ଯାଜପୁର ଅଫିସ,୧୨ା୩: ଯାଜପୁର ଜିଲା ଯୋଗାଣ ବିଭାଗରେ ଲାଞ୍ଚ ନ ଦେଲେ ଟେବୁଲରୁ ଫାଇଲ ଘୁଞ୍ଚେ ନାହିଁ। ପ୍ରତ୍ୟେକ କାର୍ଯ୍ୟରେ ଏହି ବିଭାଗର ଜୁନିୟର ଆସିଷ୍ଟାଣ୍ଟ ରୁଦ୍ରପ୍ରସନ୍ନ ବେହେରା ଅର୍ଥ ଦାବି କରୁଥିବା ଅଭିଯୋଗ ଆସିଛି। ଏପରି କି କର୍ମଚାରୀଙ୍କ ୩୦% ବଳକା ଦରମା ବାବଦ ପାଇଁ ୧୦୦୦ ଟଙ୍କା ଲେଖାଏ ଦାବି କରି ଏଯାଏ ଫାଇଲକୁ ପକେଇ ରଖିଛନ୍ତି। ଅନ୍ୟ ଜିଲାଗୁଡ଼ିକରେ କର୍ମଚାରୀଙ୍କୁ ବଳକା ଦରମା ମିଳି ସାରିଥିବାବେଳେ ଯାଜପୁର ଜିଲାରେ ତାହା ହୋଇପାରିନାହିଁ। ଏହି ମର୍ମରେ ଯାଜପୁର ଜିଲା ଦୁର୍ନୀତି ନିବାରଣ ମଞ୍ଚ ପକ୍ଷରୁ ଓଡ଼ିଶା ଯୋଗାଣ ନିଗମର ଜେନେରାଲ ମ୍ୟାନେଜର(ପ୍ରଶାସନ)ଙ୍କୁ ଲିଖିତ ଅଭିଯୋଗ କରାଯାଇଥିଲା। ଏହାପରେ ନିଗମର ଜେନେରାଲ ମ୍ୟାନେଜର ଜୟଶ୍ରୀ ସେନାପତି ଅଭିଯୋଗ ସଂକ୍ରାନ୍ତରେ ସ୍ପଷ୍ଟୀକରଣ ଦାଖଲ କରିବାକୁ ଜିଲା ଯୋଗାଣ ଅଧିକାରୀ (ସିଏସ୍ଓ)ଙ୍କୁ ଗତ ୯ ତାରିଖରେ ନିର୍ଦ୍ଦେଶ ଜାରି କରିଛନ୍ତି।
ଅଭିଯୋଗ ଅନୁଯାୟୀ, ୨୦୧୯ ଏପ୍ରିଲରେ ଏହି ବିଭାଗର ଆକାଉଣ୍ଟ ସେକ୍ସନରେ ମନମାନି, ମିଲର୍ସଙ୍କୁ ଜାଣିଶୁଣି ହଇରାଣ, ବ୍ୟାପକ ପିସି କାରବାର ଓ ଦୁର୍ନୀତି ହୋଇଥିଲା। ହେଲେ ତକତ୍ାଳୀନ ସିଏସ୍ଓ ମିଥ୍ୟା ତଦନ୍ତ ରିପୋର୍ଟ ଦାଖଲ କରି ଆକାଉଣ୍ଟାଣ୍ଟଙ୍କୁ ସୁରକ୍ଷା ଦେଇଥିଲେ। ଯୋଗାଣ ନିଗମର ଜେନେରାଲ ମ୍ୟାନେଜର(ଜିଏମ୍) ନରହରି ସେଠୀ ତାଙ୍କ ପତ୍ରସଂଖ୍ୟା ୬୧୨୦/୨୪ା୪ା୨୦୧୯ରେ ଜିଲା ଯୋଗାଣ ଅଧିକାରୀଙ୍କୁ ଅଭିଯୋଗର ସତ୍ୟାସତ୍ୟ ଅନୁସନ୍ଧାନ କରି ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଥିଲେ। ହେଲେ କୌଣସି ସୁଫଳ ମିଳି ପାରି ନ ଥିଲା। ବିଲ୍ ପାସ୍ ହେବା ପରେ ଏହି ଆକାଉଣ୍ଟାଣ୍ଟ ଓ କେତେଜଣ ଅଧିକାରୀ ମିଲର୍ସ ଓ ଠିକାଦାରଙ୍କ ନିକଟରୁ ମୋଟା ଅଙ୍କର ପିସି ନେଇ ଭାଗବଣ୍ଟା କରୁଥିଲେ। ସମବାୟ ସମିତିରେ ଧାନ କୁଇଣ୍ଟାଲ ପିଛା ୩/୫ କେଜି କଟନି ଛଟନି ହୋଇଥାଏ। ଏହି ବାବଦରେ ସମିତି କିମ୍ବା ମିଲର୍ସଙ୍କଠାରୁ ଅର୍ଥ ଆଦାୟ କରି ଅଧିକାରୀମାନେ ନିଜ ପକେଟ ଗରମ କରିଥାନ୍ତି। ପ୍ରତ୍ୟେକ ମାସରେ ଆର୍ଆର୍ସିରେ ଦେଉଥିବା ଚାଉଳ ବାବଦକୁ କୁଇଣ୍ଟାଲ ପିଛା ୧୦ ଟଙ୍କା ହିସାବରେ ମିଲର୍ସ ଓ ପରିବହନ କମ୍ପାନୀଠାରୁ ଲକ୍ଷାଧିକ ଟଙ୍କା ମାସର ପ୍ରଥମ ସପ୍ତାହରେ ଆଦାୟ ହୋଇଥାଏ। ଏହି ଦୁର୍ନୀତିରେ ସମ୍ପୃକ୍ତ କର୍ମଚାରୀ ଓ ଅଧିକାରୀ ଆୟ ବହିର୍ଭୂତ ସମ୍ପତ୍ତି ଠୁଳ କରି ବିଭିନ୍ନ ସ୍ଥାନରେ ବଡ଼ବଡ଼ କୋଠାମାନ ନିର୍ମାଣ କରି କୋଟିପତି ସାଜିଛନ୍ତି ବୋଲି ଅଭିଯୋଗ ହୋଇଥିଲା। ଏନେଇ ବିଭାଗ ପକ୍ଷରୁ ପୂର୍ବରୁ ତଦନ୍ତ ନିର୍ଦ୍ଦେଶ ହୋଇଥିଲେ ହେଁ ଦୁର୍ନୀତିରେ ଭାଗୀଦାରି ସାଜିଥିବା ଅଧିକାରୀ ନିଜେ ତଦନ୍ତ କରିଥିବାରୁ ତାହା ବାଟବଣା ହୋଇଥିବା ମତପ୍ରକାଶ ପାଇଥିଲା। ଏହିକ୍ରମରେ ଜୁନିୟର ଆସିଷ୍ଟାଣ୍ଟଙ୍କ ବିରୋଧରେ ଆସିଥିବା ଗୁରୁତର ଅଭିଯୋଗ ସମ୍ପର୍କରେ କ’ଣ କାର୍ଯ୍ୟାନୁଷ୍ଠାନ ନିଆଯିବ ତାହା ସମୟ କହିବ।
