କୋରାପୁଟ,୧୭ା୩(ସ୍ବ.ପ୍ର.): କୋରାପୁଟ ପୌରପାଳିକାକୁ ବୁଧବାର ପଟ୍ଟା ପାଇଁ କେତେକ ହିତାଧିକାରୀ ଆସିଥିଲେ। ଦୀର୍ଘ ସମୟ ଅପେକ୍ଷା କରିବା ପରେ ଦାୟିତ୍ୱରେ ଥିବା ଅଧିକାରୀ ଆସି ନ ଥିଲେ। ଏହି ଖବର ପାଇ କୋରାପୁଟରେ ଥିବା ଜୟପୁର ବିଧାୟକ ତାରାପ୍ରସାଦ ବାହିନୀପତି ପୌର କାର୍ଯ୍ୟାଳୟରେ ପହଞ୍ଚତ୍ଥିଲେ। ସେତେବେଳକୁ ମଧ୍ୟ କାର୍ଯ୍ୟାଳୟରେ କୌଣସି ଅଧିକାରୀ ନ ଥିଲେ। ଦୀର୍ଘ ସମୟ ଜଗିବା ପରେ ପୌରପାଳିକା ଅଧିକାରୀ ଆସିଥିଲେ। ସେ ଆସିବା ପରେ ବାହିନୀପତି ପୌରପାଳିକା ଅଧିକାରୀଙ୍କ ଉପରେ ପ୍ରବଳ ବର୍ଷିଥିଲେ। ଲୋକମାନଙ୍କ ପଟ୍ଟା ସମସ୍ୟାର ସମାଧାନ କର ନଚେତ ମଁୁ ଦୁଇ ଦିନ ପରେ ଆସିବି, ତୁମ ଅଫିସ ସବୁ ଭାଙ୍ଗି ଚୂରମାର କରିଦେବି ବୋଲି କହିଥିଲେ। ନବୀନବାବୁ ପଟ୍ଟା ଦେଉଛନ୍ତି ବୋଲି ସହରାଞ୍ଚଳରେ ବାହାବା ମାରୁଛନ୍ତି। ମାତ୍ର ବାସ୍ତବ ସ୍ଥିତି ଅଲଗା। କାର୍ଯ୍ୟାଳୟରେ ଲୋକଙ୍କୁ ପଟ୍ଟା ଦେଉଛନ୍ତି, ଟଙ୍କା ମାଗୁଛନ୍ତି। ଟଙ୍କା ନ ଦେଲେ ପୌର ଅଧିକାରୀ ଦେଇଥିବା ପଟ୍ଟା ହିତାଧିକାରୀଙ୍କଠାରୁ ଛଡ଼େଇ ନେଉଛନ୍ତି ବୋଲି ବାହିନୀପତି ଅଭିଯୋଗ କରିଥିଲେ। କୋରାପୁଟ ଜିଲାରେ ସମସ୍ତ ସରକାରୀ ଅଧିକାରୀ ସରକାରଙ୍କ ପାଇଁ ଦଳୀୟ ରାଜନୀତି କରୁଛନ୍ତି। ଜିଲାପାଳଙ୍କଠାରୁ ଆରମ୍ଭ କରି ସବୁ ବିଭାଗର ତଳସ୍ତରର କର୍ମଚାରୀଙ୍କ ପର୍ଯ୍ୟନ୍ତ କାର୍ଯ୍ୟାଳୟରେ ସିଟ୍ ଖାଲି ପଡୁଛି। କୋରାପୁଟର ସମସ୍ତ ସରକାରୀ କାର୍ଯ୍ୟାଳୟରେ ଯଦି କାର୍ଯ୍ୟାଳୟ ସମୟରେ କୌଣସି ଅଧିକାରୀ କିମ୍ବା କର୍ମଚାରୀ ନିଜ ସିଟ୍ରେ ଅନୁପସ୍ଥିତ ରହିବେ ସମ୍ପୃକ୍ତ କାର୍ଯ୍ୟାଳୟକୁ ଭଙ୍ଗାଯିବା ସହ ନିଆଁ ଲଗାଯିବ ବୋଲି ବାହିନୀପତି ଧମକ ଦେଇ ଚାଲିଆସିଥିଲେ।
