ଭେଡେନ,୨୪।୩(ଡି.ଏନ.ଏ.): ବରଗଡ ଜିଲା ଭେଡେନ ତହସିଲ ଅନ୍ତର୍ଗତ ବିଭିନ୍ନ ଅଞ୍ଚଳରେ ଥିବା ପଥର ଖାଦାନ, ପଥର ଚଟାଣ ଓ ପାହାଡ ଉପରେ ମାଫିଆଙ୍କ ଲୋଲୁପ ଦୃଷ୍ଟି ପଡିଛି । ଏଠାରେ ପ୍ରତିଦିନ ଉଚ୍ଚ ଶକ୍ତିସମ୍ପନ୍ନ ଡିନାମାଇଟ ବିସ୍ଫୋରଣ କରାଯାଇ ପଥର ଉତ୍ତୋଳନ ହେଉଛି। ଫଳରେ ଲୋକଙ୍କ ଘର କାନ୍ଥଗୁଡିକ ଦବିଯାଇ ଫାଟ ସୃଷ୍ଟି ହେଲାଣି। ଏହି ବିସ୍ଫୋରଣ ଏତେ ପ୍ରଖର ଯେ ଖୋଳାଯାଇଥିବା ଗଭୀର ନଳକୂପ ଗୁଡିକରେ ମାଟି ଧସେଇ ହୋଇ ପୋତି ହୋଇଯାଉଥିବା ଅଭିଯୋଗ ହେଉଛି। ସେହିପରି ଏହି ପଥର ଖାଦାନଗୁଡିକ ସ୍କୁଲ, କଲେଜ ପାଖରେ ରହିଥିବା ବେଳେ ବିସ୍ଫୋରଣ ଯୋଗୁ ଛାତ୍ରୀଛାତ୍ରମାନେ ନିଜକୁ ସୁରକ୍ଷିତ ମଣୁନାହାନ୍ତି। ଏ ନେଇ ଅଭିଭାବକ ମାନେ ବାରମ୍ବାର ପ୍ରଶାସନର ଦ୍ୱାରସ୍ଥ ହୋଇଥିଲେ ମଧ୍ୟ କିଛି ସୁଫଳ ମିଳିନାହିଁ। ଭେଡେନ ତହସିଲ ଅନ୍ତର୍ଗତ ଗଣ୍ଡତୁରୁମ, ଟିହିକିପାଲି, କେଶ୍ରିପାଲି, ମେହେନା, ଭାଲୁପାଲି, ସାରସପାଲି ଆଦି ଗ୍ରାମରେ ଥିବା ପଥର ଖାଦାନରେ ଏଭଳି ଅବସ୍ଥା ଦେଖିବାକୁ ମିଳୁଛି। ପଥର ମାଫିଆମାନେ ମହାନଦୀ ଗର୍ଭରେ ଥିବା ପଥରକୁ ମଧ୍ୟ ଛାଡୁନାହାନ୍ତି।
ସୂଚନା ଅନୁସାରେ, ଭେଡେନ ତହସିଲ ଅଧୀନ ଖାଦାନଗୁଡିକ ମଧ୍ୟରୁ ଅନେକ ଖାଦାନକୁ କେହି ଠିକାସୂତ୍ରରେ ନେଇ ନାହାନ୍ତି। କେତେକ ଖାଦାନ ଲିଜ୍ ସୂତ୍ରରେ ନିଆଯିବା ବ୍ୟବସ୍ଥା କରାଯାଇଛି। ଏଥିରେ ମଧ୍ୟ ପଥର ଉତ୍ତୋଳନ ପାଇଁ ବିସ୍ଫୋରକ ସାମଗ୍ରୀ ବ୍ୟବହାର ନ କରିବାକୁ ଚୁକ୍ତି କରାଯାଇଛି। ମାତ୍ର ସରକାରୀ ନିୟମକୁ ମାଫିଆମାନେ ଖୋଲାଖୋଲି ଉଲଂଘନ କରି ପଥର ଉତ୍ତୋଳନ କରୁଛନ୍ତି। ଏସବୁ ପ୍ରଶାସନର ଜାଣତରେ ହେଉଥିଲେ ମଧ୍ୟ ବିଭାଗୀୟ ଅଧିକାରୀ କୌଣସି ପଦକ୍ଷେପ ନେଉ ନ ଥିବା ଅଭିଯୋଗ ହେଉଛି। ଅନ୍ୟପକ୍ଷେ ପଥର ଖାଦାନରେ ବ୍ୟବହୃତ ନାଇଟ୍ରେଟ, ଇଲେକ୍ଟ୍ରିକ ଡିଟୋନେଟର, ଜିଲେଟିନ ଭଳି ବିସ୍ପୋରକ ସାମଗ୍ରୀ କେଉଁଠୁ ଆସୁଛି ଏବଂ କେଉଁଠି ଗଚ୍ଛିତ ରଖାଯାଉଛି ତାହାର ତଦନ୍ତ ଜରୁରୀ ବୋଲି ସାଧାରଣରେ ମତପ୍ରକାଶ ପାଇଛି। ଏ ସମ୍ପର୍କରେ ଭେଡେନ ତହସିଲଦାର ନେପାଳ ଚନ୍ଦ୍ର ମୁଣ୍ଡାଙ୍କୁ ପଚରାଯିବାରୁ ସେ କହିଲେ, ଭେଡେନ ତହସିଲ ଅଧୀନ କେଶ୍ରିପାଲି, ଭାଲୁପାଲି ଏବଂ ଝରାପାଲି ଗ୍ରାମରେ ଥିବା ପଥର ଖାଦାନକୁ କେବଳ ଲିଜ୍ ସୂତ୍ରରେ ଦିଆଯାଉଛି। ଏହାର ସ୍ବୀକୃତି ପାଇଁ ଭୁବନେଶ୍ୱର ପ୍ରଦୂଷଣ ନିୟମନ୍ତ୍ରଣ ବୋର୍ଡକୁ ପଠାଯାଇଛି। ସେଠାରୁ ଅନୁମତି ଆସିଲେ ଲିଜ୍ ସୂତ୍ରରେ ଦିଆଯିବ। ଯେଉଁମାନେ ଏଠାରେ ବିସ୍ଫୋରକ ବ୍ୟବହାର କରି ବେଆଇନ ଭାବେ ପଥର ଉତ୍ତୋଳନ କରୁଛନ୍ତି, ସେମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ତହସିଲଦାର ମୁଣ୍ଡା କହିଥିଲେ।
