ବାରିପଦା ଅଫିସ,୨୯।୧୦: ମୟୂରଭଞ୍ଜ ଜିଲା ବାରିପଦା ପୌରପାଳିକାର ବିନା ଅନୁମତିରେ ବେଆଇନ ଭାବେ ଚାଲିଥିବା ଦୁଇଟି କଲ୍ୟାଣ ମଣ୍ଡପ ଓ ଗୋଟିଏ ନିର୍ମାଣାଧୀନ କୋଠାକୁ ଶୁକ୍ରବାର ପ୍ରଶାସନ ସିଲ୍ କରିଛି। ମ୍ୟୁନିସିପାଲିଟିର ନିର୍ବାହୀ ଅଧିକାରୀ ତଥା ଉପଜିଲାପାଳ ଅନ୍ୟା ଦାସଙ୍କ ସହ କର୍ମଚାରୀମାନେ ପହଞ୍ଚି ଏଗୁଡିକୁ ସିଲ୍ କରିଥିଲେ। ଆବଶ୍ୟକ କାଗଜପତ୍ର ଦର୍ଶାଇବା ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁହାଯାଇଛି।
ସହର ରଘୁନାଥପୁର ଅଞ୍ଚଳରେ ଚାଲିଥିବା ନର୍ମଦା ଗାର୍ଡେନ ଓ ସୁଭଦ୍ରା କଲ୍ୟାଣ ମଣ୍ଡପ ପୌରପାଳିକାଠାରୁ ଅନୁମତି ନ ନେଇ ବ୍ୟବସାୟ ଚଳାଇ ଆସୁଥିଲେ। ବିନା ବିଲ୍ଡିଂ ପ୍ଲାନିଂ, ଅଗ୍ନିନିର୍ବାପକ ଓ ଆନୁସଙ୍ଗିକ କାଗଜପତ୍ର ନ ଥିବାରୁ ପୌରପାଳିକା ପକ୍ଷରୁ ସିଲ୍ କରାଯାଇ ନୋଟିସ୍ ପ୍ରଦାନ କରାଯାଇଛି। ସେହିପରି ବଡ଼ବଜାର ଅଞ୍ଚଳରେ ନିର୍ମାଣାଧୀନ କୋଠା ସିଲ୍ ହୋଇଛି। ତେବେ ସହରରେ ବହୁ କୋଠା ବେଆଇନ ଭାବେ ନିର୍ମାଣ ହୋଇଛି। ଏହାର ତଦନ୍ତ କରି ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଗଲେ ବହୁ ରାଜସ୍ବ ଆଦାୟ ହୋଇପାରିବ ବୋଲି ସାଧାରଣରେ ମତପ୍ରକାଶ ପାଇଛି। ସହର ମଧ୍ୟରେ ଥିବା ସମସ୍ତ ମଣ୍ଡପ, କୋଠା, ପେଟ୍ରୋଲ ପମ୍ପ ଓ ବଡ଼ ବଡ଼ ବ୍ୟବସାୟିକ ଅନୁଷ୍ଠାନର ସମସ୍ତ କାଗଜପତ୍ର ଯାଞ୍ଚ କରାଯିବ। ଏଥିରେ ବିଚ୍ୟୁତି ହେଲେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉପଜିଲାପାଳ କହିଛନ୍ତି।
