ଜୟପୁର,୨୫।୫ : ରାଜସ୍ଥାନରେ ବିଧାନସଭା ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ ଅଶୋକ ଗେହଲୋଟ ଏବଂ ପୂର୍ବତନ ଉପମୁଖ୍ୟମନ୍ତ୍ରୀ ସଚିନ ପାଇଲଟଙ୍କ ମଧ୍ୟରେ ଚାଲିଥିବା ବିବାଦର ସମାଧାନ ପାଇଁ କଂଗ୍ରେସ ଦଳ ବର୍ତ୍ତମାନ ପ୍ରସ୍ତୁତି ଆରମ୍ଭ କରିଛି। ମେ ୨୬ ରେ ଅପରାହ୍ନରେ ଏଆଇସିସି ମୁଖ୍ୟାଳୟରେ ଏକ ଗୁରୁତ୍ୱପୂର୍ଣ୍ଣ ବୈଠକ ଡକାଯାଇଛି । ରାଜ୍ୟ କଂଗ୍ରେସ ସଭାପତି ଗୋବିନ୍ଦ ସିଂ ଦୋଟାସାରା, ବିଧାନସଭା ବାଚସ୍ପତି ଡକ୍ଟର ସିପି ଜୋଶୀ, ରାଜ୍ୟ କଂଗ୍ରେସ ଦାୟିତ୍ୱରେ ଥିବା ସୁଖଜିନ୍ଦର ସିଂ ରନ୍ଧୱା ଏବଂ ତିନିଜଣ ସହ-ପ୍ରଭାରୀ ମଧ୍ୟ ଉପସ୍ଥିତ ରହିବେ। ସଚିନ ପାଇଲଟଙ୍କୁ ମଧ୍ୟ ଏହି ବୈଠକରେ ଡକାଯାଇଛି।
ସୂଚନାନୁସାରେ, କଂଗ୍ରେସ ନେତା ତଥା ପୂର୍ବତନ କେନ୍ଦ୍ର ମନ୍ତ୍ରୀ ଭୱଁର ଜିତେନ୍ଦ୍ର ସିଂ ମଧ୍ୟ ଏଆଇସିସି ସହିତ ସମଗ୍ର ମାମଲାର ସଂଯୋଜନା କରୁଛନ୍ତି। କଂଗ୍ରେସ ହାଇକମାଣ୍ଡ ମଧ୍ୟ କିଛି ମନ୍ତ୍ରୀଙ୍କ ପ୍ରଦର୍ଶନ ରିପୋର୍ଟ ଲୋଡିଛନ୍ତି। ଦଳର ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେଙ୍କ ଅଧ୍ୟକ୍ଷତାରେ ହେବାକୁ ଥିବା ଏହି ବୈଠକ ଆଗାମୀ ଦିନର ସଙ୍କେତ ସମ୍ପର୍କରେ ସୂଚାଉଛି।
ସୂତ୍ରରୁ ପ୍ରକାଶ ନିର୍ବାଚନ ପୂର୍ବରୁ ଦଳ କ୍ଷତି ସହିବ ନାହିଁ ବୋଲି କଂଗ୍ରେସ ଦଳ ପ୍ରଥମେ ସଚିନ ପାଇଲଟଙ୍କୁ ଶାନ୍ତ କରିବା ପାଇଁ ସମସ୍ତ ପ୍ରକାର ଉଦ୍ୟମ କରୁଛି । ଯଦି ପାଇଲଟ ବୁଝାଇବା ପରେ ଅରାଜି ହୁଅନ୍ତି ଏବଂ ନିଜ ସରକାର ବିରୋଧରେ ଆନ୍ଦୋଳନ କରନ୍ତି। ତେବେ ତାଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ। ହୁଏତ ଅବୁଝା ପାଇଲଟଙ୍କୁ ହାଇକମାଣ୍ଡ ତେଜ୍ୟପୁତ୍ର କରି ପାର୍ଟିରୁ ବାହାରିବାର ବାଟ ଦେଖାଇପାରନ୍ତି ବୋଲି ଚର୍ଚ୍ଚା ହେଉଛି।
