ନୂଆଦିଲ୍ଲୀ, ୨୨ା୧୦: ପରିବେଶ ପ୍ରଦୂଷିତ ହେବାରେ ଲାଗିଛି। ବିଶ୍ୱରେ ଏହାର ପ୍ରଭାବ ବଢ଼ିି ବିଭିନ୍ନ ସମସ୍ୟା ଦେଖାଯାଉଛି। ଭାରତରେ ବାୟୁ ପ୍ରଦୂଷଣ ଉଗ୍ରରୂପ ଧାରଣ କରିଥିବାବେଳେ ଏହାର ପ୍ରଭାବରେ ୨୦୧୯ରେ ୧.୧୬ ଲକ୍ଷ ଶିଶୁଙ୍କ ପ୍ରାଣହାନି ଘଟିଥିବା ଏକ ରିପୋର୍ଟରୁ ଜଣାପଡ଼ିଛି। ଶିଶୁ ଜନ୍ମନେବାର ଏକମାସ ମଧ୍ୟରେ ମୃତ୍ୟୁମୁଖରେ ପଡ଼ିଥିବା ପ୍ରକାଶ। ଘରେ ଓ ବାହାରେ ପ୍ରଦୂଷିତ ବାୟୁ କଣିବା ଦ୍ୱାରା ଏମାନଙ୍କ ଜୀବନ ଯାଇଥିବା କୁହାଯାଇଛି। ହେଲ୍ଥ ଇଫେକ୍ଟ ଇନ୍ଷ୍ଟିଚ୍ୟୁଟ୍ର ‘ଷ୍ଟେଟ୍ ଅଫ୍ ଗ୍ଲୋବାଲ ଏୟାର ୨୦୨୦’ ରିପୋର୍ଟ ମୁତାବକ ବାହ୍ୟ ପରିବେଶ ପ୍ରଦୂଷଣ ଯୋଗୁ ଅଧିକାଂଶ ଶିଶୁ ପ୍ରାଣ ହରାଇଛନ୍ତି। କାଠ, କୋଇଲା, ଘସି ଜାଳିବା ଦ୍ୱାରା ବାୟୁ ପ୍ରଦୂଷଣ ଉପରେ ଏହାର ଭୟଙ୍କର ପ୍ରଭାବ ପଡ଼ୁଥିବା ଦର୍ଶାଯାଇଛି। ନ୍ୟାଶନାଲ କ୍ଲିନ୍ ଏୟାର ପ୍ରୋଗ୍ରାମ ରାଜ୍ୟ ତଥା ସହରରେ ପରିବେଶ ସୁଧାର ଲାଗି କାର୍ଯ୍ୟାରମ୍ଭ କରିଛି।
ସୂଚନା ଥାଉକି, ବାୟୁ ପ୍ରଦୂଷଣ ଯୋଗୁ ବାର୍ଷିକ ୧.୬୭ ନିୟୁତ ଲୋକଙ୍କ ବିଭିନ୍ନ ରୋଗରେ ମୃତ୍ୟୁ ଘଟୁଛି। ଏଥିଯୋଗୁ ହୃଦ୍ଘାତ, ଡାଇବେଟିସ୍, ଫୁସ୍ଫୁସ୍ କ୍ୟାନ୍ସର ଭଳି ଅନେକ ରୋଗ ଜାତ ହେଉଛି। ସ୍ବାସ୍ଥ୍ୟ ପ୍ରତି ବାୟୁ ପ୍ରଦୂଷଣ ଏବେ ଏକ ସତର୍କଘଣ୍ଟି ପାଲଟିଛି। ବିଶେଷକରି ଦକ୍ଷିଣ ଏସିଆରେ ଏଭଳି ସ୍ଥିତି ଗମ୍ଭୀର ରୂପ ଧାରଣ କରିଛି। ଭାରତ, ପାକିସ୍ତାନ, ବାଂଲାଦେଶ, ନେପାଳ ଭଳି ଦେଶଗୁଡ଼ିକ ଏହାର ପରିଣାମ ଭୋଗ କରୁଛନ୍ତି। କରୋନା କାଳରେ ଲୋକମାନେ ହୃଦ୍ଘାତ ଓ ଫୁସ୍ଫୁସ୍ ଜନୀତ ରୋଗରେ ପଡ଼ି ପ୍ରାଣ ହରାଉଛନ୍ତି। ଭାରତରେ ଏହି ସଂଖ୍ୟା ୧.୧୦ ଲକ୍ଷ ବୋଲି ଜଣାପଡ଼ିଛି।
