ଓ୍ବାଶିଂଟନ/ ନୂଆଦିଲ୍ଲୀ, ୨୬।୮: ପୃଥିବୀରେ କରୋନା ମହାମାରୀ ଆତଙ୍କ ସୃଷ୍ଟି କରିଛି। ସଂକ୍ରମଣରୁ ଦୂରେଇ ରହିବା ଲାଗି ବହୁ ଦେଶରେ ଲକ୍ଡାଉନ୍ ଜାରି ରହିଛି। ତେବେ ୫ଟି ଦେଶରେ କରୋନା ସଂକ୍ରମଣ କମୁଥିବା ନେଇ ଏକ ରିପୋର୍ଟ ପ୍ରକାଶ ପାଇଛି। ସେସବୁ ଦେଶ ମଧ୍ୟରେ ଆମେରିକା, ଦକ୍ଷିଣ ଆଫ୍ରିକା, ରୁଷ୍, ପାକିସ୍ତାନ ଏବଂ ସୌଦି ରହିଛି। ତେବେ ଏହି ତାଲିକାରେ ଭାରତର ନାମ ନାହିଁ। ଆମେରିକାରେ ଜୁନ୍ ଜୁଲାଇରେ କରୋନା ଆତଙ୍କ ରଚିଥିବାବେଳେ ଗତ କିଛି ସପ୍ତାହ ଧରି ଏଠାରେ ସ୍ଥିତି ନିୟନ୍ତ୍ରଣରେ ରହିଛି। ସେହିପରି ଦକ୍ଷିଣ ଆଫ୍ରିକାରେ ମଧ୍ୟ ସ୍ଥିତିରେ ସୁଧାର ଆସିଛି। ପ୍ରିଟୋରିଆ ଏବଂ ଜେହାନ୍ସବର୍ଗରେ ଏବେ ନୂଆ ଆକ୍ରାନ୍ତଙ୍କ ସଂଖ୍ୟା କମିବାରେ ଲାଗିଛି। ରୁଷ୍ରେ ଅଗଷ୍ଟ ୨୨ରେ ୫ ହଜାର ନୂଆ ଆକ୍ରାନ୍ତଙ୍କୁ ଚିହ୍ନଟ କରାଯାଇଛି। ଏଠାରେ କରୋନା ସଂକ୍ରମଣରେ ହ୍ରାସ ପରିଲକ୍ଷିତ ହୋଇଛି। ପାକିସ୍ତାନରରେ ମଧ୍ୟ ନୂଆ କରୋନା ଆକ୍ରାନ୍ତଙ୍କ ସଂଖ୍ୟା ଧୀରେଧୀରେ କମୁଛି। ସେହିପରି ସୌଦିରେ ମଧ୍ୟ କରୋନା ସଂକ୍ରମଣ କମୁଥିବା ରିପୋର୍ଟରେ ପ୍ରକାଶ ପାଇଛି। ଆଗାମୀ ଦିନରେ ଭାରତରେ ମଧ୍ୟ ସ୍ଥିତିରେ ନିୟନ୍ତ୍ରଣ ଆସିବାର ଆଶା ଥିବା ରିପୋର୍ଟରେ କୁହାଯାଇଛି।
