ନୂଆଦିଲ୍ଲୀ,୨୪ା୫: ଭାରତ ସମେତ ୧୧ ଦେଶ କୋଭିଡ୍-୧୯ ଭୂତାଣୁକୁ ହେୟଜ୍ଞାନ କରି ଉଚିତ ଢଙ୍ଗରେ ଏହାର ମୁକାବିଲା କରି ନାହାନ୍ତି। ଫଳରେ ଏହି ରାଷ୍ଟ୍ରଗୁଡ଼ିକର ଲୋକପ୍ରିୟ ସରକାରଙ୍କୁ ମହାମାରୀ ମହଙ୍ଗା ପଡ଼ିଛି ବୋଲି ସ୍ବିଡେନ୍ର ଭେରାଇଟିଜ୍ ଅଫ୍ ଡେମୋକ୍ରାସି (ଭି-ଡେମ୍) ଇନ୍ଷ୍ଟିଚ୍ୟୁଟ୍ ପକ୍ଷରୁ ପ୍ରକାଶିତ ଏକ ରିପୋର୍ଟରେ ଦର୍ଶାଯାଇଛି।
ଗୋଥେନ୍ବର୍ଗ ୟୁନିଭର୍ସିଟିର ଭି-ଡେମ୍ ଇନ୍ଷ୍ଟିଚ୍ୟୁଟ୍ ଏହାର ଗବେଷଣାମୂଳକ ନିବନ୍ଧରେ ୨୦୨୦ରେ ଲୋକପ୍ରିୟ ଓ ଅଣଲୋକପ୍ରିୟ ସରକାରମାନଙ୍କ ପ୍ରଦର୍ଶନକୁ ନେଇ ଏକ ତୁଳନାମତ୍କ ଚିତ୍ର ଅଙ୍କାଯାଇଛି। ଏଥିରେ ୪୨ ବିକଶିତ ଓ ବିକାଶଶୀଳ ଅର୍ଥନୀତିକୁ ସାମିଲ କରାଯାଇଛି। ତନ୍ମଧ୍ୟରୁ ୧୧ଟି ରାଷ୍ଟ୍ରରେ ଭାରତର ମୋଦି ସରକାରଙ୍କ ଭଳି ଲୋକପ୍ରିୟ ସରକାର କ୍ଷମତାସୀନ ଥିବା ଦର୍ଶାଯାଇଛି। ଅନ୍ୟ ୧୦ ରାଷ୍ଟ୍ର ହେଲେ ବ୍ରାଜିଲ, ଚେକ୍ ରିପବ୍ଲିକ୍, ହଙ୍ଗେରି, ଇସ୍ରାଏଲ୍, ମେକ୍ସିକୋ, ପୋଲାଣ୍ଡ, ସ୍ଲୋଭାକିଆ, ତୁର୍କୀ, ବ୍ରିଟେନ ଓ ଆମେରିକା। ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ବ୍ରାଜିଲ ରାଷ୍ଟ୍ରପତି ଜୈର୍ ବୋଲସୋନାରୋ, ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ, ତୁର୍କୀ ରାଷ୍ଟ୍ରପତି ରେସେପ୍ ତୟିପ୍ ଏର୍ଡୋଗାନ, ବ୍ରିଟେନ ପ୍ରଧାନମନ୍ତ୍ରୀ ବୋରିସ୍ ଜନ୍ସନ ଓ ଆମେରିକାର ତତ୍କାଳୀନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କୁ ସବୁଠୁ ଅଧିକ ଅବହେଳାକାରୀ ଶାସକ ବୋଲି ଏହି ରିପୋର୍ଟରେ ଉଲ୍ଲେଖ କରାଯାଇଛି।
ଆମେରିକା, ଭାରତ ଓ ବ୍ରାଜିଲରେ ବିଶ୍ୱର ସର୍ବାଧିକ କରୋନା ଭାଇରସ୍ ସଂକ୍ରମଣ ମାମଲା ଦେଖିବାକୁ ମିଳୁଥିବାବେଳେ ମହାମାରୀ ଫ୍ରାନ୍ସ, ତୁର୍କୀ, ରୁଷିଆ ଓ ବ୍ରିଟେନକୁ ମଧ୍ୟ ବହୁଳ ଭାବେ ପ୍ରଭାବିତ କରିଛି। ଆମେରିକା ପରେ ସର୍ବାଧିକ ସଂକ୍ରମିତ ଥିବା ଭାରତରେ ଏବେ ଦୈନିକ ସଂକ୍ରମଣ ୩ ଲକ୍ଷ ଉପରେ ରହୁଛି। କୋଭିଡ୍ ମହାମାରୀ ଭାରତର ସ୍ବାସ୍ଥ୍ୟ ବ୍ୟବସ୍ଥାକୁ ବିପର୍ଯ୍ୟସ୍ତ କରିଦେଇଥିବାବେଳେ ଅନେକ ରାଜ୍ୟରେ ବ୍ଲାକ୍ ଫଙ୍ଗସ୍ ଓ ହ୍ବାଇଟ୍ ଫଙ୍ଗସ୍ ଆଉ ଦୁଇଟି ବଡ଼ ଚ୍ୟାଲେଞ୍ଜ ଭାବେ ଉଭା ହୋଇଛି। ମହାମାରୀ ମୁକାବିଲାରେ ଏହି ଲୋକପ୍ରିୟ ସରକାରମାନଙ୍କ ନୀତି ଦୁର୍ବଳ ରହିଥିବାରୁ ସମ୍ପୃକ୍ତ ଦେଶଗୁଡ଼ିକରେ ଅନ୍ୟ ରାଷ୍ଟ୍ର ଅପେକ୍ଷା ମୃତ୍ୟୁ ହାର ଅଧିକ ରହିଥିବା ରିପୋର୍ଟରେ କୁହାଯାଇଛି।
