ଭୁବନେଶ୍ୱର,୩୦।୯(ବ୍ୟୁରୋ): ବର୍ଷକୁ କୋଟି କୋଟି କମାଉଛୁ, କିନ୍ତୁ ପଚାଶ ହଜାର ଦେବୁ ନାହିଁ କାହିଁକି? ମୁଁ ଓଲ୍ଡଟାଉନ୍ ଗୁଣ୍ଡା, ମୋର କିଛି ଶୁଣିବାର ନାହିଁ। ଦୁର୍ଗା ପୂଜା ପୂର୍ବରୁ ୫୦ ହଜାର ଟଙ୍କା ଘରେ ଦେଇଆସିବୁ। ନହେଲେ ଭଲ ହେବନି। ଜଣେ ବ୍ୟବସାୟୀଙ୍କୁ ଏମିତି ଧମକ ଦେବା ସହ ଠେଲାପେଲା କରି ପକେଟରୁ ୫ ହଜାରରୁ ଅଧିକ ଟଙ୍କା ଛଡାଇନେଇ ମାରିଦେବା ଧମକ ଦେଇଥିବା ଅଭିଯୁକ୍ତଙ୍କୁ ଶ୍ରୀଲିଙ୍ଗରାଜ ଥାନା ପୋଲିସ ଗିରଫ କରିଛି। ସେ ହେଲେ ଏହି ଥାନାଞ୍ଚଳର ଦେବାଶିଷ ମହାପାତ୍ର। ତାଙ୍କଠାରୁ ପୋଲିସ ୩ହଜାର ୮ଶହ ଟଙ୍କା ଜବତ କରିଛି। ଗୁରୁବାର ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ତାଙ୍କ ନାମରେ ପୂର୍ବରୁ ସମ୍ପୃକ୍ତ ଥାନାରେ ୯ଟି ଆପରାଧିକ ମାମଲା ରହିଥିବାବେଳେ ଏୟାରଫିଲ୍ଡ ଥାନାରେ ୬ଟି ଏବଂ ଖଣ୍ଡଗିରି ଥାନାରେ ଗୋଟିଏ ମାମଲା ରହିଛି। ସେ ଅଭ୍ୟାସଗତ ଭାବରେ ଅପରାଧରେ ସମ୍ପୃକ୍ତ ଥିବାରୁ ତାଙ୍କ ବିରୋଧରେ ସିଆର୍ପିସି-୧୧୦ ଧାରା ଅନୁସାରେ କାର୍ଯ୍ୟାନୁଷ୍ଠାନ ନିଆଯିବା ଲାଗି ପଦକ୍ଷେପ ନିଆଯାଉଥିବା ପୋଲିସ କହିଛି। ଦାଦାବଟି ଉପରେ ରୋକ ଲଗାଇବା ପାଇଁ କମିଶନରେଟ ପୋଲିସ ପକ୍ଷରୁ ‘ଦାଦାବଟିକୁ ନା’ ଅଭିଯାନ ମାଧ୍ୟମରେ ଚଢ଼ାଉ ଓ କାର୍ଯ୍ୟାନୁଷ୍ଠାନ ଜାରି ରହିଛି। ଏ ପରିସ୍ଥିତିରେ ଅପରାଧୀମାନେ ଏହାକୁ ଖାତିର ନ କରି ଦାଦାବଟି ଆଦାୟ କରି କମିଶନରେଟ ପୋଲିସକୁ ଚ୍ୟାଲେଞ୍ଜ ଦେଇ ଚାଲିଛନ୍ତି।
ସୂଚନାନୁସାରେ, ଅଭିଯୋଗକାରୀ ପ୍ରଫୁଲ୍ଲ କୁମାର ମୁଦୁଲି ଜମି ବ୍ୟବସାୟ କରନ୍ତି। ଅଭିଯୁକ୍ତ ଜଣକ ତାଙ୍କୁ ଦାଦାବଟି ବାବଦକୁ ୫୦ ହଜାର ମାଗିଥିଲେ। କିନ୍ତୁ ପ୍ରଫୁଲ୍ଲ ଦାଦାବଟି ଦେବାକୁ ରୋକଠୋକ ମନା କରିଦେଇଥିଲେ। ଫଳରେ ଅଭିଯୁକ୍ତ ଦେବାଶିଷ ବୁଧବାର ପ୍ରଫୁଲ୍ଲଙ୍କୁ ଗଙ୍ଗୁଆ ପୋଲ ଉପରେ ଅଟକାଇ ଅଶାଳୀନ ଭାଷାରେ ଗାଳିଗୁଳଜ କରିଥିଲେ। ଏହାକୁ ପ୍ରଫୁଲ୍ଲ ବିରୋଧ କରିବାରୁ ଅଭିଯୁକ୍ତ ଦେବାଶିଷ ତାଙ୍କୁ ବାରମ୍ବାର ଧକ୍କା ମାରିବା ସହ ଧମକ ଦେଇଥିଲେ। ଏପରିକି ତାଙ୍କ ଶାର୍ଟ ପକେଟରୁ ୫ ହଜାର ୨ଶହ ଟଙ୍କା ଛଡାଇ ନେଇଥିଲେ ବୋଲି ପ୍ରଫୁଲ୍ଲ ତାଙ୍କ ଅଭିଯୋଗପତ୍ରରେ ଉଲ୍ଲେଖ କରିଥିଲେ। ପୋଲିସ ଏନେଇ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିବା ସହ ତୁରନ୍ତ କାର୍ଯ୍ୟାନୁଷ୍ଠାନ ନେଇଛି। ହେଲେ ସେ ବାରମ୍ବାର ଏପରି ଅପରାଧ ଘଟାଇ ଜେଲ୍ ଯାଉଥିଲେ ମଧ୍ୟ ବେଲ୍ରେ ଆସିବା ପରେ ପୁଣି ଦାଦାବଟି ମାଗୁଥିବାରୁ ଦୃଢ଼ କାର୍ଯ୍ୟାନୁଷ୍ଠାନର ଆବଶ୍ୟକତା ରହିଛି।
