କରାଚୀ,୩୦ା୮: ଜେଲରେ ଥିବା ଇମ୍ରାନ ଖାନ୍ଙ୍କ ସମ୍ପର୍କରେ ଚଳିତ ଇଂଲଣ୍ଡ ବିପକ୍ଷରେ ଟେଷ୍ଟ ସିରିଜ୍ ଖେଳୁଥିବା ପାକିସ୍ତାନ କ୍ରିକେଟ ଦଳର ସଦସ୍ୟଙ୍କୁ କୌଣସି ମତାମତ ନ ଦେବାକୁ ପାକିସ୍ତାନ କ୍ରିକେଟ ବୋର୍ଡ (ପିସିବି) ଚେତାବନୀ ଦେଇଛି।
ଲଡର୍ସଠାରେ ଚାଲିଥିବା ଦ୍ୱିତୀୟ ଟେଷ୍ଟର ପ୍ରଥମ ଦିନ ଲଞ୍ଚ ବ୍ରେକ ବେଳେ ପ୍ରସାରଣକାରୀ ସଂସ୍ଥା ସ୍କାଏ ସ୍ପୋଟର୍ସ ପକ୍ଷରୁ ଇମ୍ରାନ ଖାନ୍ଙ୍କ ଦୁଇ ପୁଅଙ୍କ ସହ ପୂର୍ବତନ କ୍ରିକେଟର ମାଇକେଲ ଆଥର୍ଟନଙ୍କ ସାକ୍ଷାତ୍କାରର ଭିଡିଓ ପ୍ରସାରଣ କରାଯିବା ପରେ ଏହି ବିବାଦ ଆରମ୍ଭ ହୋଇଥିଲା।
ଏ ସମ୍ପର୍କରେ ପାକିସ୍ତାନ ଦଳର ମୁଖ୍ୟ କୋଚ୍ ସର୍ଫରାଜ ଅହମଦଙ୍କୁ ଏକ ଖବରଦାତା ସମ୍ମିଳନୀରେ ପ୍ରଶ୍ନ କରାଯାଇଥିଲା ଯେ, ପାକିସ୍ତାନ ଦଳର ଖେଳାଳିମାନେ ଇମ୍ରାନଙ୍କ ପୁଅ କସିମ ଓ ସୁଲେମାନଙ୍କ ସାକ୍ଷାତ୍କାରର ଭିଡିଓ ଦେଖିଛନ୍ତି କି। ଏହାର ଉତ୍ତରରେ ସର୍ଫରାଜ କହିଥିଲେ, ନା, ଆମେ ଏ ବିଷୟରେ କିଛି ଜାଣି ନାହୁଁ। ଆମେ ଲଞ୍ଚ କରୁଥିଲୁ। ତେବେ ଉକ୍ତ ସାକ୍ଷାତ୍କାର ଭିଡିଓ ପ୍ରସାରିତ ହେବା ପରେ ଅନ୍ତର୍ଜାତୀୟ କ୍ରିକେଟ ଜଗତରେ ପାକିସ୍ତାନର ଆଦିଆଲା ଜେଲରେ ଥିବା ଇମ୍ରାନଙ୍କୁ ଉପଯୁକ୍ତ ସ୍ବାସ୍ଥ୍ୟ ସେବା ଯୋଗାଇବା ନେଇ ଦାବି ଉଠିଛି।
ଏପରି କି ପାକିସ୍ତାନର ପୂର୍ବତନ ଅଧିନାୟକ ଜାଭେଦ ମିଆଁଦାଦ ଓ ଉଇକେଟକିପର ବ୍ୟାଟର ମୋଇନ ଖାନ ମଧ୍ୟ ଇମ୍ରାନଙ୍କୁ ଉପଯୁକ୍ତ ସ୍ବାସ୍ଥ୍ୟସେବା ଯୋଗାଇ ଦେବାକୁ ପାକିସ୍ତାନ ସରକାରଙ୍କୁ ଅନୁରୋଧ କରିଛନ୍ତି। ଏଥିପୂର୍ବରୁ ୧୦ ଦେଶର ପୂର୍ବତନ ଅଧିନାୟକ ପାକିସ୍ତାନ ସରକାରଙ୍କୁ ଚିଠି ମଧ୍ୟ ଲେଖିଥିଲେ।
