ବି-ଟାଉନରେ ସେଲିବ୍ରିଟିମାନଙ୍କ ସମ୍ପର୍କ କେଉଁଠି ଯୋଡି ହେଉଥିବାବେଳେ ଆଉ କେଉଁଠି ଭାଙ୍ଗୁଥିବା ଖବର ମଧ୍ୟ ଆସିଥାଏ। ନିକଟରେ ଅଭିନେତା ସୋହେଲ ଖାନ ଏବଂ ସୀମା ଖାନଙ୍କ ଛାଡପତ୍ର ଖବର ପ୍ରଶଂସକଙ୍କ ମନରୁ ନ ଲିଭୁଣୁ, ଏବେ ବି-ଟାଉନରୁ ଆଉ ଏକ ବିବାହ ଭାଙ୍ଗିବାକୁ ଯାଉଛି। ଅଭିନେତା ଇମ୍ରାନ ଖାନ ଏବଂ ଅବନ୍ତିକା ମଲିକଙ୍କ ମଧ୍ୟରେ ଛାଡପତ୍ର ହେବାକୁ ଯାଉଛି। ଅବନ୍ତିକାଙ୍କ ସହ ଇମ୍ରାନଙ୍କ ସମ୍ପର୍କ ଗତ କିଛି ବର୍ଷ ହେବ ଖରାପ ଚାଲିଛି। କେବଳ ଏତିକି ନୁହେଁ, ସମ୍ପର୍କ ଏତେ ଖରାପ ହୋଇଯାଇଛି ଦୁହେଁ ଅଲଗା ରହିବାକୁ ନିଷ୍ପତ୍ତି ନେଇସାରିଛନ୍ତି।
ଦୀର୍ଘ ଦିନର ପ୍ରେମ ପରେ ୨୦୧୧ରେ ଇମ୍ରାନ ଅବନ୍ତିକାଙ୍କୁ ବିବାହ କରିଥିଲେ। ୨୦୧୪ରେ ଝିଅ ଇମାରା ଜନ୍ମ ହୋଇଥିଲେ। ଝିଅ ଜନ୍ମ ପରେ, ସେମାନଙ୍କ ସମ୍ପର୍କରେ ଟିକିଏ ତିକ୍ତତା ଆରମ୍ଭ ହେଲା। ୨୦୧୯ରେ ଅବନ୍ତିକା ଇମ୍ରାନଙ୍କୁ ଛାଡ଼ି ନିଜ ବାପ ଘରେ ରହିବାକୁ ଲାଗିଲେ।
ଇମ୍ରାନ ଖାନ ଦୀର୍ଘ ଦିନ ଧରି ବଲିଉଡ ଇଣ୍ଡଷ୍ଟ୍ରିରୁ ଦୂରତା ବଜାୟ ରଖିଛନ୍ତି। ତାଙ୍କୁ ଶେଷ ଥର ପାଇଁ ୨୦୧୫ରେ ଫିଲ୍ମ ‘କଟ୍ଟି ବଟ୍ଟି’ରେ ଦେଖିବାକୁ ମିଳିଥିଲା। କାମ ନ ଥିବାରୁ ଇମ୍ରାନ ଖାନ ଆର୍ଥିକ ସଙ୍କଟ ଦେଇ ଗତି କରୁଥିଲେ। ଆର୍ଥିକ ସଙ୍କଟ ଯୋଗୁ ଦୁହିଁଙ୍କ ମଧ୍ୟରେ ଝଗଡା ଆରମ୍ଭ ହୋଇଥିଲା। ଯଦିଓ ଉଭୟଙ୍କ ପରିବାର ଏହି ସମ୍ପର୍କକୁ ଯୋଡିବାକୁ ଚେଷ୍ଟା କରିଥିଲେ, କିନ୍ତୁ ଫଳାଫଳ କିଛି ବାହାରି ନ ଥିଲା।
