ବାଲେଶ୍ୱର, ୨୦।୭(ମାନସ ବିଶ୍ୱାଳ)୫୦ ହଜାର ଟଙ୍କା ଲାଞ୍ଚ ନେଇ ଭିଜିଲାନ୍ସ ହାତରେ ଧରାପଡ଼ିଛନ୍ତି ବାଲେଶ୍ୱର ଜିଲା ଚାନ୍ଦିପୁର ଥାନା ଆଇଆଇସି ଗଣେଶ୍ୱର ପ୍ରଧାନ ଓ ଏଏସ୍ଆଇ ପ୍ରଦୀପ କୁମାର ମହାନ୍ତି। ଉଭୟେ ମଦ ବ୍ୟବସାୟୀଙ୍କଠାରୁ ମାସିକିଆ ବଟି ବାବଦରେ ନେଉଥିବା ଭିଜିଲାନ୍ସ ଜାଣିବାକୁ ପାଇଛି। ଏନେଇ ଭିଜିଲାନ୍ସ ଅଫିସରେ ମାମଲା (ନଂ. ୧୮/୨୩) ରୁଜୁ କରାଯାଇ ଉଭୟଙ୍କୁ ଗିରଫ କରାଯାଇଥିବା ବାଲେଶ୍ୱର ଭିଜିଲାନ୍ସ ଏସ୍ପି ନରହରି ନାୟକ ସୂଚନା ଦେଇଛନ୍ତି। ବାଲେଶ୍ୱର ସହର ପାତ୍ରପଡ଼ା ଓ ଚାନ୍ଦିପୁର ମେରାଇନ୍ ଥାନା ବଳରାମଗଡ଼ି ଅଞ୍ଚଳରେ ଥିବା ସରକାରୀ ଲାଇସେନ୍ସପ୍ରାପ୍ତ ବିଦେଶୀ ମଦ ଦୋକାନ କରି ବ୍ୟବସାୟ କରୁଥିବା ମାଲିକଙ୍କୁ ମାସିକ ୫୦ହଜାର ଟଙ୍କା ବଟି ଦେବା ପାଇଁ ଚାନ୍ଦିପୁର ଥାନାର ଆଇଆଇସି ପ୍ରଧାନ ଓ ଏଏସ୍ଆଇ ମହାନ୍ତି ଧମକଚମକ ଦେଉଥିଲେ। ମାଲିକ ଜଣକ ପୂର୍ବରୁ ମାସିକ ୧୦ହଜାର ଟଙ୍କା ବଟି ଦେଇଆସୁଥିବା ବେଳେ ହଠାତ୍ ଏତେ ଟଙ୍କା ମାଗିବାରୁ ଅତିଷ୍ଠ ହୋଇ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ।
ଭିଜିଲାନ୍ସ ଅଧିକାରୀଙ୍କ ନିର୍ଦ୍ଦେଶ ଅନୁସାରେ ତାଙ୍କୁ ଟ୍ରାପ୍ କରିବା ପାଇଁ ଯୋଜନା ପ୍ରସ୍ତୁତ ହୋଇଥିଲା। ବୁଧବାର ଅପରାହ୍ନ ୩ଟାରେ ମଦ ବ୍ୟବସାୟୀ ଜଣକ ଚାନ୍ଦିପୁର ଥାନାର ଏଏସ୍ଆଇ ମହାନ୍ତିଙ୍କ ପାଖରେ ପହଞ୍ଚତ୍ ଆଇଆଇସି ପ୍ରଧାନଙ୍କ ଉପସ୍ଥିତିରେ ଟଙ୍କା ଦେଇଥିଲେ। ପୂର୍ବ ପ୍ରସ୍ତୁତ ଯୋଜନା ଅନୁସାରେ ଭିଜିଲାନ୍ସର ଏକ ଟିମ୍ ଦୁଇ ଅଧିକାରୀଙ୍କୁ ଲାଞ୍ଚ ନେବା ବେଳେ ଗିରଫ କରିଛି। ଅନ୍ୟପକ୍ଷରେ ଭିଜିଲାନ୍ସ ଉଭୟ ଅଧିକାରୀଙ୍କର ବାସଭବନ ସମେତ ଭିନ୍ନ ଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି।
