ନୂଆଦିଲ୍ଲୀ,୨।୧: ଭାରତୀୟ ପ୍ରଯୁକ୍ତି ବିଦ୍ୟା ପ୍ରତିଷ୍ଠାନ (IIT), ହାଇଦ୍ରାବାଦର ଜଣେ ଛାତ୍ର ଏକ ବିରାଟ ସଫଳତା ହାସଲ କରିଛନ୍ତି। କମ୍ପ୍ୟୁଟର ସାଇନ୍ସ ଇଞ୍ଜିନିୟରିଂର ଅନ୍ତିମ ବର୍ଷର ୨୧ ବର୍ଷୀୟ ଛାତ୍ର ଏଡୱାର୍ଡ ନାଥନ୍ ଭର୍ଗିସଙ୍କୁ ବାର୍ଷିକ ୨.୫ କୋଟି ଟଙ୍କାର ବ୍ୟୟବହୁଳ ପ୍ୟାକେଜ୍ ପ୍ରଦାନ କରାଯାଇଛି। ୨୦୦୮ ମସିହାରେ ପ୍ରତିଷ୍ଠା ହେବା ପରଠାରୁ ଏହି ଶିକ୍ଷାନୁଷ୍ଠାନରେ ଏହା ହେଉଛି ସର୍ବୋଚ୍ଚ ପ୍ୟାକେଜ୍।
ନେଦରଲ୍ୟାଣ୍ଡର ଏକ ପ୍ରତିଷ୍ଠିତ ଗ୍ଲୋବାଲ୍ ଟ୍ରେଡିଂ ଫର୍ମ ‘ଅପ୍ଟିଭର’ ପକ୍ଷରୁ ଏହି ଅଫର୍ ଦିଆଯାଇଛି। ଏଡୱାର୍ଡ ଏହି କମ୍ପାନୀରେ ଜୁଲାଇ ମାସରୁ ସଫ୍ଟୱେର୍ ଇଞ୍ଜିନିୟର ଭାବେ ଯୋଗ ଦେବେ। ସେ ଦୁଇ ମାସର ସମର୍ ଇଣ୍ଟର୍ନସିପ୍କୁ ନିଜର ଦକ୍ଷତା ବଳରେ ପ୍ରି-ପ୍ଲେସମେଣ୍ଟ ଅଫର୍ରେ ପରିଣତ କରି ଏହି ସଫଳତା ପାଇଛନ୍ତି।
ଏଡୱାର୍ଡଙ୍କ ପିତାମାତା ଉଭୟ ଇଞ୍ଜିନିୟର ଏବଂ ହାଇଦ୍ରାବାଦରେ ତାଙ୍କର ଜନ୍ମ। ହାଇଦ୍ରାବାଦରେ ପ୍ରାଥମିକ ଶିକ୍ଷା ପରେ ସେ ବେଙ୍ଗାଲୁରୁରେ ୭ମ ରୁ ୧୨ଶ ଶ୍ରେଣୀ ପର୍ଯ୍ୟନ୍ତ ପାଠ ପଢିଥିଲେ। ୨୦୨୨ରେ ଜେଇଇ ମେନ’ରେ ୧୧୦୦ ଏବଂ ଜେଇଇ ଆଡଭାନ୍ସରେ ୫୫୮ ରାଙ୍କ୍ ହାସଲ କରିଥିଲେ। ଏହାପରେ ୨୦୨୫ CAT ପରୀକ୍ଷାରେ ସେ ୯୯.୯୬ ପରସେଣ୍ଟାଇଲ୍ ରଖି ସର୍ବଭାରତୀୟ ସ୍ତରରେ ୧୨୦ତମ ସ୍ଥାନ ଅଧିକାର କରିଛନ୍ତି।
ଏଡୱାର୍ଡ କେବଳ ପାଠପଢାରେ ନୁହେଁ, ବରଂ ନେତୃତ୍ୱ ନେବାରେ ମଧ୍ୟ ଆଗୁଆ। ସେ ଆଇଆଇଟି ହାଇଦ୍ରାବାଦର ‘ଅଫିସ ଅଫ୍ କ୍ୟାରିୟର ସର୍ଭିସେସ୍’ର ମୁଖ୍ୟ ଭାବେ କାର୍ଯ୍ୟ କରି ପ୍ଲେସମେଣ୍ଟ ପ୍ରକ୍ରିୟାକୁ ପରିଚାଳନା କରିଛନ୍ତି। ଆଲଗୋରିଦମ, କୋଡିଂ ଏବଂ ମ୍ୟାନେଜମେଣ୍ଟ କ୍ଷେତ୍ରରେ ତାଙ୍କର ଗଭୀର ଆଗ୍ରହ ରହିଛି।
ପୂର୍ବରୁ ଆଇଆଇଟି ହାଇଦ୍ରାବାଦରେ ସର୍ବୋଚ୍ଚ ପ୍ୟାକେଜ୍ ୨୦୧୭ ମସିହାରେ ୧.୧ କୋଟି ଟଙ୍କା ଥିଲା। ୨୦୨୩-୨୪ରେ ଏହା ୯୦ ଲକ୍ଷ ଏବଂ ୨୦୨୪-୨୫ରେ ୬୬ ଲକ୍ଷ ଟଙ୍କା ଥିବାବେଳେ ଏଡୱାର୍ଡଙ୍କ ଏହି ୨.୫ କୋଟିର ଅଫର୍ ସମସ୍ତ ପୁରୁଣା ରେକର୍ଡ ଭାଙ୍ଗି ଦେଇଛି।
