କାଳିଆପାଣି,୨୯ା୪(ଡି.ଏନ.ଏ.): ଯାଜପୁର ଜିଲା କାଳିଆପାଣି ଖଣି ଅଞ୍ଚଳରେ କାର୍ଯ୍ୟରତ ଇମ୍ଫା କମ୍ପାନୀର ମହାଗିରି କଲୋନୀ ଆବର୍ଜନା ଜଳ କାଳିଆପାଣି ଗାଁରେ ପଶିଛି। ଫଳରେ ଏହାକୁ ନେଇ ଶୁକ୍ରବାର ସକାଳୁ କାଳିଆପାଣି ମହାନ୍ତ ସାହିର ମହିଳାମାନେ କମ୍ପାନୀ କାର୍ଯ୍ୟାଳୟ ଗେଟ୍ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିବା ସହ ଧାରଣାରେ ବସିଥିଲେ। କମ୍ପାନୀର ଅଧିକାରୀମାନେ ପହଞ୍ଚତ୍ ସେମାନଙ୍କ ସହ ଆଲୋଚନା କରିବା ସହିତ ଆଗାମୀ ଦିନରେ କେବେ ବାହାରକୁ ଜଳ ଛାଡ଼ିବେ ନାହିଁ ବୋଲି ପ୍ରତିଶ୍ରୁତି ଦେଇଥିଲେ। ଏହାପରେ ମହିଳାମାନେ ଧାରଣାରୁ ଓହରି ଯାଇଥିଲେ।
କମ୍ପାନୀର ମହାଗିରି ଖଣି କଲୋନୀ ପରିସରରେ ଆବର୍ଜନା ଓ ମଇଳା ଜଳ ରହିବା ପାଇଁ କମ୍ପୋଷ୍ଟ କରାଯାଇଛି। ବର୍ଷସାରା ସଂଗୃହୀତ ଅଳିଆ ଆବର୍ଜନା ଓ ମଇଳା ଜଳକୁ ବର୍ଷା ସମୟରେ ବାହାରକୁ ଛଡ଼ାଯାଏ। ତେବେ ଗୁରୁବାର ବର୍ଷା ଉଠାଇ ଥିଲେ ମଧ୍ୟ ହୋଇ ନ ଥିଲା। ହେଲେ କମ୍ପାନୀର କମ୍ପୋଷ୍ଟ ଜଳକୁ ବାହାରକୁ ଛାଡ଼ି ଦିଆଯାଇଥିଲା। ଫଳରେ ଗାଁରେ ମଇଳା ଜଳ ପଶିବାରୁ ଚାରିଆଡ଼େ ପୂତିଗନ୍ଧମୟ ପରିବେଶ ସୃଷ୍ଟି ହୋଇଥିଲା। ସମସ୍ତ ଆବର୍ଜନା ଜଳ ପରିଚାଳନା ପାଇଁ ଜଳ ବିଶୋଧନାଗାର କରାଯିବ ବୋଲି କମ୍ପାନୀ ଲୋକ ସମ୍ପର୍କ ବରିଷ୍ଠ ପରିଚାଳକ ପ୍ରଭାତ ସିଂ ପ୍ରକାଶ କରିଛନ୍ତି।
