଲଙ୍କୁ ନଭେମ୍ବର ୨୦୨୧ରେ ଗିରଫ କରାଯାଇଥିଲା ଓ ତାଙ୍କୁ ଗତବର୍ଷ ୨୮ ଡିସେମ୍ବରରେ ଜାମିନ ମିଳିଥିଲା ।
ଅନିଲ ଦେଶମୁଖ ୱର୍ଦ୍ଧାର ସେବାଗ୍ରାମରେ ନଦୀ ଓ ବନ ସଂରକ୍ଷଣ କ୍ଷେତ୍ରରେ କାମ କରୁଥିବା ଗ୍ରାମସଭା ବେସରକାରୀ ସଙ୍ଗଠନ(ଏନଜିଓ)ର ସାମୁହିକ ବନ ଅଧିକାରୀଙ୍କ ରାଜ୍ୟ ସ୍ତରୀୟ ସମ୍ମିଳନୀକୁ ସମ୍ବୋଧିତ କରିଥିଲେ । ସେଠାରେ ସେ ବାଦି କରିଥିଲେ କି, ମୋତେ ଜେଲରେ ଅଫର ମିଳିଥିଲା, ଯାହାକୁ ମୁଁ ଖାରଜ କରିଦେଇଥିଲି । ଯଦି ମୁଁ ସ୍ୱୀକାର କରି ନେଇଥାଆନ୍ତି ତେବେ ମହାବିକାଶ ଅଘାଡି ନେତୃତ୍ୱର ସରକାର ଅଢେଇ ବର୍ଷ ପୂର୍ବରୁ ଭାଙ୍ଗି ଯାଇଥାଆନ୍ତା । ହେଲେ ମୁଁ ନ୍ୟାୟରେ ବିଶ୍ୱାସ କରେ ସେଥିପାଇଁ ମୁଁ ଜାମିନ ମିଳିବା ପର୍ଯ୍ୟନ୍ତ ଅପେକ୍ଷା କରିଥିଲି ।
